1 Guye loo ɠundiɠii nɔnɔi ʋe. Nii é loozu é zoloo guye wooi ma, nii daa ga: «Poopogi, gaayeiɗai, é lo zooiti ba, ti maaɠoozaai». Davide ná-guyei. Siɛgi zu Filisiti nuiti ti soni da Gate.

2 Ee, GALA, màawɔinɠa, mazɔlɔɔ nuiti ta kpɔ̀lɔzu.

Foloi kpein daawu ta sàkpesu, ti ɗa dàaʋili.

3 Yeenɔpɛ sìli nuiti ta ʋilɛsu pòlu,

ti mɔinʋɛ gola, ta kɔɔi ʋɛɛzu bà, GALA é Anii-Pɛ-Unda!

4 Voloi nà ɠɛ luazu la,

ɗa ɠa nà ɗa ɠaliva è ma.

5 Nà GALA maamusɛzu daawooi vaa zu.

Nà ɠalivaazu GALA ma, gè la lua ani nɔpɛ ba.

Leeni ɠa nuiti ta zoo ti kɛ ga ze?

6 Yeenɔpɛ, ta gòoi maavalibosu,

kisiɛ ɲɔi nɔ ɠa é ti ɠisu nɔ̀un tetema.

7 Ta yaavai ɠɛɛzu, ti maaʋɛɛnɛgi wo,

ti ɗa kɔ̀ɠɔʋo gaiziɛ,

tɔɔzei ti wɔinʋɛ ga ti zɛ̀nvui ɠula zèa.

8 Telebotalai naati kpein poluma, ta ɠula su nɛi?

Ee, GALA, nuɓusɛi naati pu ya zooi ma, ɗa-yiiɠaawanai zu!

9 È kɔ̀ɠɔ ʋilɛsuʋɛ liegi ɠaalugɛ nà-eteai zu, gè kɛai siɛziɛgi zu.

Gàazuɗɛi ɠaalɛ ba, è pu ɗa-ɠɔlɔ woolei zu.

Ti zɛʋɛʋɛ ɗa-zɛʋɛi zu.

10 Naazu nɔ̀un sili nuiti ta ɠulazu ʋolu,

voloi gè kpee loozu la,

gè kwɛni ga GALA ka bɛ̀.

11 Nà GALA maamusɛzu daawooi vaa zu.

Nà Ɠɔoɠɔ GALAGI musɛzu daawooi vaa zu.

12 Nà ɠalivaazu GALA ma,

gè la lua ani nɔpɛ ba.

Leeni ɠa nuiti ta zoo ti kɛ ga ze?

13 Ee, GALA, maanɛɛʋɛ gè minazeɠegiti daazeeli, niiti gè ti woni.

Nà mama zalaɠaiti kula è ʋɛ.

14 Mazɔlɔɔ è zɛ̀nvui ɠizoga, è kùla saai ya,

kɔ̀ɠɔiti ti ʋoola tooi ʋa,

naa ɠa a kɛ, gè ziɛ è ɠaazu, ee, GALA,

zɛnvui ma wozakalagi ɠa.