1 Palo nesavo vreme o peharniko, sluga savo čhorola mol e carose, thaj o pekari holjarde pumare gospodare, e caro taro Egipat. 2 O faraon holajlo pe kala duj službenikura, po šorutno peharniko thaj po šorutno pekari. 3 Čhudija len ano ćher taro zapovedniko e stražarengo, ano isto phanglipe kaj sasa phanglo o Josif. 4 A o zapovedniko e stražarengo čhuta e Josife te služil len.

Pale gova von sesa phangle but vreme. 5 Ani jekh rat o peharniko thaj o pekari dikhlje sune thaj dži jekh suno sasa le piro značenje.

6 Kana theara đive ko sabalje avilo o Josif ke lende, dikhlja kaj von sesa zabrinime, 7 thaj pučlja len: "Sose sen avđive zabrinime?"

8 Von phende lese: "Dikhljam sune, al naj khoni ko te vaćarol amenđe so značin."

Tegani o Josif phenda lenđe: "Dal o Dol ni džanol so značil gova? Vaćaren manđe save sune dikhljen."

9 Gija o šorutno peharniko vaćarda po suno e Josifese: "Ano suno dikhljem angle mande čokot 10 thaj pe leste sesa trin loze. Samo so iklile e pupoljkura, procvetisade thaj e drakha pe leste zrelisade. 11 Ane mo va ićardem o pehari e faraoneso. Lijem kola drakha, ćićidijem len ano pehari thaj čhutem lese o pehari ano va."

12 O Josif phenda lese: "Akh so značil gova suno: Trin loze si trin đivesa. 13 Vadži trin đive thaj o faraon ka vazdol ćo šoro thaj ka iril tut ke ćo than. Palem ka čhuve o pehari lese ano va sar angleder, kana sana leso peharniko. 14 A kana ka avol tuće šukar, de tu gođi mandar. Av ljubazno, vaćar e faraonese mandar, te ikalol man tare kava phanglipe. 15 Golese kaj ki zor man inđarde andari phuv e Jevrejenđi, a ni kate khanči ni ćerdem sose bi zasluživa te čhuden man ano phanglipe."

16 Kana dikhlja o šorutno pekari sar o Josif šukar tumačisada o suno, phenda lese: "I me dikhljem suno: Ko šoro sasa man trin korpe mangrenđe. 17 Ani upruni korpa sasa but vrste pecivura zako faraon, al xana len e čiriklja andari korpa savi sasa ko mo šoro."

18 O Josif vaćarda: "Akh so značil gova suno: Trin korpe si trin đive. 19 Vadži trin đive thaj o faraon ka čhinol ćo šoro thaj ka umlavol tut ko kaš, thaj e čiriklja ka xan tutar o mas."

20 Pale trin đive sasa e faraoneso bijando đive. Tegani o faraon ćerda baro xape sa pe službenikurenđe thaj ikalda angle lende e šorutne peharniko thaj e šorutne pekare. 21 E šorutne peharniko irisada ke leso than thaj vov palem čhuvola o pehari ane faraoneso va, 22 a e šorutne pekare obesisada. Sasa gija sar so o Josif tumačisada lenđe e sune.

23 Al o šorutno peharniko ni dija pe gođi e Josifese. Bistarda pe leste.