Salmos 39:4,5 | Versão GDZ

Saai ɠakala

1 Guye loo ɠundiɠii Yedutun nɔnɔi ʋe. Davide ná-guyei.

2 Gè ɠɛni ɠɛɛzu ma: «Nà daazu ma kpɛ ga sìɛ ʋeleiti,

gè ʋa koto ɠɛ kpɔ̀ɛ wooiti su.

Nà yeeʋɛɛzu la,

ni nɔ dɛ faa ɲɔu ɠɛ nui ɠa tùɠɔ.»

3 Gè ɓɔɠɔ lɔɔni maaɠɛkpɔ golai zu,

gè la woo ɠila kpalaa boni.

Nà-taɓai wola zuwɔɔlɔni.

4 Zìi ɠɛni zoolɛzu kòozu,

zɛ̀gɛ kpalagi wosu, abui ɗa zo,

wooi ʋaani kìsu, gè ɓɔɛ, gè ɠɛ ma:

5 «Ɠɔoɠɔ GALAGI, nà-eteai ɠaaɓelagi lɛ ga ze,

sìi ma voloi liegɔi,

naa ɠa a kɛ gè kwɛɛ ʋelei sìi zuɓuɠaai la.

6 Wɛlɛ, nà-foloiti kwɛteʋeʋɛ, ta ga zeelo gilagi liegɔi.

Sìi zuɠooza ʋelei la è ɠaazu ga ani nɔpɛ.

Ungo, nui kpein é loni, toɠa è ɠaazu ga fiilɛi nɔ.

Lo!

7 Ungo, nui ɠa ziɛzu eɠɛ niinigi,

é ɗa ɓɔɠɔ ɲiikpi, kɛlɛ toɠa ga fiilɛi.

Toɠa ani ʋagɔiti gaalɛɛzu ba,

kɛlɛ é la kwɛni, ɓɛ ɠa é ʋaazu ti yɛʋɛzu.

8 «Niizu, Màliɠii, leeni ɠa nà ɠito ba niina?

Nà-kitogi ɠa ɗa nɔ è ʋa.

9 Ùnmɔɔ, è kùla nà-tɔ koloɠologi kpein su!

Mina va bu, ɠimalala nuiti ti ʋa dɔ̀ ɓaaɠulamai zu!

10 Nà maaɠɛsu kpɔ, gè la laalaosu,

mazɔlɔɔ ɗa ɠa è tii ɠɛɛzu.

11 Ɗa-ɓakɔiti maaɠooza bà.

È-yeei a ɠɛna dòɠaa, nà loozu.

12 Ni a kɛ è nuiti maaɠolo, ɗa ti loɠazu ta-vaaɠaaza golaiti faa zu,

è ti nɛɛbɛ aniiti koloɠolo eɠɛ fɔfɔi.

Ungo, nui kpein ka ga fiilɛi.

Lo!

13 «Ee, Ɠɔoɠɔ GALAGI, woilo nà-maanɛɛnɛ wooi ma,

woilo nà-kpee wooi ma!

Mina woizuɓɔlɔ nà-gɔlɔ wooiti tuɠɔ!

Mazɔlɔɔ nà ga wɛɛn è ʋɔ bɛ,

gè ɠɛ ga seikɔɠɔma nu,

eɠɛʋelei mɛ̀mɛwolani ti ɠɛni la.

14 Ɠaazu lati, è seɠe bà, ga gè undaanɛɛ zɔlɔɔ,

aisa gè ʋa li, gè ɲɛɛlɛ!»