1 Guyei. Kolé mavofodaiti ta-wuyei.

2 Ungo, Ɠɔoɠɔ GALAGI wɔɔlɔʋɛ, toɠa maamusɛi kpein soloogai ma,

gá-ƓALAGI ná-taazuʋɛ, ná-gize ɲadegai ma.

3 Gize maanɛɛgi, nii é eteai pɛ koozunɛɛzu,

Siyɔn gizei, nii é ga GALA seizuʋɛ,

masa golai ná-taai!

4 GALA ka ɓɔɠɔ lɛɛzu, eɠɛ siɠi gaaɠoozagi,

Siyɔn masa pɛlɛi wu.

5 Mazɔlɔɔ wɛlɛ, masagiti ti ɓɔɠɔ ɠaani,

ti liini ʋɔɔma Siyɔn laalɔɠɔma.

6 Ti wɛlɛni, ti laavɔ,

ti ɠoozuʋilini ti ʋela.

7 Ti zasuɓalini náʋɛ nɔ,

eɠɛ taɓai nii a ɗa anzanui zo a ɠɛna doin zɔlɔɔga.

8 Eɠɛ folo ɠulazu ʋele viilɛi,

é Taalasise ɓato wolaiti koloɠolosu.

9 Nii gi mɛnini, gi naa ɠa gá ɓɔɠɔi

Ɠɔoɠɔ GALAGI ná-taazuʋɛ, Fai-Pɛ-Maliɠii, gá-ƓALAGI ná-taazuʋɛ,

GALA ka sasulɔ eyɛsu ɠɔ.

10 Ee, GALA, gá ɠisiɛzu ɗa-wooɠɛɠiladai zu,

è zei ʋɛlɛi wu.

11 Ee, GALA, è lɔɠɔɠulaa,

ɗa-maamusɛi zeelia zou ɓela ga,

è-yeezai laavegɛ ga telebodai.

12 Koozunɛɛi ɠa Siyɔn gizei ma,

Zuda yooi zu laaiti ta ɠoozunɛɛzu,

ɗa-lukpɔɠaaleʋe vaiti maaʋele ma.

13 À Siyɔn maalati, wo ziɛ koozuʋɛ,

wo ná-pɛlɛ ɠaaɠoozagiti gaalu,

14 à ná-siɠigiti pɛtɛ,

wo wɛlɛ dɔɔɠuzuʋɛ ma ʋɛlɛiti ba,

wo ʋa bo yamanii zu nuiti ma, ti ʋaazu.

15 Wɛlɛna GALAGI ʋa,

nii é ga gá-ƓALAGI eyɛsu ɠɔ.

Toɠa ɠɛ ga gá-lotuɠɔi eyɛsu saai.