1 Guye loo ɠundiɠii nɔnɔi ʋe. Davide ná-guyei.

2 Ɠɔoɠɔ GALAGI è wooɠaaʋote è ɠidaaʋili foloi!

Zakɔɓe ná-GALAGI laaseigi è makɛ!

3 É ɗa-ɓɔbai leʋe è ma, é zeɠe seizu ɲadegai,

é yɛ Siyɔn é yeezei è wu.

4 É ɠizɛ ɗa-vebɛaniiti kpein su.

É yeezei ɗa-zalaɠaiti bu ti ɠalazu.

Lo!

5 É è yiima vai ɠɛ è ʋɛ,

é naati daazeeli, niiti è pɔ è ti ɠɛ!

6 Gá wooɠula ga koozunɛɛi ɗa-zobo sɔlɔɔ fai zu,

gá gá-ƓALAGI ná-ɗalapoi lɛ geezu,

Ɠɔoɠɔ GALAGI ɠa naa kpein kɛ, nii è falizu ma.

7 Gè kwɛɛ niina, ga Ɠɔoɠɔ GALAGI zee ɠa ná-masagi ʋa, nii é gulɔ ɲadegai ziɛni ma,

toɠa yɛ ná-ada ɲadegai geezuʋɛ, é gooɠaaʋote,

é unmɔɔ, zeezazu ɓɔba wolai ʋɔ.

8 Tanigaani zee ɠa ta-ɠɔɔɠɔ wotoloiti ma,

tanigaani zee ɠa ta-zooiti ma,

gɔun gá, gá-ɠitogi ɠa ga ɗe, Ɠɔoɠɔ GALAGI, gá-ƓALAGI.

9 Tiya mu ta ɓilisu ti loo,

gɔun, gá yɛsu loni, gi lo kpaan.

10 Ɠɔoɠɔ GALAGI, zobogi ve gá-masagi ʋɛ!

É zoo é gi wooɠaaʋote, siɛgi zu gi wooɠulazu ma la, ga é ɓɔ gi ʋa!