1 O Dol dija pe gođi taro Noja, tare sa e divlja životinje thaj tari sa i stoka savi sasa lesa ano brodo. Golese bičhalda balval te phurdol ki phuv thaj o paj lije te crdol pe. 2 Phanglile e izvora tare bare dubine thaj e nebose brane, thaj o bršnd ačhilo te perol taro nebo. 3 O paj lija te crdol pe tari phuv thaj pale šelupinda (150) đive lija gaći te šućol 4 kaj dešeftato (17․) đive ano eftato čhon o brodo ačhilo ko brego Ararat. 5 O paj crdola pe thaj šućola sa dži ko dešto (10․) čhon thaj ano angluno đive ko dešto čhon sikadile e vrhura tare planine.

6 A pale saranda (40) đive, putarda o Noja o džamo ko brodo savo ćerda 7 thaj mukhlja avri e gavrano. O gavrano letila avri thaj irila pe ko brodo, sa dži kaj ni šućilo o paj pi phuv. 8 Tegani o Noja mukhlja e golubica te dićhol dal crdija pe o paj tari phuv. 9 Al i golubica ni arakhlja than pe savo bi mućhola pe, golese kaj o paj vadži sasa ki sa i phuv, pa irisajli ko Noja ano brodo. Vov pružisada po va, dolda e golubica thaj irisada la ano brodo. 10 Ađućarda o Noja vadži efta đive thaj palem mukhlja e golubica taro brodo. 11 Angleder nego te perol i rat, i golubica irisajli ko Noja, thaj ano muj anda tek čhindi patrn tari maslina. Gija o Noja džanglja kaj crdija pe o paj tari phuv. 12 Tegani ađućarda vadži efta đive, thaj palem mukhlja e golubica, al voj ni irisajli lese.

13 Kana sasa e Noja šovšel thaj jekh (601) berš, ko angluno đive ano angluno čhon šućilo o paj tari phuv. O Noja putarda o krovo taro brodo thaj dikhlja kaj i phuv šućola. 14 Dži ke bište eftato (27․) đive ko dujto čhon sasa sa i phuv šući.

15 Tegani o Dol phenda e Nojase: 16 "Iklji taro brodo tu, ći romni, će čhave thaj lenđe romnja. 17 Ikal sa e vrste tare džuvde stvorenjura save si tusa: e čirikljen, e životinjen thaj sa e stvorenjuren save lazin ki phuv. Nek i phuv pherdol lencar, nek množin pe thaj nek bijandon ki phuv!"

18 Tegani iklile o Noja, lesi romni, lese čhave thaj lenđe romnja. 19 Sa e životinje, sa e stvorenjura save lazin ki phuv, sa e čiriklja – sa so phirol pi phuv – sa pale pe vrste iklile andaro brodo.

20 Tegani ćerda o Noja žrtveniko e GOSPODESE, lija tare sa e thode životinje thaj tare sa e thode čiriklja, thaj phabarda len ko žrtveniko sar phabardi žrtva.

21 O GOSPOD mirišisada gova lačho miris thaj vaćarda ane po ilo: "Ni ka dav vadži armaja i phuv bašo manuš, iako taro ternipe dol gođi bilačhe ane po ilo. Ni ka mudarav vadži sa e džuvde stvorenjuren, sar so ćerdem.

22 Sa dži kaj si i phuv,

sejipe thaj ćidipe,

šul thaj tatipe,

milaj thaj jevend,

o đive thaj i rat

ni ka ačhon."