1 Guye loo ɠundiɠii nɔnɔi ʋe. Ɠɔoɠɔ GALAGI ná-botiɠɛ nui Davide ná-guyei.

2 Nà ɗa ɠisiɛ zìimaʋɛ naa zu,

nii faa ɲɔu ɠɛ nui bosu ná-tɔ koloɠologi zu,

GALA gaazuluabai la gaazu ga faa nɔpɛ.

3 Mazɔlɔɔ daaʋɛ ɓɔɠɔ la gola ná-sɔle fai zu,

é la zooga é ʋa ná-faaɠaaza golai ɠwɛɛ, é ʋa wɔinzeɠe.

4 Kpɔɛi niiti ti ɠulazu daaʋɛ, ta ga zɛɛi ta yaavai nɔ.

Toɠa ɠɛlɛzu faa yɔɠɔzuɠaa vai ʋa ta faa ʋagɔi.

5 Toɠa ɗa ɠisiɛ yaavai zu, a ɠɛna laani ná-betei zu,

toɠa ziɛzu pelei zu nii é la ʋani,

é la faa ɲɔi ʋilisu ya.

6 Ɠɔoɠɔ GALAGI, ɗa-nuɓɔɠɔlai wɔɔlɔʋɛ geeɠɔlɔgi ʋa,

ɗa-wooɠɛɠiladai zeeli tonaɓiingiti ma.

7 Ɗa-lelebodai ɠaaɠoozaʋɛ, eɠɛʋelei gize ɠaaɠoozagiti ti la,

ɗa-leveiti kpoma ɠoozaʋɛ, eɠɛʋelei kpoloɗɛiti buuzeiɗai la,

ee, Ɠɔoɠɔ GALAGI, ɗa ɓaazu nuiti maazu ta suaiti.

8 Ee, GALA, ɗa-wooɠɛɠiladai wola ʋagɛ!

Nuɓusɛiti ta lɔɔɠuzu è-ɠoʋegiti ma niinigi wu.

9 Ɗa ɗa-ʋɛlɛi wu vaaɓɔɠɔi ɠɛɛzu ti ʋɛ, ta sɔlɔɔ é ʋooʋa ti ma,

ti ɓɔɔle ga ɗa-nuɓɔɠɔlai ma ɗɛ wola ʋagɔi.

10 Mazɔlɔɔ zɛnvu ɗɛungi ɠa è ɠobaʋɛ nɔ,

ɗa-wozakalagi ʋɔ, gá wozakalagi ɠaazu.

11 Ɗa-wooɠɛɠiladai makɛ è ɠwɛɛ nuiti bɛ,

ta ɗa-lelebodai ɓalaa naati bɛ niiti ti-yii zɔlegai!

12 Waso nuiti ti mina ɠɔɠɔlo mà,

faa ɲɔu ɠɛ nuiti ti mina kpɛ̀ ga ti-yeei!

13 Wɛlɛ, niizu niiti ti telebotala vai ɠɛɛzu, ti loa,

ti loka, ti la zooga ti ʋa wuzeɠe.