1 Guye loo ɠundiɠii nɔnɔi ʋe. Davide ná-guyei. 2 Siɛgi zu GALA goo wo nui Natan liini la Davide ʋɔ bɛ, pilɛgai ma Ɓate-Seɓa ʋolu.

3 Ee, GALA, màawɔinɠa ɗa-wooɠɛɠiladai maaʋele ma,

ɗa-maawɔinɠaa wolai ʋɔ, nà-tɔ koloɠologiti gaaʋa.

4 Gbà ga pagɔ, è kùla nà-faaɠaaza golaiti su,

ɲàde, è nà-kotoi zeɠe bà.

5 Mazɔlɔɔ gè nà-tɔ koloɠologiti kwɛɛ,

nà-kotoi ma ɠisiɛi ɠa kpɔ̀lɔzu yeenɔpɛ.

6 Ɗa ɠa gè kotoi ɠɛai è laalɔɠɔma, ɗa ɠila kpe è laalɔɠɔma,

nii ɲɔuɗai è ɠaazu, gè naa ɠɛɛni,

naa ɠa a kɛ, è ɠɛ ga sɔle nu ɗa-vaawogi zu,

zelii mina lo è ma, ɗa ɠɛna tùkpɔɠaaleʋea.

7 Wɛlɛ, sɔ̀lɔɔgɛ faaɠaaza golai zu,

kaite zɛ̀gɛ dèe ɠoozu, gè ɠɛ ga kotoba nu.

8 Kɛlɛ, gaamai é nui yiimaʋɛ, naa ɠa nɛai è ʋɛ,

ɠimalai lɛ ga ze zìimaʋɛ, ʋɛ ná lɔɔɠuai.

9 Ɲàde ga ɠizɔɔpe tufa ɓifɔgi,*51:9 Ɲàde ga ɠizɔɔpe tufa ɓifɔgi: Wɛlɛ ʋɛ: Lev 14:4. nà ɠole naazu,

gbà, nà ɠole kobe kolegi ʋa.

10 Koozunɛɛi ta ziilɛi fai wo mà,

kpùsɛi è suɓɔlɔkpɔlɔni, naa ɠa ɠoozunɛ.

11 Ɠaazuzeɠe nà-kotoiti ba,

nà-faaɠaaza golaiti gaaʋa.

12 Ee, GALA, zii ʋagɔi ɓɛtɛ kòozu,

kìgi niinɛ, è sei ʋele ɓɛtɛ sù.

13 Mina pìli ya, è ʋa màaɠooza,

mina ɗa-Yɛnvu Ɲadegai ɠula zèa.

14 Ɗa-ɠizo fai ma ɠoozunɛɛi ve zèa,

GALA, è-yiimaɠɛ ɠi pagɔi yeezei bù, é màkɛ.

15 Niiti ti ga tɔ koloɠolo nuiti, nà naati kala ga ɗa-ʋeleiti,

kotoba nuiti ta ʋa ʋolu è ʋɔ.

16 Ee, GALA, nà-kizo GALAGI!

Ùnmɔɔ, è kùla ɲama ʋuu vai nii zu,

nà guyei loo, gè ɗa-lelebodai ɠula kɛlɛma.

17 Màliɠii, dàkɔlɔgiti buzeɠe,

dàaʋɛ è maamusɛ.

18 Mazɔlɔɔ zalaɠai la ga è yiilɛi gani,

ni naa laade, nà la ta ɠula.

Gala zalaɠai la ga è yiilɛi gani.

19 Zalaɠa ɠila kpegi soloogai GALA ma,

naa ɠa é ga ɓɔɠɔmaayei ɠigi,

zɔi nimizaai, ziiɓɔlɔ,

ee, GALA, è la ɠɛlɛa naa ʋa.

20 Ɗa-nuɓɔɠɔlai zu, faa ʋagɔiti kɛ Siyɔn taa wolai ʋɛ,

Zeluzalɛme ná-siɠigiti to.

21 Naazu, è yiima zalaɠaiti ta ɠula,

ta gala zalaɠaiti, nii kpusɛi kpein ge ɠalazu.

Naazu, nikɛ zinɛiti ta ɠula ga zalaɠai, ɗa-zalaɠa ɠulazuʋɛ.