1 Ezela nui Etan ná-kidafaawui.

2 Nà Ɠɔoɠɔ GALAGI ná-nuɓɔɠɔlai maawuyezu,

dàaʋɛ ɠa ɗa-wooɠɛɠiladai ɠula kɛlɛma yeeɠɛɠalaiti pɛ su nuiti bɛ.

3 Nà zoo gè bo, gè ɠɛ ma:

«Ɗa-nuɓɔɠɔlai ɠa loni eyɛsu ɠɔ.

È ɗa-wooɠɛɠiladai zeiʋɛ kpaan geeɠɔlɔgi zu.»

4 È boni, è ɠɛ ma: «Gè minazeɠegi woni nà-nui ʋɛ, gè yiimazeɠeai la,

Davide ʋɛ, nii é ga nà-botiɠɛ nui, gè niima minazeɠegi woni ga:

5 ‹Nà yɛ è-mavofodai zeizu masadai zu eyɛsu ɠɔ, ɗa zeɠena ná,

gè ɓaa ɗa-masa kpɔkpɔgi maazu, yeeɠɛɠalai pɛ su nuiti saama.› »

Lo!

6 Geeɠɔlɔgiti su aniiti kpein ta ɗa-ɠɛɛwoti maayikiaiti dɛbizu, Ɠɔoɠɔ GALAGI!

Ɗa-nu ɲadegaiti ta-maaɓɔgi ɠa ɗa-wooɠɛɠiladai maamusɛzu.

7 Ɓɛ ɠa é ga è ɠɛʋele, geeɠɔlɔgi zu, ee, Ɠɔoɠɔ GALAGI?

Ɓɛ ɠa é ga è ɠɛʋele, geezu aniiti saama?

8 GALA maayikiʋɛ gola, nu ɲadegaiti ta-maaɓɔgi zu,

maayikiʋɛ naati kpein gaazu, niiti ti maaɠoolii zu.

9 Ɠɔoɠɔ GALAGI, Fai-Pɛ-Maliɠii!

Ɓɛ ɠa zobogi bɛ ga ɗɔun è ɠɛʋele, Ɠɔoɠɔ GALAGI?

Ɗa-wooɠɛɠiladai è maaɠooliʋɛ.

10 Ungo, ɗa ɠila kpe ka ɗa ɗa kpoloɗɛi ná-wasogi ɠaayei.

Siɛgi zu é wuzeɠezu la ɲiikpigi ma, ɗa ɠa ɗa ɗa gaayei.

11 Ɗa ɠa è ziɛ wu zua ɲɔi Laɠaɓe*89:11 zua ɲɔi Laɠaɓe: Tanisu daaseigi naa ɠa ɓɔɛzu é ʋilɛ Ezipete ʋa ɓaa kpoloɗɛi. lɛɛvɛni, é za,

è è zili nuiti suvazani ga ɗa-zɛbɛsu yeei.

12 Geeɠɔlɔgi ɠa ga ɗɔnɔ, zooi ɓalaagi ɠa ga ɗɔnɔ,

ta eteai, é ɓɔ su aniiti kpein ba, ɗa ɠa è ti ɓɛtɛni.

13 Ɗa ɠa è lɛkpɛmaʋɛti kpɛtɛa, nu ɠɔʋɛzu ʋelei, ta nu yeezazu ʋelei,

Taɓɔɔl gizei ta Ɠɛɛlɛmɔn gizei, ta wooɠula ga koozunɛɛi è-laaseigi ʋɛ.

14 È-yeei maaɠiliʋɛ ga zɛbɛi,

è yeezuɓaaʋɛ,

è-yeezai wuzeɠeʋɛ.

15 Ɗa-masa kpɔkpɔgi ma wuulaagi ɠa ga telebodai ta sɔledai.

Wooɠɛɠiladai ta gaamai, ta ziɛzu è ɠakalaʋɛ.

16 Ee, undaanɛ nuɓusɛ ɠa ga naati, niiti ti zoogai è maamusɛzu!

Ɠɔoɠɔ GALAGI, ta ziɛ ɗa-wozakalagi ɠa è ɠaazu.

17 Ta ɠoozunɛ yeenɔpɛ, tɔɔzei ɗa ga ta-ƓALAGI.

Ɗa-lelebodai zaɓui zu ɠa ta wuzeɠe la.

18 Mazɔlɔɔ ɗa ɠa è ti-zɛbɛi ɠulazu kɛlɛma, é volo,

è-zaalai zu ɠa gi pilɛ sɔlɔɔsu da.

19 Gi makɛ nui ɠa Ɠɔoɠɔ GALAGI yeezu,

gá-masagi ɠa Izilayɛle ná-GALA Ɲadegai yeezu.

20 Mɔungi, è ɓɔɛni kulakɛlɛmai zu, è ɠɛ ɗa-wooɠɛɠila nuiti ma:

«Gè kpɔba veeni kɔɔɠuluɓai taɠila bɛ,

gè zunu loungoi ta wuzeɠeni nuɓusɛiti saama,

21 gè Davide ɠaani, gè ɠɛ é ɠɛ ga nà-botiɠɛ nui,

gè nà-gulɔ ɲadegai ziɛni ma.

22 Nà yeeyɛ ba,

nà iɲɔdɔ.

23 Sili nuiti ti la ɠula filiba eyɛsu pɛ,

faa ɲɔu ɠɛ nui la zeiɗa unda.

24 Nà sili nuiti kpein dɛɛvɛ tuɠɔ,

gè maayoseɠe nuiti koloɠolo.

25 Nà-wooɠɛɠiladai ta nà-nuɓɔɠɔlaiti ta ɠɛ tɔun ba,

ná-zobogi zu ɠa wɔɔlɔ, dàaseigi ʋɔ.

26 Nà kpoloɗɛi lɔ zeezu, é zei unda,

toɠa masadai ɠɛ ziɛ wolaiti unda.

27 Toɠa wooɠula mà, é ɠɛ mà:

‹Ɗa ɠa è ga Kɛ̀ɛ, nà-GALAGI, nà-kizo fasai!›

28 Nɔ̀un nà, nà tɔun kɛ ga dòun zunu mɔungi,

nii bɔɔlɔai é leʋe masagiti kpein ba eteai zu ná pɛ.

29 Nà nà-wooɠɛɠiladai makɛ bɛ eyɛsu ɠɔ,

nà-minazeɠegi gè boni tɔun bɛ, naa la valiboga eyɛsu ɠɔ.

30 Nà mavofodai makɛ eyɛsu ɠɔ,

ná-masa kpɔkpɔgi ɠa lɛbi, eɠɛ geeɠɔlɔgi.

31 «Ni tanisu mavofodaiti ta ɠɛlɛna nà-tɔgi ʋa,

ti la ziɛni ga nà-deveiti,

32 ti nà-deveiti koloɠolo,

ti la ɠoloni nà-tɔgiti bɛ,

33 nà tukpɔi zeɠe, gè ta-lɔ koloɠologi maaɠolo,

nà ta-vaaɠaaza golai zale ga doɠai.

34 Kɛlɛ gè la ɓega nà-nuɓɔɠɔlai ʋa tɔun bɛ.

Gè la zeɠea nà-wooɠɛɠiladai ʋolu, eyɛsu ɠɔ.

35 Gè la nà-minazeɠegi ɠoloɠologa,

gè la ɓalaa naa maavaliboga ɲɛgɛlɛin, nii kulaai dàaʋɛ.

36 Gè ɠonani, ná ɠɛ ɠila nà-ɲadedai ma,

ɓa-o, gè la zɛɛ woga Davide ma.

37 Mavofodai ɠa yɛ ná ɠɔ,

ná-masa kpɔkpɔgi ɠa yɛ gàazu eɠɛ foloi,

38 toɠa zei eyɛsu ɠɔ eɠɛ alugi,

nii é ga wooɠɛɠila zeelei tonaɓiingi ʋolu.»

Lo!

39 Anɛɛ naa ʋe, è masagi yɛni na, è ɠɛlɛ ba,

nii è gulɔ ɲadegai ziɛni ma, è yiiɠaawanani ma!

40 È ɗa-minazeɠegi ɠoloɠologa, nii è seɠeni ɗa-wotiɠɛ nui ʋɛ,

è ná-masa bɔɔlɔgi ɠɔzɔa, è pili zooi ma.

41 È zeɠei wɔa ná-siɠigiti kpein ba,

è ná-siɠigiti koloɠologa.

42 Teʋe nuiti kpein ti loa su,

seiɲɔɠɔiti ti ɗa ɲɛɛɠula su.

43 È sili nuiti iɲɔdɔɔni,

è wɔinzeɠe nuiti daave ga koozunɛɛi.

44 È ná-boɠa zɔkpɔi zeɠeni pelei ʋa, pilisuʋɛ,

è la loni polu kɔɔɠɔ ziɛgi zu.

45 Ʋelei é ɠɛa volozu la, è naa ɠaaʋa,

è ná-masa kpɔkpɔgi ʋiliga ya zooi ma.

46 È ná-nu niinɛlai ma voloiti suɓuɠaa,

è maaɓɔlega ga unfegi.

Lo!

47 Ɠɔoɠɔ GALAGI, ɗa yɛsu dɔɔɠui zu, eyɛsu yeelɛ,

ɗa-yiiɠaawanai ɗa so, eɠɛ abui?

48 Ɠizɛ su ga nà-eteai zu la ɠoozani,

è nuɓusɛiti kpɛtɛʋɛ wafuun ɓaa?

49 Nui ɓɛgele ɠa a zoo é zɛnvui wo, é la saai ɠaa?

Ɓɛ ɠa a zɛnvui ɠula gɔvɛalaazu ná-zobogi ya?

Lo!

50 Maliɠii, mini ɠa ɗa-nuɓɔɠɔlai ná, è ti ɠɛɛni mɔungi zu?

Ɗa-wooɠɛɠiladai zu, è ma minazeɠegi woni è ɠona Davide ʋɛ.

51 Maliɠii, ɠizɛ ɗa-wotiɠɛ nuiti ta-unfegi zu,

ɠizɛ nuɓusɛ mɔinmɔingiti su, ti-ma ɠasɔi laani ùnma.*89:51 Maliɠii, ɠizɛ ɗa-wotiɠɛ nuiti ta-unfegi zu, ɠizɛ nuɓusɛ mɔinmɔingiti su, ti-ma ɠasɔi laani ùnma: Tati pelei taɠili ɓalaa ka ga nii: Maliɠii, unfegi ma zii ʋɛtɛ, nii nuɓusɛ mɔinmɔingiti ti ɗa-wotiɠɛ nuiti gaazuɠilizu la, ta soolɛi ti seizu mà

52 Ɠɔoɠɔ GALAGI, ɠizɛ su ga è zili nuiti ta ɓaaɠulamai ɠɛɛzu,

ta ɓaaɠulazu zunui naa ma, nii è gulɔ ɲadegai ziaai ma!

53 Mamagi ɠa Ɠɔoɠɔ GALAGI ʋɛ eyɛsu ɠɔ!

Amina! Amina!