1 Davide ná-guyei. Guyei.

2 Ladalai ɠa zìimaʋɛ, ee, GALA!

Nà guyei loo, gè è maamusɛ ga zìimaʋɛ pɛ.

3 À wuzeɠe, wa ʋe, nà-kɔnigi ta nà-papai!

Nà geelaalaosuʋɛ maaloɠa.

4 Nà è maamusɛ ziiti pɛ saama, ee, Ɠɔoɠɔ GALAGI.

Nà guyei loo è ʋɛ zii ɠiligiti saama.

5 Mazɔlɔɔ ɗa-nuɓɔɠɔlai ɓudɛʋɛ geeɠɔlɔgi maazu,

ta ɗa-wooɠɛɠiladai tonaɓiingiti maazu.

6 Ee, GALA, è wɔɔlɔ ʋelei lɛ geeɠɔlɔgi maazuʋɛ!

Ɗa-lɛbiyai volo eteai zu ná pɛ,

7 naa ɠa a kɛ, niiti è ti nɛai ʋɛ, naati ti unmɔɔ.

Kizogi wo ga è-yeezai, gòoɠaaʋote.

8 GALA ge ɓɔɛni seizu ɲadegai, é ɠɛ ma: «Pilɛ sɔlɔɔ nui ɠa é ga ze!

Nà Sikɛme ɠaaɠwɛ su, gè Sukɔte nɛmɛi ɠaaɠwɛ.

9 Galaade ɠa ga nɔ̀nɔ, Manasé ɠa ga nɔ̀nɔ,

Efelayime ɠa ga kɔɔɠɔ wɔɔlɔgi ùnba,

Zuda ɠa ga nà-masa tukpɔi.

10 Moaɓe ɠa ga kokoi, nii gè maagbazu su,

nà-saʋala pilisuʋɛ ɠa ga Edɔme yooi.

Nà pilɛ sɔlɔɔ kpeei loozu Filisiti nuiti ta-yooi laalɔɠɔma.»

11 Ɓɛ ɠa a li ga ze taa wolai zu, nii siɠigi ma?

Ɓɛ ɠa a li ga ze Edɔme?

12 Ee, GALA, ɗa laade ɓaa, è ɠɛa ɠɛlɛni gi ʋa?

Ee, GALA, siɛgi zu gá-ɠɔɔɠɔ nuiti ti ɠɛni ɠulazu la, è la mɔ ɠɛni ʋilɛsu ti ʋolu.

13 Ɓɔ gi ʋa gi zili nuiti daalɔɠɔma,

mazɔlɔɔ nuɓusɛiti ta-ɓɔbai ɠa nɔ ga wafuun faa.

14 Ni GALA ka ade ʋa, ada pilɛ sɔlɔɔ,

mazɔlɔɔ tɔ ɠa é ade zili nuiti dɛɛvɛzu.