Guyeiti 53

Eteai ná-kaka faa wolai

1 Guye loo ɠundiɠii nɔnɔi ʋe. É loozu koolei zu. Davide ná-kidafaawui.

2 Ɠimalala nui ɠa ɗa bo yiimaʋɛ ga:

«GALA ge la ná!»

Ti ɠakagɛ, ti faaɠaaza golai ɠɛa.

Gila kpalaa ge la ná, nii é faa ʋagɔ ɠɛɛzu.

3 GALA ge yɛni geeɠɔlɔgi ungaʋɛ,

é unpilɛ, é nuɓusɛiti pɛtɛ zooi ma,

é pɛtɛ, ni nu ɠila kpalaa ka ná, nii ɠi pagɔ ma,

é GALA gaiziɛzu.

4 Ti pɛ ti maaɠooza, ti kpein ti ɠɛa ga yaava nuiti ʋɔɔma,

taɠila kpalaa ge la ná, nii é faa ʋagɔ ɠɛɛzu, anɛɛ gila kpalaa.

5 Niiti ti telebotala vai ɠɛɛzu,

ti la faa ɠaaɠaazu ɓaa?

Tɛi ti nà-nuɓusɛiti numasu, eɠɛʋelei nu a ɗa ɓului numa da.

Ti la wooɠulazu GALA ma.

6 Miná ɠa ti zasuɓalizu ná ga duai,

anɛɛ dua un taade.

GALA ka naati ma ɠaei vaza niiti ti laalɛɛzu è wu,

ɗa ti unfe, mazɔlɔɔ GALA ge ti ʋilini ya.

7 Nɔ̀un wɔ̀inʋɛ ga gè Izilayɛle ná-kizo fai ɠa, nii é ʋaazu Siyɔn gizei ma!

Siɛgi zu GALA ge ná-nuɓusɛiti ta-vai valibosu da,

Zakɔɓe mavofodai ɠa ɠoozunɛ, Izilayɛle ɠa ɠɛ koozunɛɛi zu!