1 Davide ná-guyei.

Ee, GALA, màkɛ! Mazɔlɔɔ nà lɔɔɠuzu è ʋɔ bɛ.

2 Nà ɗa ɠɛ Ɠɔoɠɔ GALAGI ma: «Ɗa ga Màliɠii,

ɗa ga nà-undaanɛɛi, taɠili nɔpɛ ge la ná, a ùndaanɛ!»

3 Nu ɲadegaiti ti zooi zu,

tiya ɓɔɠɔi, ti ga nu wolaiti, naati ka nà ɗa unfe ti ma.

4 Taɠiligaa ta undaanɛɛi ɠaiziɛzu gala kiligiti zea,

ta ta-ɓɔlɔi mɔinzu ɓɔɠɔ ma.

Gè la ta-ʋuya zalaɠa ɠula, nii é ga ɲamai,

gè la ti-laasei boga ga dàkɔlɔgiti.

5 Ɠɔoɠɔ GALAGI ɠa é ga nà-kulanumai, ta nà-undaanɛɛi,

poganii nii gè sɔlɔɔgai, ɗa ɠa è ɓaazu maazu.

6 Gè nɔ̀nɔ ma ʋoganii zɔlɔɔga, nii fizɔgai,

toɠa bɛ̀ ga poganii, é kòozunɛɛzu.

7 Nà Ɠɔoɠɔ GALAGI mamasu, nii é tɛ̀nɛsu.

Zìi ɓɔɠɔi ɠa ɗa gàanɛɛnɛ kpidii.

8 Gàazu logɛ Ɠɔoɠɔ GALAGI ʋa yeenɔpɛ, mazɔlɔɔ toɠa kòbaʋɛ,

nii a kɛ gè mina ɲiikpi eyɛsu pɛ.

9 Naa ɠa é ba, zìi ɠaanɛa, zɛ̀nvui ɗa ɠoozunɛ,

kpùsɛi ɓɔɠɔi ɠa looɠosu, makɛgai kitogi zu.

10 Mazɔlɔɔ è la ɠɛlɛa bà, gè ʋa yɛ gɔvɛalaazu,

è la vaa bu ɗa-wotiɠɛ nui, é ga wooɠɛɠila nui, é ʋa yei zeɠei zu.

11 Ɗa zɛnvu ʋelei lɛ ga ze,

koozunɛ wolai ɠa è ɠakalaʋɛ,

ta ɠɔoɠɔ undaanɛɛi è yeezazuʋɛ.