1 Davide ná-guyei.

Ee, Ɠɔoɠɔ GALAGI, tukpɔi lo bɛ̀!

Mazɔlɔɔ nà nà-eteai ziɛzu peelalazu nɔpɛ ge la bà.

Nà ɠalivaazu Ɠɔoɠɔ GALAGI ma, gè la ɲiikpiga eyɛsu pɛ.

2 Fɛ̀ɠɛlɛfɛɠɛlɛ, Ɠɔoɠɔ GALAGI, pòluɠula,

è zìi ʋɛtɛ, ta nà-kisiɛiti.

3 Mazɔlɔɔ gàazu ɠa ɗa-nuɓɔɠɔlai ʋa,

nà nà-eteai ziɛzu, eɠɛʋelei ɗa-wooɠɛɠiladai la.

4 Gè la liizu gè ʋa zei yaava nuiti koba,

gè la woovele nuiti seizeisu.

5 Niiti ti faa ɲɔi ɠɛɛzu, naati ta-maaɓɔgi wɔinzeɠeʋɛ mà.

Gè la zeizu suɲɔu nuiti koba.

6 Nà zèeiti gaagbazu sɔbalalai zu,

ee, Ɠɔoɠɔ GALAGI, nà latisu ɗa-zalaɠa ɠulazuʋɛ ma,

7 gè mama gooiti bo,

gè ɗa-vaanɛɛiti kpein bo.

8 Ee, Ɠɔoɠɔ GALAGI, è-zeizuʋɛ nɛɛʋɛ bɛ̀,

ʋɛ ɗa-lɛbiyai zeini ná!

9 Mina sò ga nu ɲɔiti kɛʋele,

mina zɛ̀nvui zeɠe ga nu ʋaa nuiti kɛʋele!

10 Ti-yeeiti dɔɔʋɛ faa ɲɔi zu.

Ti ɓɔɠɔ yɛgɛna ti ti ɠeya ga lobɛanii.

11 Nɔ̀un, nà ziɛzu nà-telebodai zu,

ùnmɔɔ, è zaalai la mà!

12 Kɔ̀ɠɔi ɠa loni sɔledai zu,

nà Ɠɔoɠɔ GALAGI mamasu maaɓɔgi zu.