1 Guye loo ɠundiɠii nɔnɔi ʋe. Nii é loozu é zoloo guye wooi ma, nii daa ga: «Zunu loin ná-saai». Davide ná-guyei.

2 * 9:2 Guyei tanigaa zu, guyei laaɠulazuʋɛti tɔɔzeiʋɛ ga Eɓulu zɛʋɛ ɠae puufelegɔ maazu felegɔi gila, é zoloo ti-ɲɛkpɛ ʋelei ma. Ti laasei pɛɛʋɛ ga sɛʋɛ ɠae wuyeiti. Guyei 9 ta 10 ta-zɛʋɛ ɠaeiti ta ga faa ɠila. Nà Ɠɔoɠɔ GALAGI maamusɛ ga zìimaʋɛ pɛ,

nà ɗa-vaa ʋagɔi kpein bo.

3 Nà ɠoozunɛ è ʋɔ, gè ɠoozunɛ gola,

nà guyei loo è-laaseigi lɛbi vai ma,

GALA nii é Anii-Pɛ-Unda!

4 Siɛgi zu sìli nuiti ti ɠulazu la ʋolu,

ti-ɠɔɠɔi ɠa ɗa ziɠa, ti undaaʋili è ɠakala.

5 Mazɔlɔɔ è màaloboga, è bà vai ɠaaɠula ba,

ɗa zeizu ɗa-masa kpɔkpɔgi ɠa, ga tukpɔɠaaleʋe nui sɔlegai.

6 Ɗa ɓaazaɠazu zii ɠiligiti ma, è faa ɲɔu ɠɛ nui undaaʋili,

è ti-laaseigi ɓale eyɛsu ɠɔ.

7 Sili nu nɔpɛ ge la mɔ ná.

Ti ɠoloɠologa eyɛsu ɠɔ, mazɔlɔɔ è ta-laa wolai lokaga,

zeemai woga ti ma.

8 Kɛlɛ Ɠɔoɠɔ GALAGI ɠa sei wosu yeenɔpɛ,

é ná-masa kpɔkpɔgi ʋilɛni tukpɔɠaaleʋe vai ma.

9 Tɔ ɠa é zeini eteai unda ga telebodai,

é ɗa ziiti pɛ tukpɔɠaaleʋe ga sɔledai.

10 Ɠɔoɠɔ GALAGI ɠɛ ga siɠigi maanɔɠɔ nui ʋɛ kae,

é ɠɛ bɛ ga siɠigi kidaaʋili siɛgi zu.

11 Niiti ti è ɠwɛɛ, naati ti la è la.

Mazɔlɔɔ ɗɔun ɗa, Ɠɔoɠɔ GALAGI, è la ɠɛlɛa nu ʋa, nii é ɠaaʋotesu è ma.

12 À Siyɔn masagi Ɠɔoɠɔ GALAGI lɛbi ga guyeiti,

faa wolaiti é ti ɠɛai, à naati bo zii ɠiligiti saama!

13 Mazɔlɔɔ toɠa ɗa ɲama ʋui ʋotokula, ki ge la ɠula su,

é la yeema maawɔin nuiti ta-ɓee wooi ma.

14 Ee, Ɠɔoɠɔ GALAGI, màawɔinɠa!

Kpɔlɔi ʋɛtɛ, nii wɔ̀inzeɠe nuiti ti dɔ̀ai su.

Ɗa ɠa è lɛɛzu ga ze, è kùla saai ma ziɠidaʋɛ,

15 nii a kɛ è maamusɛ wooi wo Zeluzalɛme taa ziɠidaʋɛti,

gè ɠɛ koozunɛɛi zu, tɔɔzei gè è zɔlɔɔga ga nà-kizo nui.

16 Zii ɠiligiti ta loozu zeɠei zu, nii ti bɔai ga ti-yeeiti,

ti-ɠɔɠɔiti ta lɔɔzu tumɔi zu, nii ti seini dɔɔɠuzu.

17 Ɠɔoɠɔ GALAGI ɠa ɓɔɠɔ lɛɛzu, é sɔledai ɠɛ.

Toɠa faa ɲɔu ɠɛ nui zosu, ga naa ɓɔɠɔi ná-balii.

Lo!

18 Faa ɲɔu ɠɛ nuiti, ta zii ɠiligiti, ti la yiizoolɛzu ga GALA ná-faa,

naati ta li gɔvɛalaazu.

19 Kɛlɛ GALA ge la yeema pɛ maanɔɠɔ nuiti ma, eyɛsu ɠɔ,

maawɔin nuiti ta-ɠitogi la ɠoloɠologa eyɛsu ɠɔ.

20 Wuzeɠe, Ɠɔoɠɔ GALAGI, nui mina pilɛ sɔlɔɔ!

Zii ɠiligiti to ɠaazu, è ta-lukpɔi ɠaaleʋe.

21 Ee, Ɠɔoɠɔ GALAGI, dualuagi lɔ ti zu!

Nuɓusɛi naati ti kwɛɛ ga ta ga nuiti nɔ.

Lo!