1 À Ɠɔoɠɔ GALAGI maamusɛ!

À maamusɛ, wɔi wo ga Ɠɔoɠɔ GALAGI ná-botiɠɛ nuiti,

à Ɠɔoɠɔ GALAGI laaseigi maamusɛ!

2 Mamagi ɠa Ɠɔoɠɔ GALAGI ʋɛ,

é zo niizu ma, eyɛsu ɠɔ.

3 É zo folo ɠulazuʋɛ ma, é li folo liizuʋɛ,

Ɠɔoɠɔ GALAGI laaseigi lɛbiyai zɔlɔɔ.

4 Toɠa zeini ziiti kpein unga,

ná-lɛbiyai ɠa geeɠɔlɔgi maazu.

5 Ɓɛ ɠa é ga Ɠɔoɠɔ GALAGI ada-ƓALAGI ɠɛʋele?

Toɠa zeini anii kpein unga geezuʋɛ.

6 Kɛlɛ toɠa ɗa ungi ʋilɛ,

é geeɠɔlɔgi ɠa ta zooi.

7 Toɠa ɗa maawɔin nui ɠula fufiligi zu,

toɠa ɗa maanɔɠɔ nui wuzeɠe, é kula kpoɠagi zu,

8 é sei seizumaanɛgiti saama,

ná-nuɓusɛiti ta-zeizumaanɛgiti.

9 Toɠa pɛlɛyeɠei ve doun zɔlɔɔtala anzanui ya,

é koozunɛɛi zɔlɔɔ, tɔɔzei é ɠɛa ga dounɠa ti-lee.

À Ɠɔoɠɔ GALAGI maamusɛ!