1 Kolé mavofodaiti ta-wuyei. Guye loo ɠundiɠii nɔnɔi ʋe. Nii é loozu koolei bu. Ezela nui Ɠeman ná-kidafaawui.

2 Ɠɔoɠɔ GALAGI, nà-kizo GALAGI!

Nà kpeei loozu foloi ta kpidii è ɠaazu.

3 Nà-maanɛɛnɛ wooi lɛ, é zeeli è ma.

Woilo nà-kpee wooi ma.

4 Ungo, maanɔɠɔi kula ɠɛa ga ze,

gè maaɓuɠa saai ʋa gola.

5 Nɔ̀un gàalugɛ niina naati saama, niiti ti yeizu kabayeɠei zu,

gè ɠɛa eɠɛ zunui, nii zɛbɛ nɔpɛ ge la mɔ ba.

6 Nà niina laani gɔvɛiti saama, eɠɛ poomaiti ti laani kabayeɠei zu.

È yeemaai ti ma, è-ɠi ge la mɔ ti zu, è la mɔ faa nɔpɛ kɛɛzu ti ʋɛ.

7 È dɔ̀a zeɠei ɓomaʋɛ,

saai ɓomaʋɛ ma ɓidii zu.

8 Ɗa-yiiɠulagi zeelia mà,

ɗa-yiiɠaawanai zeelia mà eɠɛ ziɛ lakpatakpagiti.

Lo!

9 È màaɠooza sìɛɲɔɠɔiti ba, gè ɠɛa ti ʋɛ eɠɛ maalua ani,

nà-maanɔɠɔi daaɠuluga mà, gè la zooga gè ʋa ɠula su.

10 Gàazuɠɛzɛi ɓɔiɗa su ga ziizoolɛi.

Ee, Ɠɔoɠɔ GALAGI, nà wooɠulazu è ma, yeenɔpɛ!

Nà zèeiti tɛɛzu è ma.

11 Gɔvɛiti ka ɗa laavɔɔ vaiti kɛ ti ʋɛ?

Gɔvɛiti ka ta wuzeɠe, ti ɗa è lɛbi?

Lo!

12 Ɗa-nuɓɔɠɔlai ɠa wo nɛi kabayeɠei zu,

ta ɗa-wooɠɛɠiladai undaaʋili zeɠezaɠai zu?

13 Ɗa-laavɔɔ vaiti kwɛɛgɛ nɛi kpidii zu,

ta ɗa-lelebodai zooi zu, ʋɛ zeemai wogai ná ma?

14 Nɔ̀un nà, ee, Ɠɔoɠɔ GALAGI, ɗa ɠa gè è lolisu ga è ɓɔ bà.

Nà nà-maanɛɛnɛ wooi laazeelizu è ma, sobu-o-sobu.

15 Leeni vaa zu, ee, Ɠɔoɠɔ GALAGI, è pìlisu ya?

Leeni vaa zu è ɠaazulɔɔɠuzu ga è mina kà?

16 Mazɔlɔɔ màawɔinʋɛ, nà niina saai ɠoba,

é tɔɔzei nà-doungo ziɛgi zu ma, eyɛsu niizu,

nà lɔɔzu maalua vai zu, nii è seizu mà,

sàsuɓalia gola.

17 Ɗa-yiiɠaawana abui soga nɔ̀un ba,

gè ɠoloɠologa ga ziizoolɛi, nii é zeelizu mà, é zeɠe è ʋɔ bɛ.

18 Eɠɛ ziɛiti ti màaɓɔlesu folo-o-folo,

ta latisu mà mini-o-mini.

19 È gàazuɠwɛɛgiti ta bɔ̀ɔlaiti maaɠooza bà.

Kpidii ɠila kpe nɔ ɠa é ga sìɛpoluɲɔɠɔi niina.