Salmos 143:8 | Versão GDZ

Màliɠii, mina tukpɔ ʋɛɛ bà

1 Davide ná-guyei.

Ee, Ɠɔoɠɔ GALAGI, woilo nà-maanɛɛnɛ wooi ma,

woilo nà-fali wooiti ma.

Gòoɠaaʋote deɠɛmu ɗa-wooɠɛɠiladai zu ta ɗa-lelebodai.

2 Nà ga ɗa-wotiɠɛ nui, mina tùkpɔɠaaleʋea,

mazɔlɔɔ fulu nu ɠila kpalaa ge la leleboni è ɠaazu.

3 Sìli nui ɠa pòlu, é la ɓɔlɔzu,

é dà zooi ma, ga é ɠɔɠɔlo mà,

é sèi kpidii zu ga naati kɛʋele niiti ti zaai kaite.

4 Zɛ̀nvui ɲiikpiga kòozu,

zìi ɠa loɠazu ga duai.

5 Nà ɠisiɛzu siɛgiti su ti leʋegai,

gè ɠisiɛ naati kpein su, niiti è ti ɠɛɛni,

gè ɠida è-yeei ná-botii ɠɛ ʋeleiti bu.

6 Gè zèeiti maalega è ma,

nà ɓɔɠɔ ɠaazu è ɠakala, eɠɛ zooi fɔai.

Lo!

7 Ee, Ɠɔoɠɔ GALAGI, ʋa fala, è gòoɠaaʋote!

Zɛ̀nvui zeelia ɠwɛgi ma.

Mina ʋoluave bà,

gè ʋa ɠɛ ga naati kɛʋele, niiti ti ti-zaa ɠizei lɛɛzu niina.

8 Geelaa ɠa laona nɔ feya, ɗa-wooɠɛɠiladai lɛ ga ze,

mazɔlɔɔ ɗa ɠa dàai è la.

Pelei lɛ ga ze, nii maanɛai gè ziɛ la,

mazɔlɔɔ gè ɠaaʋotega è ma.

9 Ee, Ɠɔoɠɔ GALAGI, ùnmɔɔ, è kùla sìli nuiti zea,

nà lɔɔɠuzu è ɠobaʋɛ.

10 Kàla ga è-yiimai ɠɛɛ vai,

mazɔlɔɔ ɗa ɠa è ga nà-GALAGI.

Ɗa-Yɛnvu ʋagɔi lo tùɠɔ zooi zu, ʋɛ faaɓa la ná.

11 Ee, Ɠɔoɠɔ GALAGI, zɛ̀nvui makɛ, è-laaseigi wɔɔlɔ vai zu,

Ɗa-lelebodai maaʋele ma, ùnmɔɔ, è kùla kidaaʋiligi zu.

12 Ɗa-wooɠɛɠiladai ʋɔ, sìli nuiti daaɠulu.

È naati undaaʋili, niiti ti wɔ̀inzeɠezu,

mazɔlɔɔ nà ga ɗa-wotiɠɛ nui.

Bíblia Online