1 Jekh đive i Dina, i čhej sava bijanda i Lija e Jakovese, iklili te džal ke nesave džuvlja tare goja phuv. 2 Kana dikhlja la o Sihem, dolda la thaj suta lasa ki zor. (O Sihem sasa čhavo e Hamoreso e Hivijcoso savo sasa vladari gole phuvako.) 3 O Sihem but manglja e Dina, e Jakovese čheja, thaj voj sasa lese ano ilo, gija vov trudisajlo te dobil lako manglipe.

4 Tegani vaćarda o Sihem pe dadese e Hamorese: "Le manđe romnjaće kale čheja."

5 Kana o Jakov šunda kaj si lesi čhej i Dina ladžardi, lese čhave sesa ano polje e stokasa, thaj o Jakov ni manglja te ćerol khanči dži kaj von ni irin pe.

6 Tegani o Hamor, o dad e Sihemeso, avilo te vaćarol e Jakovesa. 7 Kana avile e Jakovese čhave taro polje thaj šunde so sasa, uznemirisajle but thaj sesa but holjame, golese so o Sihem, kana suta e Jakovese čhejasa, ćerda so ni smil te ćerol pe thaj anda bari ladž e Izraelese.

8 Tegani phenda lenđe o Hamor: "Mo čhavo o Sihem but manđol tumare čheja. Moliv tumen te den la te avol lesi romni. 9 Aven hanamika amencar – tumare čhejen den te aven amare romnja thaj tumen len amare čhejen. 10 Živin maškar amende thaj i phuv ka avol tumenđe putardi. Ane late živin, biknen thaj ćinen, thaj steknin tumenđe barvalipe kate."

11 Pale gova phenda o Sihem e Dinaće dadese thaj laće phralenđe: "Sikaven manđe milost thaj ka dav tumen sa so manđen. 12 Vaćaren i cena kobor manđen baši Dina thaj savo god daro manđen, thaj me ka dav tumen kobor ka manđen – samo den man la romnjaće."

13 Al sar o Sihem ladžarda lenđe pheja e Dina, e čhave e Jakovese ki prevara vaćarde e Sihemese thaj lese dadese e Hamorese, 14 golese gija phende lenđe: "Našti gova te ćera. Našti te da amare pheja biobrezime manušese, golese kaj gova bi avola bari ladž amenđe. 15 Amen ka ćera sar so mangljen, te postanisaden sar amen, gija so ka obrezin džijekhe murše maškar tumende. 16 Tegani ka da amare čhejen tumenđe, thaj amen ka la tumare čhejen amenđe. Ka živi maškar tumende thaj ka ava jekh narodo. 17 Al te ni šunden amen thaj te ni obrezisaljen, tegani ka la amare pheja thaj ka dža."

18 E Hamorese thaj lese čhavese e Sihemese kava predlog sasa šukar. 19 O Sihem sasa empoštujimo maškare sa ane po ćher pe dadeso, thaj ni ađućarda but te ćerol gova so rodije, golese so but manglja e Jakovese čheja. 20 Gija đele o Hamor thaj o Sihem ki kapija lenđe forosi, te vaćaren pe manušencar so bešena gothe:

21 "Kala manuša manđen te aven šukar amencar. Te mukha len te bešen kate maškar amende ani amari phuv, te šaj ćinen thaj biknen ane late. Isi than lenđe ki kaja phuv. Amen ka šaj te la lenđe čhejen thaj von šaj len amare čhejen. 22 Al kala manuša ka živin amencar sar jekh narodo, samo ako dži jekh murš maškar amende obrezil pe, sar so si von obrezime. 23 Na li lenđi stoka, lengo barvalipe thaj sa lenđe životinje ka aven amare? Golese, te ćera kova so von manđen thaj gija ka živin maškar amende."

24 Sa e murša save avile angli forosi kapija manglje te ćeren gija sar so phende o Hamor thaj leso čhavo o Sihem, thaj tegani obrezisajle sa e murša ane gova foro.

25 O trito đive, kana len vadži sesa dukha, o Simeon thaj o Levi, e duj čhave e Jakovese thaj e phrala e Dinaće, lije pe mačura, čorale đele ano foro thaj mudarde dži jekhe murše. 26 Mačosa mudarde e Hamore thaj lese čhave e Siheme, lije e Dina taro ćher e Sihemeso thaj đele. 27 Tegani avile avera čhave e Jakovese ko than kaj sasa kava mudardipe, thaj čorde sa andaro foro golese kaj lenđi phen sasa ladžardi. 28 Lije lenđe cikne thaj bare stoka, e heren thaj sa lengo so sasa ano foro thaj so sasa ano polje. 29 Inđarde sa lengo barvalipe, sa lenđe romnjen thaj lenđe čhaven, thaj čorde sa so sasa ane ćhera.

30 Tegani o Jakov vaćarda e Simeonese thaj e Levijase: "Čhuten man ano bilačhipe, golese so e manuša tare kala phuva, e Hanaanejcura thaj e Perižanura, ka zamrzin man. Amen sam zala manuša, thaj te von ćidije pe katane protiv mande thaj te čalade pe mande, ka ava mudarde me thaj me ćherutne."

31 Al von phende: "Našti vov amare phejasa te ćerol sar e bludnicasa!"