1 Davide ná-kidafaawui.

Undaanɛ nu ɠa ga naama nui, nii ná-tɔ koloɠologiti maavaayɛgai,

ná-kotoiti suvaayɛgai!

2 Undaanɛ nu ɠa ga naama nui, nii Ɠɔoɠɔ GALAGI la ná-faaɠaaza golai levezu unma,

nii yaava vaa la ziimaʋɛ!

3 Siɛgi zu gè maaɠɛni la kpɔ nà-kotoi ma, mà ɠaeiti ti ɠɛni ɠalazu.

Gè ɠɛni kpeei loozu foloi laawu ɲɛgɛlɛin.

4 Mazɔlɔɔ è-yeei ɠa wuizu mà, folo ʋɛɛ kpidi ʋa,

sùvikɛi vɔɔni eɠɛ foɠoi.

Lo!

5 Gè nà-kotoi lɛɛni ga ɗe,

gè la nà-faaɠaaza golai maalɔɔɠuni.

Gè ɠɛni ma: «Nà laazu zɔ ga Ɠɔoɠɔ GALAGI ʋɛ, ga nà-tɔ koloɠologiti.»

Ɗɔun ɗa, è nà-kotoi ma ɠasɔi zeɠeni ùnma.

Lo!

6 Wooɠɛɠila nuɓusɛi kpein ge è vali ɠana, yeeɠɛɠala ʋagɔi zu.

Ni ziɛve golaiti ta ɠulana, ti la zeelia ma pɛ.

7 Ɗa ga dɔ̀ɔɠuzuʋɛ,

ɗa màkɛsu kidaaʋili foloi.

Nà wooɠula ga koozunɛɛi, tɔɔzei è màaɠoolia ga ɗa-ɓaamaazui.

Lo!

8 È ɠɛni ma: «Nà è ɠalasu, gè pelei lɛ ga ɗe, nii ɗa ziɛ la.

Nà è lɛnɛ, gàazu ɠa yɛ è ʋa.

9 À mina ɠɛ ga sooi ɠɛʋele, ɓaa soovale fuului nii ɠi ge la ma,

nii nu a ɗa ti ɠili ga galui, ɓaa kalafei, ti maaɠilizu la,

nii a kɛ ti maaɓuɠa è ʋa.»

10 Taɓa mɔinmɔin ka ɗa zeeli faa ɲɔu ɠɛ nui ma,

kɛlɛ nuiti ti ɠigi logai Ɠɔoɠɔ GALAGI ʋa,

naati maaɠooliʋɛ ga ná-wooɠɛɠiladai.

11 Telebo nuiti, à ɠoozunɛ Ɠɔoɠɔ GALAGI ʋɔ!

À wooɠula ga koozunɛɛi, wɔiti wo yiimaʋɛ zɔlegai.