1 O Adam pašlilo pe romnjasa e Evasa thaj voj ačhili khamni thaj bijanda e Kajine. Golese i Eva vaćarda: "Ano pomoć e GOSPODESO dobisadem murše čhave."

2 Pale gova bijanda lese phrale e Avelje. Thaj o Avelj ćerdilo pastiri, a Kajin ratari.

3 Pale nesavo vreme o Kajin anda e GOSPODESE žrtva taro bijandipe e phuvako. 4 A o Avelj anda sar žrtva e emšukar kotora tare anglune životinje save bijandile ano stado. A o GOSPOD prihvatisada e Aveljesi žrtva, 5 al e Kajinesi žrtva ni prihvatisada. Golese o Kajin but holajlo thaj mukhlja po muj.

6 O GOSPOD phenda e Kajinese: "Sose holaljan thaj sose mukhljan ćo muj? 7 Te ćerdan šukar, ka prihvativ tut. A te ni ćerdan šukar, o greh si anglo ćiro vudar, vov dićhol te dolol tut, al tu moraš te pobedi le."

8 Pale gova o Kajin vaćarda pe phralese e Aveljese: "Ajde ka dža ko polje!" Al kana sesa ano polje, hutija o Kajin pe po phral o Avelj thaj mudarda le.

9 Pale gova o GOSPOD pučlja e Kajine: "Kaj ćo phral o Avelj?"

O Kajin phenda: "Ni džanav. Me li sem čuvari me phraleso?"

10 O GOSPOD phenda: "So ćerdan? Akh, o rat ćire phraleso dol vika andari phuv premal mande. 11 Golese, akana te ave harami thaj ikaldo tari phuv, savi putarda po muj te pijol o rat će phraleso andare ćire vasta. 12 Kana ka ćere bući pi phuv, voj te ma dol tut po bijandipe. Ka ave lutalica thaj begunco pi phuv."

13 O Kajin phenda e GOSPODESE: "Mi kazna si but po bari nego so šaj te inđarav! 14 Akh, avđive trade man tare kaja phuv thaj mora te garavav man tare ćiro muj. Ka avav lutalica thaj begunco ki phuv, a dži jekh savo ka araćhol man, ka mudarol man."

15 Al o GOSPOD phenda lese: "Na! Te khoni mudarol e Kajine, ka resol le efta droma pobari osveta."

Thaj čhuta o GOSPOD znako po Kajin te ma mudarol le khoni kana ka araćhol le.

16 Tegani đelo o Kajin taro muj e GOSPODESO, thaj đelo te bešol ani phuv i Nod, istočno taro Eden.

17 O Kajin pašlilo pe romnjasa, voj ačhili khamni thaj bijanda e Enohe. Tegani o Kajin vazdija foro savo akharda Enoh, pale po čhavo. 18 E Enohese bijandilo o Irad, e Iradese bijandilo o Malaleil, e Malaleilese bijandilo o Metušael, a e Metušaelese bijandilo o Lameh.

19 O Lameh lija duje romnjen: jekhako sasa alav Ada a e dujtonako Cila. 20 I Ada bijanda e Javale. Lestar bijandile kola save bešen ke šatora thaj araćhen stoka. 21 Lese phraleso alav sasa Juval thaj lestar bijandile kola save bašalen harfa thaj duduko. 22 I Cila bijanda e Tuval-Kajine, savo sasa kovači thaj ćerola alati taro bakar thaj sastren. E Tuval-Kajinesi phen akhardola Naama.

23 O Lameh vaćarda pe romnjenđe:

"Ado thaj Cilo, šunen o glaso mingro,

e romnja e Lamehese, šunen o lafi mingro!

Mudardem e manuše savo ranisada man,

terne čhave savo čalada man.

24 Ako o Kain ka avol osvetimo efta droma,

tegani o Lameh eftavardeš thaj efta (77) droma."

25 O Adam palem pašlilo pe romnjasa. Voj bijanda lese murše thaj dija le alav Sit, golese so vaćarda: "O Dol dija man avere čhave umesto o Avelj kas mudarda o Kajin."

26 Thaj e Sitese bijandilo čhavo, kase dija alav Enos.

Od tegani e manuša lije te slavin o alav e GOSPODESO.