Guyeiti 45

Masagi ná-vulu ɠɛɛ vai

1 Guye loo ɠundiɠii nɔnɔi ʋe. Nii é loozu é zoloo guye wooi ma, nii daa ga: «Bulɛgi ma ʋuaiti». Kolé mavofodaiti ta-ɠidafaawui, ta ta-nɛɛbɛ wuyei.

2 Zìi ɠa ɲiikpisu ga woo ʋagɔiti,

nà-kɛɛwotiiti ta ga masagi nɔnɔ!

Nà pɔ ga nɛ̀gi ɠɛ ga seeli kpaɠai, é sɛʋɛ ɠɛ nui yeezu nii ɠigi ma.

3 Nuɓusɛiti kpein saama, è ʋagɛ ti pɛ ba,

è ɓɔɛ ʋeleiti pagɛ,

GALA ge tuya looʋɛ è ʋɛ eyɛsu ɠɔ.

4 Ɗa-woɠa zɔkpɔi ɠili zaama, kɔɔɠɔ nu wolai,

ɗa-maayikii ta ɗa-lɛbiyai nii é volozu.

5 Ɗa-lɛbiyai zu, zobo sɔlɔɔ!

Lo ɗa-ɠɔɔɠɔ wotoloi luɠɔ,

è gaamai maalobo, naa ʋɛɛ ɓɔɠɔmaayeii ʋa ta telebodai!

È-yeezai ɠa pilɛ sɔlɔɔ, é faa wolaiti dɛɛ ga ɗe!

6 Ɗa-mɛɛinti gaazoɓaʋɛ, nuɓusɛiti ta loo bu è ɠakalaʋɛ,

ɗa-mɛɛinti ta lɔ masagi zili nuiti ziiti su.

7 Ee, GALA, ɗa-masa kpɔkpɔgi ɠa ná yeenɔpɛ, eyɛsu ɠɔ,*45:7 Ee, GALA, ɗa-masa kpɔkpɔgi ɠa ná yeenɔpɛ, eyɛsu ɠɔ: Tati pelei taɠili ɓalaa ka ga nii: Ɗa-masadai GALA ge fea è ya, toɠa ná ɠɔoɠɔ ta ɠɔoɠɔ

ɗa-masa tukpɔi ɠa ga telebo tukpɔi.

8 Telebodai nɛɛʋɛ è ʋɛ, è faa ɲɔi wɔinzeɠe.

Naa ɠa é ba, GALA, ɗa-ƓALAGI gulɔi ziɛni è ma, koozunɛ wulɔi,

é yiimazeɠe ga ɗe è ɠɛɠalaiti saama.

9 Miilegi, ta kanɛlegi, naa ʋɛɛ alɔwɛgi ʋa ta ɗa-zeɠei makugi nɛɛzu.

Ɗa-masa pɛlɛiti buuɓɛtɛʋɛ ga see ɲiigai,

miná ɠa ti kɔnigi ɠɛinsu ná, ti ɗa è ɠoozunɛ.

10 Wɛlɛ, masa anzanuiti ka ti ga è-ziɛpoluɲɔɠɔiti,

masa anzanui ɠa è yeezazuʋɛ, maaɠiliai ga zanugi nii seɠeai Wofiil yooi zu.

11 Woilo dòun anzanu, wɛlɛ, è woilo,

yeema ɗa-nuɓusɛiti ma, ta è-ɠɛɛ ná-pɛlɛyeɠei.

12 Ɗa-ʋadai nɛa masagi ʋɛ,

tɔɔzei tɔ ɠa é ga è-maliɠii, nɔkɔ tɔun bu.

13 Tiil yooi zu nuiti, nuɓusɛiti ti wola ɓɛtɛai,

naati ta ɗa-ɓɔbai ɠaiziɛ, faanɛɛi ʋɔ ta kɛ è ʋɛ.

14 Anzanu loin maazogai masagi ʋɛ, toɠa volozu masa pɛlɛi wu,

ma zeɠei zuʋuʋɛ ga zanugi.

15 Ta liizu la masagi ʋɔ, é seɠe zuʋuai zu.

Anzalopo ɓulugi ʋilɛgai polu, ti ʋa ga tiye è ʋɔ.

16 Ti lɔ masagi ná-pɛlɛi wu,

ga fɛti wuyeiti, koozunɛɛi zaama.

17 È-loun zunuiti ta zei, ti ɠɛ ga masagi, è ɠɛɛni potogi zu.

Ɗa ti zei ga kundiɠiiti zooi zu ná pɛ.

18 Nà è-laaseigi ɠula kɛlɛma, gè bo yeeɠɛɠalai pɛ su nuiti ma,

naa ɠa a kɛ, nuɓusɛiti ti è maamusɛ eyɛsu ɠɔ.