1 Azafe ná-guyei.

GALA, GALA, Ɠɔoɠɔ GALAGI ɠa ɓɔɛzu, é ɗa eteai loli,

é zo folo ɠulazu, é li folo liizu.

2 É zo Siyɔn, taai naa fizɔgai pagi zu,

miná ɠa GALA ge volozu ná, é ɗa ɠula kɛlɛma adaʋɛ pɛ.

3 Gá-ƓALAGI ɠa ʋaazu, é la yɛga maaɠɛkpɔgi zu,

abui ɠa tuɠɔ, é ɗa galai wo,

maaɠooliʋɛ ga tɔngɔlɔ fiilɛi.

4 GALA ka geeɠɔlɔgiti tolisu ti maazu ʋelei,

ta zooi, ga ti ʋa ná-nuɓusɛiti tukpɔɠaaleʋe.

5 «À nà-lada nuiti gaalɛ ba bɛ̀,

ti minazeɠe bɛ̀ ga zalaɠai!»

6 Geeɠɔlɔgiti ta ná-telebodai lɛ,

mazɔlɔɔ GALA ka é ga tukpɔɠaaleʋe nui.

Lo!

7 «Nà-nuɓusɛi woilo, nà ɓɔɛzu è ʋɔ,

Izilayɛle, nà zeele wooi wosu è laalɔɠɔma,

nɛ̀i gè ga GALA, ɗa-ƓALAGI.

8 Ɗa-zalaɠaiti faa laade, gè ʋa ɠɛ zeliiti tosu da è ma,

ɗa-ɠala zalaɠaiti ta gàazu yeenɔpɛ.

9 Gè la nikɛ zinɛ zeɠezu ɗa-ʋɛlɛi wu,

anɛɛ bolia ɗa-logani makɛsuʋɛ.

10 Mazɔlɔɔ dɔɓɔ zuaiti kpein ta ga nɔ̀nɔ,

ta sua mɔinmɔingiti ti gizeiti ma.

11 Gè wɔniiti kpein kwɛɛ, ti gizeiti ma,

ta nii kpein é ɲiikpisu dɔɓɔiti su ta ga nɔ̀nɔ.

12 Ni pulu ɠɛni ma, gè la ɓena bo è ma,

mazɔlɔɔ eteai ɠa ga nɔ̀nɔ, ta nii dɔin é ʋuuni su.

13 Nà ɗa nikɛ zinɛi ma zuaiti mi ɓaa?

Nà ɗa boli ɲamaiti kpɔle ɓaa?

14 Nii ɗa kɛ ga zalaɠai bɛ̀, nɛ̀i gè ga GALA, naa ɠa ga faanɛɛ wuuɠwɛɛgai.

È ɗa-minazeɠegiti daazeeli bɛ̀, nɛ̀i gè Anii-Pɛ-Unda.

15 Wooɠula mà kidaaʋili foloi,

nà è unmɔɔ, ɗa lɛbiyai ve bɛ̀.»

16 GALA ge ɠɛ faa ɲɔu ɠɛ nui ma:

«Leeni ʋe mu! Ɗa nà-deveiti bosu ɠisu nɔ,

nà-minazeɠe gooi ɠɛ è-laaʋɛ,

17 ɗɛi è kalagi wɔinzeɠezu,

è dàawooiti pilisu ya è ʋoluʋelei!

18 Ɗa unma nui ɠaana, ɗa ɠɛɛzu ga naa ná-kpɔba nui,

wa ɓɔsu faa ɠilagi ma wa wɛɛnzo nuiti,

19 ɗa è-laaʋɛ lɔɔzu faa ɲɔi zu,

è-nɛgi ɠa yaavai ɓɛtɛzu.

20 Siɛgi zu wo zeizu la wa zɔiti,

ɗa vaazu è-ɠɛɛloin ma,

ɗa è-leeloin maaɓoozu.

21 «Wɛlɛna, naa ɠa è kɛɛni, gè maaɠɛ kpɔ,

è ɠisiɛni ga nà ga è ɠɛʋele,

kɛlɛ nà zeliiti tosu è ma, gè ti pɛ dɛɛ è ɠaazu.

22 À naa ɠaaɠa, wɔi wo yeemazu mà, nɛ̀i gè ga GALA,

à dama, gè mina wo ʋali ga, nu nɔpɛ ge la wo unmɔɔga.

23 Zɔi a ɠɛ zalaɠa ɠulazu, é kɛ ga faanɛɛ wuuɠwɛɛgai, naama nui ɠa dɛ̀bizu,

zɔi é ɠaaɓaazu siɛ ʋelei ma, nà, GALA, nà nà-kizo fai lɛɛ la.»