1 Davide ná-guyei.

Ee, Ɠɔoɠɔ GALAGI, nà è maamusɛzu ga zìimaʋɛ pɛ.

Nà è lɛbizu ga guyeiti zɛɛ ɠalagiti gaazu.

2 Nà nɔkɔsu, gè ɠaaʋote è zei ʋɛlɛ ɲadegai ma,

gè è-laaseigi maamusɛ, ɗa-nuɓɔɠɔlai maaʋele ma ta ɗa-wooɠɛɠiladai,

mazɔlɔɔ è ɗa-minazeɠegi laazeeliʋɛ,

é ɓudɛ naa maazu, nii gi-ɠigi ɠɛni ba, é lo è ʋa.

3 Voloi gè wooɠulani la è ma, è gòoɠaaʋoteni,

è ìɲɔdɔɔni ʋolu, è zɛbɛi ve bɛ̀.

4 Eteai zu masagiti kpein ti è maamusɛ, Ɠɔoɠɔ GALAGI,

ta woilona è-laawooiti ma.

5 Ta ɠɛna guyei loa, ti Ɠɔoɠɔ GALAGI ná-kɛɛwotiiti maamusɛ, ti ɗa ɠɛ ma:

«Ɠɔoɠɔ GALAGI ná-lɛbiyai wɔɔlɔʋɛ.»

6 Ɠɔoɠɔ GALAGI maaɠoozaʋɛ geezuʋɛ,

kɛlɛ toɠa ɓɔɠɔmaayei nuiti kaazu.

Toɠa yɛsu ɠoozama, é waso nuiti kwɛɛ.

7 Ni nà ɠɛna ziaa kidaaʋiligi zaama,

ɗa zobogi veezu bɛ̀, gè zɛnvui wo.

Ɗa pele ɓesasu sìli nuiti ta-yiiɠulagi luɠɔ.

Ɗa kìzosu ga è-zɛbɛi.

8 Ɠɔoɠɔ GALAGI ɠa faiti pɛ unseizu bɛ̀ ga pagɔ.

Ee, Ɠɔoɠɔ GALAGI, ɗa-wooɠɛɠiladai ɠa yɛsu ná ɠɔ!

Mina ɠɛlɛ naati ba, niiti è ti ɓɛtɛai ga è ɓɔɠɔ yeeiti.