MALUKO 5

Yesû wahandya mwana mukasi gûmo no washûla nsongwa kasi wa Yahilo

21 Kyaba Yesû egibwêlêle bwala bwa bûbele bwa siba, kibûngo kya bantû kimwalagele. Gee ûbele mwimane kûnkondo gya siba. 22 Onkao asile muntû gûmo mûkûlû wa sense gya milombelo gya Bayuda,*5.22 Sinagogi sina lyage Yailo. Kyaba kwamumwene Yesû, umugwêlêle kûmagûlû gage. 23 No umwisasile biiko no kwêsamba: "Mwanane nsongwa kasi wêabûsho kûkya. Nankwêsasa ndjûû umutenteke maboko, kûba ahande no kwêkana!"

24 Onkao Yesû ûgêle amo nage no kibûngo kikata kimulondile, balê bamuhininike mugela gonse.

25 Mu bûkata bwabo mubele mwana mukasi gûmo ûbele no mutongo gwa sûngwe*5.25 Mudjamba nsûsa mu kyaba kya miaka kumi no gibêle. 26 U susukile kû maboko ga batembi bangê. Noge usiminie lûheto lûngê, hamwene lûhandêlo ngikeno gyage gigêlêlêle kûba gibê. 27 Kyaba kyategelele musahû gwa Yesû, usile no kûtwela mubûkata bwa kibûngo kya bantû, wêmene nghimba gya Yesû no kukuma nkanso gyage. 28 Wêsambile mumutêma gwage: "Ntêê nene kukuma bishandê kyage shampande."

29 Onka alya kûsûswa kwa masi gage gakamine; noge wêtegeleshe kwana wahanda. 30 Onkao, Yesû usingûlwêle kwana bûkome bûmo bumuimine. Wêhûgulukile kwê kibûngo wêsambile: "Nani wakuma bishandê byane?"

31 Baana babûganga bage bamuêndwêle: "Onokûmona kibûngo byakilê kikwiininike mugela gonse; wêbûbûsha ntêê kwana wakuma nani?"

32 Mone Yesû ûlwele mugela gonse kibalo amwne muntû gûlya ûlongile nansho. 33 Gûlya mwana mukasi, utudjukile, no kûkwaka kibalo ûmanyine byonse bimuimine, usile kûgwêla kûmagûlû ga Yesû no kumulombola sitêê. 34 Mone Yesû umulombwele: "Nsongwa kasi wane, lwêtabêsho lobe lwa kûhandya. Bagala no angalê, mutongo gobe gwahanda mbeela."

35 Kyaba Yesû kyabele walisamba, bantû basile kû nsese gya Yahilo bamulombwele: "Nsongwa kasi obe wawa kûkya, kibalo kyakê wamudjembya mulangi?"

36 Mone Yesû halwele mwanda gwêsambilwe umulombwele: "Yahilo no katudjuki gitabêsha yaa." 37 No hatakêshe muntû alondane nage nambo Petelo, Shake*5.37 Yakobo no Yoano mwanabo. 38 Lwabaikele kû nsese gya Yahilo, Yesû ûmwene bantû balê mpewa mpewa, mukûlêla no djûê likata. 39 Ûtwelile mu nsese wêbalombwele: "Kibalo kyakê mwimpewa mpewa no malelo? Mwana hawakûkya, ûbêdjê!"

40 Mone bantû bamwadjile. Onkao Yesû wêbaiminie bonse andje, usigile shage no nyage wa mwana no baana babûganga bage bamusindêkêle, ûtwelile nabo mukyumba kya sense mubele mulale mwana. 41 Ûkwatile kûboko kwa mwana umulombwele: "Talita, kumi," nsitwe gyage, "Nsongwa kasi, nankûlombola byûka!"

42 Lwendo lûmo gûlya nsongwa kasi wêmene no kûbamba kûtamba. (Gûdjo nsongwa kasi ûbele no miaka kumi no gibêlê.) No bantû lwabamwene kilya kilongekile, begalagenie. 43 Yesû wêbakandile na bakalomboli muntû byagêlêka no wêbalombwele: "Bamuwe nsongwa kasi kya kûlya alye."