1 Guye loo ɠundiɠii nɔnɔi ʋe. É loozu ga kɔnigiti. Davide ná-guyei.

2 Ee, GALA, woilo nà-kpee wooi ma,

ɠida nà-maanɛɛnɛ wooi wu!

3 Eteai ɠwɛmaʋɛ ɠa gè wooɠulazu ná è ma, zìiɓɔlɔʋɛ.

Lɛ ga ze fasa ɠaaɠoozagi ma, nii gè la zooga gè ʋa zeeli ma ɓɔɠɔ ʋɛ!

4 Mazɔlɔɔ ɗa ga nɔ̀un dɔɔɠuzuʋɛ,

pɛlɛ ɠaaɠoozagi siɠigi ma, sìli nui ɠaazu.

5 Nà pɔ gè zei ɗa-zeɠe ʋɛlɛi wu, gè yɛ ná ɠɔ,

gè lɔɔɠu è-ɠoʋegiti bu.

Lo!

6 Mazɔlɔɔ GALA, ɗa ɠa è woilosu nà-minazeɠe gooiti ma,

è poganii ve zèa, nii è feezu naati zea, niiti ti luazu è ʋa.

7 Gá-masagi zii ma voloiti suɠooza, è ta ɓɔ ti ʋa,

ná-konagiti suɠooza yeeɠɛɠalaiti pɛ su!

8 É yɛ zeini GALA kakala, eyɛsu ɠɔ.

Va bu, ɗa-wooɠɛɠiladai ta ɗa-ɠaamai, naati ti ɓaa tɔun maazu.

9 Ungo, nà guyei loozu yeenɔpɛ è-laaseigi lɛbi vai zu,

gè nà-minazeɠegiti daazeeli folo-o-folo.