1 Guye loo ɠundiɠii nɔnɔi ʋe. É loozu ga kɔnigiti. Davide ná-guyei.

2 Siɛgi zu gè wooɠulazu la è ma, gòoɠaaʋote,

GALAGI nii é ga nà-telebodai.

Kidaaʋiligi zu, ɗa ìɲɔdɔɔzu.

Zaalai la mà, è woilo nà-fali wooiti ma.

3 Wɔi wo ga nuiti,

wa yɛsu nà-lɛbiyai maaɓoozu, eyɛsu yeelɛ?

Wa yɛsu faa ɲakai nɛɛzu ʋɛ,

wo ɗa zɛɛi ɠaiziɛ, eyɛsu yeelɛ?

Lo!

4 À suɠwɛɛ ga Ɠɔoɠɔ GALAGI yiimazeɠeʋɛ ga zunu ɠila, nii é ga wooɠɛɠila nu tɔun bɛ,

toɠa ɗa gòomɛni, siɛgi zu gè tolisu da.

5 Wa yiiɠaawanana, à mina koto ɠɛ.

À kisiɛi wo wa-ʋetei zu, wo maaɠɛ kpɔ.

Lo!

6 À zalaɠaiti kula, niiti ti zoloogai tɔgi ma,

à ɓɔɠɔ ɠaliva Ɠɔoɠɔ GALAGI ma.

7 Naati mɔinʋɛ, niiti ti gaazaɠagi wosu ga: «Mini ɠa gá-undaanɛɛi ʋaazu, é zeɠe ná?»

Ee, Ɠɔoɠɔ GALAGI, è-ɠaazuʋɛ ma wozakalagi lo gi ʋa!

8 Ɗa koozunɛɛi ʋuuzu zìimaʋɛ,

é leʋe ta-molo leʋe ziɛgi zu ʋa, ta ta-lɔɔ niinɛi ʋu ziɛgi zu ʋa.

9 Nà laana nɔ feya, nà ɲi ziilɛigi zu.

Mazɔlɔɔ ɗa ɠila kpe, Ɠɔoɠɔ GALAGI,

ɗa sèizu ziilɛigi zu.