1 Guye loo ɠundiɠii nɔnɔi ʋe. Eɠɛʋelei Yedutun la. Azafe ná-guyei.

2 Nà ɓainsu, gè wooɠula GALA ma,

GALA ka gè wooɠulazu ma, goilogɛ pɔ̀ pelei.

3 Nà ɠɛna kidaaʋiligi zu, nà ɗa wooɠula Màliɠii ma.

Kpidii laawu ɲɛgɛlɛin, zèe lɛɛʋɛ tɔun pɔ pelei,

nà ɗa ɠɛlɛ gaanɛɛnɛ vai ʋa.

4 Nà ɠisiɛna GALA su feya, nà ɗa tɔɔzei ga kpalagi woga.

Siɛgi zu nà ɠigaiziɛna la, ìɲɔ ka ɗa leʋe.

Lo!

5 Ɗa gàazu ɓaazu, gè la pɛa ma mɛɛ.

Zìiɓɔlɔni, gè la ɠɛni kwɛɛ, nii nà bo.

6 Nà ɠisiɛzu wɔlɔwɔlɔi ma voloiti su,

ta konagiti su ti leʋegai na kaite.

7 Kìgi loo nà-guyei zu kpidii,

gè ɠisiɛ zìimaʋɛ, zìi gaazaɠagi wo ga:

8 «Maliɠii ɠa ɠɛlɛ bà eyɛsu ɠɔ ɓaa?

É la mɔ yeezeiɗa bù eyɛsu pɛ ɓaa?

9 Ná-wooɠɛɠiladai ɓela kana ɓaa?

Nii é bosu, naa ɠoloɠologa eyɛsu ɠɔ ɓaa?

10 GALA ge yeema gi maawɔinɠaa vai ma ɓaa?

Ná-ziiɠaawanai zu, é yiilaaɠuluga gi luɠɔ?»

Lo!

11 Wɛlɛ, nii gè bosu: «Nii ɠa é ga nà-kpɔlɔi ma ungi:

GALA nii é Anii-Pɛ-Unda, é la mɔ faiti kɛɛzu ga mɔungi ɠɛʋele.»

12 Nà ɠitoo Ɠɔoɠɔ GALAGI ɠɛɛ vaiti su.

Ungo, gè ɗa ɠizɛ laavɔɔ vaiti su, ti leʋegai.

13 Nà ɠisiɛzu ɗa-ɠɛɛwotiiti su.

Gè ɠida ɗa-vaa wolaiti bu.

14 Ee, GALA, ɗa-vaiti ɲadegɛ!

Galagi ɓɛgele ɠa bɔɔlɔai ga GALA kɛʋele?

15 Ɗa ɠa è ga GALAGI nii é laavɔɔ vaiti kɛɛzu.

È ɗa-zobogi ɠulani kɛlɛma zii ɠiligiti saama.

16 È yeelokoi ɠa è ɗa-nuɓusɛiti unmɔɔni da,

Zakɔɓe mavofodai ta Zozɛfe mavofodai.

Lo!

17 Ee, GALA, ziɛiti ti è ɠaani!

Ziɛiti ti è ɠaani, ti zasuɓali.

Ungo, paliiti ti ɲiikpini.

18 Tonaɓiingiti ti tonai ʋuuni,

tonai kpunɛni, tona togai ma viilɛi zu,

ɗa-mɛɛinti ti ɠɛni ɠoʋesu mini-o-mini geezuʋɛ.

19 Ɗa-lona ɓunɛ tugi ʋɔ, tɔngɔlɔ fiilɛi zu,

mainmainti ti eteai zu ɠɛɛni kala,

eteai ɲiikpini, é ɓali.

20 Ɗa-ʋelei ɠɛni kpoloɗɛi wu,

ɗa-ʋele goiti ti ɠɛ ziɛ wolaiti bu,

nu nɔpɛ ge la è-ɠɔɠɔ ʋogiti kaani.

21 È loni ɗa-nuɓusɛiti untuɠɔ eɠɛ baala kpulugi,

ga Moize ta Aalɔn maaʋele.