1 Ɠɔoɠɔ GALAGI nɛɛʋɛ bɛ̀, mazɔlɔɔ toɠa ɗa gòoi mɛni,

siɛgi zu gè maanɛɛnɛzu la.

2 Tɔɔzei goilogɛ gòoi ma,

nà yɛ wooɠulazu ma yeenɔpɛ, sìi ma voloi pɛ su.

3 Saai ma ɠaluiti ti ɠɛa veleveleni mà,

gɔvɛalaazu vaiti ma yiizoolɛiti ti ɠɛni mà,

gè zeelini kidaaʋiligi ta ziizoolɛi ɠwɛgi ma.

4 Kɛlɛ gè wooɠulani Ɠɔoɠɔ GALAGI ma, gè ɠɛ ma:

«Nà è maanɛɛnɛzu, Ɠɔoɠɔ GALAGI, zɛ̀nvui ɠizo!»

5 Ɠɔoɠɔ GALAGI ɠa ɗa nuɓɔɠɔlai ɠɛ, sɔlegɛ,

ada-ƓALAGI ɠa ga maawɔinɠa ƓALAGI.

6 Ɠɔoɠɔ GALAGI ɠa ɗa naati makɛ, niiti ti la dɛ faa mɔinmɔin kwɛni,

tɔ ɠa é kìzoni, siɛgi zu màawɔinni la.

7 Zìi, ɠaaɠale ma ɗa-yiilɛigi zu,

mazɔlɔɔ Ɠɔoɠɔ GALAGI faanɛɛ ɠɛɛʋɛ è ʋɛ.

8 Ungo, Ɠɔoɠɔ GALAGI, è ùnmɔɔni, è kùla saai ya,

è gàazuɗɛiti kpale,

è kɔ̀ɠɔiti seɠe too ʋelei ma.

9 Nà yɛ ziɛzu fulu nuiti ta-eteai tɛi su,

Ɠɔoɠɔ GALAGI ɠaazu.

10 Ìɲɔ ge la ɠɛni leʋeni, anɛɛ siɛgi zu gè ɠɛni ɠɛɛzu ma la:

«Màawɔinɗa gola!»

11 Nà-ziiɓɔlɔi zu, gè ɠɛni ɠɛɛzu ɓɔɠɔ ma:

«Nui kpein ka ga zɛɛ nu!»

12 Leeni ɠa nà zoo gè kɛ Ɠɔoɠɔ GALAGI ʋɛ,

ná-faanɛɛi kpein faa zu nɔ̀un tetema?

13 Nà pilɛ sɔlɔɔ ziawɔi lɛ geezu,

gè wooɠula Ɠɔoɠɔ GALAGI ma.

14 Nà nà-minazeɠegiti daazeeli, niiti gè ti ɠɛa Ɠɔoɠɔ GALAGI ʋɛ,

nà naa ɠɛ ná-nuɓusɛiti pɛ gaazu.

15 Ɠɔoɠɔ GALAGI ná-wooɠɛɠila nuiti saa vai ɠa ɗa ɠɛ gaazu ga faa ɓaa gola.

16 Ee, Ɠɔoɠɔ GALAGI, nà ga ɗa-wotiɠɛ zunui,

nii ɗa-wotiɠɛ anzanui sɔlɔɔgai!

È bà wɔinzeɠema ɠaluiti teʋea bà.

17 Nà faanɛɛ wuuɠwɛɛ zalaɠaiti kula è ʋɛ,

gè wooɠula è ma, Ɠɔoɠɔ GALAGI.

18 Nà nà-minazeɠegiti daazeeli, niiti gè ti ɠɛa Ɠɔoɠɔ GALAGI ʋɛ,

nà naa ɠɛ ná-nuɓusɛiti pɛ gaazu,

19 Ɠɔoɠɔ GALAGI ná-koizuʋɛti,

Zeluzalɛme laaʋeaiti saama.

À Ɠɔoɠɔ GALAGI maamusɛ!