Salmos 29

Ɠɔoɠɔ GALAGI laawooi

1 Davide ná-guyei.

GALA ná-geezuɠeelaiti, à Ɠɔoɠɔ GALAGI maamusɛ,

wo ná-zɛbɛi ta ná-lɛbiyai ɠula kɛlɛma!

2 Ungo, à Ɠɔoɠɔ GALAGI laaseigi ma lɛbiyai maamusɛ,

wo nɔkɔ tɔun bu, maaɠiliai ga seɠe ɲadegai!

3 Ɠɔoɠɔ GALAGI wooi ɠa ɠulazu ziɛiti maazu,

lɛbiya ƓALAGI ɠa tona ɓunɛ tugi ɠulazu.

Ɠɔoɠɔ GALAGI wooi ɠa ɓudɛzu ziɛ wolaiti gooi maazu!

4 Ɠɔoɠɔ GALAGI wooi ɠa ɠulazu ga keɠaaɓa!

Ɠɔoɠɔ GALAGI wooi ɠa ɠulazu ga masa gooi!

5 Ɠɔoɠɔ GALAGI wooi ɠa sɛdele guluiti galeɠalezu,

Ɠɔoɠɔ GALAGI ɠa Liɓan sɛdele guluiti koloɠolosu,

6 toɠa Liɓan ɠizeiti kpizɛzu eɠɛ nikɛ ɓokpagiti,

ta Siliyɔn ɠizei eɠɛ teɠu ɓokpagi.

7 Ɠɔoɠɔ GALAGI wooi ɠa mainmain ɠulazu.

8 Ɠɔoɠɔ GALAGI wooi ɠa ɗa teʋebai zuɲiikpi.

Ɠɔoɠɔ GALAGI ɠa ɗa Kadɛse teʋebai zuɲiikpi.

9 Ɠɔoɠɔ GALAGI wooi ɠa ɗa ɠɛ ga zaɓui dopaiti ti yiʋoi ʋu.

Toɠa ɗa dɔɓɔi zuwolo.

Ná-masa pɛlɛi wu ti pɛ ta ɗa wooɠula, ti ɠɛ ma: «Lɛbiyai ɠa bɛ!»

10 Ɠɔoɠɔ GALAGI ɠɛni masadai ɠɛɛzu, ziɛve golai ʋaa ziɛgi zu.

Ɠɔoɠɔ GALAGI ɠa masadai ɠɛɛzu eyɛsu ɠɔ.

11 Ɠɔoɠɔ GALAGI ɠa zobogi ve ná-nuɓusɛiti bɛ.

Ɠɔoɠɔ GALAGI ɠa tuya loo ná-nuɓusɛiti bɛ, é ziilɛigi ve ti ʋɛ.