Guyeiti 141

Màliɠii, makɛ dàawooiti ma

1 Davide ná-guyei.

Ɠɔoɠɔ GALAGI, nà wooɠulazu è ma, ʋa fala, è ɓɔ bà.

Woilo gòoi ma, siɛgi zu gè wooɠulazu la è ma.

2 Nà-maanɛɛnɛ wooi zɔle é lɛ è ʋɔ bɛ,

eɠɛ ansanse gala luului,

zèeiti ti maale è ma, eɠɛ kpɔkɔ zalaɠai.

3 Ɠɔoɠɔ GALAGI, wɛlɛ dàaʋɛ ma, è ɠaaɓa mà,

dàkɔlɔgiti ma ʋɛlɛlaʋɛti makɛ.

4 Mina ɓe bà, gè ʋa li ga faa ɲɔi ʋɔ pelei,

naa ɠa a kɛ, gè mina yaava ɠɛɛwotii ta ɠɛ

nui naati saama, niiti ti telebotalai ɠɛɛzu.

Màkɛ, gè mina naama laamii ta wo ti zaama.

5 Nà va bu telebo nui dòɠa, toɠa ná-nɛɛbɛi lɛɛzu ga ze,

ɓaa é zeliiti to mà, naa ɠa ga gulɔ ʋagɔi nɔ̀ungi zu, nii gè la ɠɛlɛa ba.

Kɛlɛ nà-maanɛɛnɛ wooi ɠa faa ɲɔu ɠɛ nuiti ta-vaa ɲɔi laalɔɠɔma ʋolu yee ná nɔpɛ.

6 Ta-ɠundiɠiiti ti ʋili ya fasaiti ma,

nu ɲɔiti ta gaaɠa niina, ga kpɔ̀ɛ wooiti pagɛ.

7 Eɠɛ nu a ɠɛ wozawolizu, é ɗa zooi laaʋali,

ti-ma ɠaeiti ta vazasu gɔvɛalaazu ɠakalaʋɛ.*141:5-7 Eɓulu woo zɛʋɛi zu, puuzui niiti ti la wola ɠoleni.

8 Ee, Ɠɔoɠɔ GALAGI, Màliɠii,

è ʋɔ pelei ɠa gè ɠaaʋotegai ná,

nà lɔɔɠuzu ɠaiziɛzu è ʋɔ bɛ.

Mina yee zeɠe zɛ̀nvui maazu.

9 Makɛ mà, è kìzo telebotala nuiti ta-ʋaliiti ma

ti ti laai tùɠɔ, ta ta-yaavaiti.

10 Faa ɲɔu ɠɛ nuiti ti loo ti ɓɔɠɔ ʋaliiti ga,

ti ʋoola bà naama ziɛgi nɔ zu.