1 Guye loo ɠundiɠii nɔnɔi ʋe. Eɠɛʋelei Yedutun la. Davide ná-guyei.

2 GALA gila kpegi ʋɔ bɛ ɠa nà ziilɛigi zɔlɔɔ ná,

tɔ ɠa nà-kizo fai zea.

3 Tɔ ɠila kpegi ɠa é bɛ̀ ga fasai ta kizogi,

nà-siɠigi, gè la ɲiikpiga eyɛsu pɛ.

4 Yeeɠɛɠala lielegɔ ɠa wo kɛɛzu, wo ɗa ɠili ɓɔɠɔ ʋa zunu ɠilagi laalɔɠɔma,

nii a kɛ wo golo,

eɠɛ siɠigi maalaai na, ɓaa eɠɛ sasai é loozu niina?

5 Ti deveiti boga ga ti too, ti kula tosu wolai.

Zɛɛi nɛɛʋɛ ti ʋɛ,

ta tuyai loozu ga ti-laaʋɛ,

ti ɗa foovooi loo ti-ɠoozuʋɛ.

Lo!

6 GALA gila kpegi ʋɔ bɛ ɠa nà ziilɛigi zɔlɔɔ ná,

mazɔlɔɔ tɔ ɠa é ga nà-kitogi.

7 Tɔ ɠila kpegi ɠa é bɛ̀ ga fasai ta kizogi,

nà-siɠigi, gè la ɓunɛga pɛ.

8 Nà-kizogi, nà-lɛbiyai, ti kpein sɛlɛgɛ GALA ba.

Nà-fasai é màkɛsu, dɔ̀ɔɠuzuʋɛ, toɠa ga GALA.

9 Nuɓusɛiti, à ɠaliva tɔun ma yeenɔpɛ!

À wo-yiiti daalao tɔun bɛ!

GALA ka é ga ade-lɔɔɠuzuʋɛ.

Lo!

10 Ungo, Adama leaiti ta nɔ ga fiilɛi é leʋesu.

Nuiti kpein ti ɓɔ su, ta nɔ ga gaaʋɛ nua.

Ɗa ti pɛ seina kiloi ɠa,

fiilɛi wuiʋɛ ti ʋa.

11 Mina ʋilɛ toomai ʋolu.

Mina ɠito naavoloiti ba, niiti ti zɔlɔɔ pelei ɲɔuɗai.

Ni è-zɔlɔɔgi ɠaa a wɔɔlɔna,

mina kɛ ga ɗa-ɠitogi.

12 GALA ge faa ɠila boni,

é lati, é bo ʋolu, gè mɛnini, é ɠɛ ma:

«Zobogi ɠa ga GALA nɔnɔ.»

13 Ɗa ɓalaagi, Màliɠii, wooɠɛɠiladai ɠa ga ɗɔnɔ,

mazɔlɔɔ ɗa ɠa è ɛsɛ gilagilagi zalai veezu zea, eɠɛʋelei ná-kɛɛwotiiti ti la.