Guyeiti 142

Ɗa ɠa è ga dɔ̀ɔɠuzu ɠila kpegi

1 Davide ná-kidafaawui. GALA falii é boni, siɛgi zu é ɠɛni pugi zu la.

2 Nà wooɠulazu Ɠɔoɠɔ GALAGI ma ga kpee wooi,

kpee wooi ɠa gè Ɠɔoɠɔ GALAGI maanɛɛnɛzu la.

3 Nà kpàla vai lɛɛzu la,

gè nà-kidaaʋili fai lɛɛ la.

4 Nà ʋalana zɛbɛi ma, ɗa ɠa è kwɛɛ ʋɛ gè liizu ná.

Ti balii laa nà-pelei zu ga kɛɛɠɛɛi.

5 Wɛlɛ ga zèezazu ʋelei:

Nu nɔpɛ ge la mɔ ná, nii é kwɛ̀ɛ.

Gè la kwɛɛ ʋɛ nà lɔɔɠu ná,

nu nɔpɛ ge la yiizoolɛzu ga zɛ̀nvui ma vaa.

6 Ɠɔoɠɔ GALAGI, ɗa ɠa gè kpee loozu è woizu,

Gè ɠɛ ma: «Ɗa ɠa è ga dɔ̀ɔɠuzuʋɛ,

ɗa ga zìima anii, fizɔgai bɛ̀, eteai nii zu ʋɛ gi zɛnvui wosu ná.»

7 Woilo nà-kpee wooi ma,

mazɔlɔɔ fikɛ nɔpɛ ge la mɔ sù.

Ùnmɔɔ, è kùla naati zea, niiti ti wɔ̀inzeɠezu.

Ti zuɓaaʋɛ, ta-zobogi wɔɔlɔ nɔ̀nɔi ʋa.

8 Fìe, è kùla kasoi ɠa,

nii a kɛ gè è-laaseigi maamusɛ.

Telebo nuiti ta ʋa, ti màaɠooli,

siɛgi zu è faanɛɛi naa ɠɛɛzu la bɛ̀.

Salmos