1 Ee, Ɠɔoɠɔ GALAGI, é la ga gɔnɔ,

giya laade gɔnɔ ʋa ɠɛ ga lɛbiyai,

kɛni ɗa ɠila kpe, ɗa-nuɓɔɠɔlai maaʋele ma, ta ɗa-wooɠɛɠiladai.

2 Leeni vaa zu, zii ɠiligiti ti ɓɔɠɔ ɠaazaɠasu ga:

«Mini ɠa ta-ƓALAGI ná?»

3 Ada-ƓALAGI ɠa geeɠɔlɔgi zu,

é ɗa naa kpein kɛ, nii nɛai bɛ.

4 Kɛlɛ ta-ɠɔɔɠɔ ganigiti ta ga walii ta zanugi,

niiti nuɓusɛiti ti ti ɓɛtɛai.

5 Daaʋɛ ɠa ti ʋa, kɛlɛ ti la ɓɔɛzu la,

gaazuʋɛ ɠa ti ʋa, kɛlɛ ti la wozaɠaazu la,

6 goiyeɠei ɠa ti ʋa, kɛlɛ ti la faa mɛnisu da,

sokpai ɠa ti ʋa, kɛlɛ ti la ani maku mɛnisu da.

7 Ti-yeeiti ta ti ʋa, kɛlɛ ti la vɔɔɠuzu ani ʋa ga tiye,

ti-ɠɔɠɔiti ta ti ʋa, kɛlɛ ti la ziɛzu ga tiye,

woo la zooga ɠulazu ti-ɠɔdayeɠei zu.

8 Ti ɓɛtɛ nuiti kulaʋɛ ga tiye,

ta niiti kpein ti ɠitosu ti ʋa.

9 Izilayɛle, ɠaliva Ɠɔoɠɔ GALAGI ma.

Tɔ ɠa é è ʋɛ ga kpɔba nui, ta kɔɔɠɔ ɠɔlu zɛpɛgi.

10 Wɔi wo ga zalaɠa ɠula nuiti, Aalɔn mavofodaiti, à ɠaliva Ɠɔoɠɔ GALAGI ma.

Tɔ ɠa é è ʋɛ ga kpɔba nui, ta kɔɔɠɔ ɠɔlu zɛpɛgi.

11 Wɔiti wo luazu Ɠɔoɠɔ GALAGI ʋa, à ɠaliva ma.

Tɔ ɠa é wo ʋɛ ga kpɔba nui, ta kɔɔɠɔ ɠɔlu zɛpɛgi.

12 Ɠɔoɠɔ GALAGI ɠa ɠisiɛzu ade zu, toɠa tuya loo ade ʋɛ,

toɠa tuya loo Izilayɛle ʋɛlɛyeɠei ʋɛ,

toɠa tuya loo Aalɔn ná-pɛlɛyeɠei ʋɛ.

13 Ɠɔoɠɔ GALAGI tuya loo naati bɛ, niiti ti luazu ba,

ɓolomadɔɠɔiti ta seizumaanɛgiti.

14 Ɠɔoɠɔ GALAGI wo ɠaawɔɔlɔ,

wa-o, wo-lointi-yo.

15 Ɠɔoɠɔ GALAGI tuya loo wo ʋɛ,

nii é geeɠɔlɔgi ɓɛtɛa, ta zooi.

16 Geeɠɔlɔgi ɠa ga Ɠɔoɠɔ GALAGI nɔnɔ,

kɛlɛ é zooi veeʋɛ nuɓusɛiti bɛ.

17 Gɔvɛiti taade ta ɗa Ɠɔoɠɔ GALAGI maamusɛ,

anɛɛ naati taɠila kpalaa, niiti ti gaalɛi yooi zu.

18 Kɛlɛ adɔun, ada Ɠɔoɠɔ GALAGI maamusɛzu, é zo niizu ma, eyɛsu ɠɔ.

À Ɠɔoɠɔ GALAGI maamusɛ!