1 O Avraam đelo gothar ani pustinja Negev thaj bešlo maškaro Kadeš thaj o Šur. Nesavo vreme bešola sar abandžija ano Gerar. 2 Tegani, e manušenđe vaćarda baši pi romni i Sara: "Mi phen si." Gija o Avimeleh, o caro taro Gerar, bičhalda pali Sara thaj lija la romnjaće.

3 Al raćasa avilo o Dol ko suno e Avimelehese thaj phenda lese: "Ka mere zbog kaja romni sava lijan, golese kaj isi la rom."

4 O Avimeleh vadži ni suta lasa, golese phenda: "Gospode, me ni ćerdem khanči bilačhe! Dal ka mudare man thaj me narodo? 5 Na li o Avraam korkoro phenda: ‘Mi phen si’? Ni li voj korkori phenda: ‘Mo phral si’? Ćerdem gova taro thodo savest thaj ni meljardem me vasta."

6 Tegani o Dol phenda e Avimelehese ano suno: "Va, džanav kaj ćerdan gova thode savestesa, golese arakhljem tut te ma greši protiv mande, thaj golese ni dijem te dole tut pe late. 7 Akana iri gole manušese lese romnja. Vov si proroko thaj ka molil pe tuće te ačhe džuvdo. Al te ni irisadan la, te džane kaj ka mere tu thaj i sa ćire manuša."

8 O Avimeleh sabalin uštilo rano thaj dija vika sa pe službenikuren. Kana phenda lenđe sa so sasa, von but darajle.

9 Tegani o Avimeleh akharda e Avraame thaj pučlja le: "So ćerdan amenđe? So ćerdem tuće te čhuve gasavo baro greh pe mande thaj pe mo carstvo? Ćerdan manđe kova so ni trubul te ćere!"

10 Thaj vadži o Avimeleh pučlja e Avraame: "Sose ćerdan gova?"

11 O Avraam phenda lese: "Dijem gođi: ‘Ane kava than sigurno ni daran taro Dol thaj ka mudaren man zbog mi romni.’ 12 A i čače si mi phen, čhej me dadesi, al naj čhej me daći. Thaj postanisada mi romni. 13 Kana o Dol phenda te ikljav andaro ćher me dadeso, me phendem laće: ‘Gija ka sikave ćo manglipe premal mande: Bilo kaj dža, vaćar kaj sem ćo phral.’"

14 Tegani o Avimeleh e Avraamese dija bakren, guruven, roburen thaj ropkinjen. Irisada lese i lese romnja e Sara. 15 Thaj o Avimeleh phenda e Avraamese: "Akh, mi phuv si tuće putardi, beš kaj manđe." 16 A e Saraće phenda: "Akh, dijem će phralese milja (1 000) srebrenjakura. Gova ka avol dokaz savorenđe save si tusa kaj san nedužno. Slobodno san tare bilo savi optužba."

17 Tegani o Avraam molisajlo e Devlese thaj o Dol sastarda e Avimelehe, lese romnja thaj lese ropkinjen, te šaj pale bijanen. 18 Golese kaj o GOSPOD dži jekha džuvlja ane Avimeleheso ćher phanglja te našti bijanen zbog e Avraamesi romni i Sara.