1 Mʉng’waka nʉikʉmi naɨtaano nʉakʉtema, ʉmʉtemi nʉitangwaa Tibelio. Pantio pilato aɨmʉkʉlʉ wihɨɨ akʉ Yʉdea. Helode aɨmʉkʉlʉ nʉa kʉ Galilaya, nʉ Pilipo mʉlunaakwe aɨmʉkʉlʉ nʉakʉ Itilea palʉng’wɨ nɨ Tilakiniti. Nʉ Lusania aɨmʉkʉlʉ nʉakʉ Abilene, 2 nʉ Anasi nʉ Kayapa akaze apolyi nɨakʉlʉ. Matungo nanso ʉlʉkani lang’wi Itunda lʉkamʉzɨɨla ʉ Yohana ng’wana wang’wa Zakalia ʉko kʉwɨɨ. 3 Yohana akalongola mumahɨɨ ɨhi nɨkolɨ mʉmpelo mpelo amongo nʉa Yolodani, wazeatanantɨlya ɨantʉ kila itʉnʉ abadisigwe Itunda wahume kʉlekela ɨmɨlandʉ ao. 4 Anga niiandɨkilwe mʉmbugulu ang’wa Isaya mʉmanga wang’wi Itunda kɨna,

"Lʉli nʉla mʉntʉ nʉkitanga muwii,

‘noneelyi inzila nʉkʉkiila Isekʉlʉ nʉɨkɨza,

gooli nʉziiza kiila.

5 makombogela ihi mʉnzila akʉtuhiilwa,

mʉigʉngʉʉku yʉkʉtalantaligwa.

Nzɨla niikunyangile yikugoolwa,

ni nzila nimbii yukunonigwa.

6 Antʉ ɨhi akʉona ʉponyi nʉʉkʉletwa ni Itunda."’

7 Yohana akatula atambʉɨla iumbɨ nɨlaantʉ naɨazile abadisigwe nʉng’wenso, "Ʉnyenye wileli nua nzoka. Nyenyu nʉmʉhʉgʉe kʉpona ikuo lang’wi Itunda nɨlɨpembilye? 8 Itʉmi intendo niikʉlagɨɨla kɨna milaa itʉnʉ. Hangɨ mʉleke kʉsɨgi mʉnkolo yanyu kɨna kʉkete tataa itʉ Ibulahimu. Kʉnsoko kʉmʉɨla, Itunda ʉhumile kʉmʉpa ʉ Ibulahimu ɨana kʉpuma mʉmagwe aya. 9 Nitungo ɨlɨ ihengo lahʉmbʉlwa kʉtema matina amɨtɨ. Mʉtɨ wɨhi nɨshanga wɨpaa inkalɨ ninziza ʉkʉteng’wa nʉkʉgʉmɨlwa mʉmoto."

10 Iantʉ naɨilʉndile pang’wanso akamʉkolya, "Kʉtende ʉlɨgwa?"

11 Yohana akaatambʉɨla, "Mʉntʉ nʉkete mɨjʉlʉngʉ ɨbɨɨlɨ nʉamomoele ʉyʉ nɨmʉgila anga mɨjʉlʉngʉ, nʉkete indya nʉamʉgeele ʉmʉnyanzala."

12 Nawa nɨɨhangʉlya impia akapembya ahume kʉbadisigwa, akamʉkolya, "Mʉmanyisi ʉsese itakɨwe kʉtendeʉlɨ?"

13 Yohana akaasʉkiɨlya, "Nɨmʉkʉhangʉlya impia leki kʉholi kʉkɨlɨnkɨɨlya mʉitakɨwe."

14 Amboi nɨenso akamʉkolya, "Aʉsese kʉtakɨwe kʉtendaʉlɨ?"

Akaaɨla, "Leki kʉmuhegelya mʉntʉ wɨhi ang’wɨ kʉmʉsongeela mʉntʉ wɨhi, mikʉte niipegwa nɨmʉkʉpegwa."

15 Antʉ naɨasʉmbɨɨye kʉpembya kʉng’wa Kilisito nʉhoilwe ni Itunda akatulasɨga mʉnkolo yao kɨna ʉ Yohana yʉyʉ ng’wenso Kilisito nʉholiwe ni Itunda. 16 Yohana akaatambʉila, "Ʉnene kʉmʉbadisa ʉnyenye kʉmazɨ. Ingɨ ʉpembilye ʉmʉnyangulu kʉkɨla ʉnene, nʉnene shanga nihumile kʉtolya ɨmɨkoha amakwasa akwe. Nʉanso ʉkʉmʉbadisa kʉ Ng’wahʉ wang’wi Itunda nʉ kʉmoto. 17 Mʉmʉkono wakwe ʉhoile kisela, nʉyo ʉkʉʉgɨɨlya ɨkɨʉga kakwe iza, wahume kʉpeta ʉilo nʉkʉɨkɨla misalanka lakwe, ipuko ʉkʉlisonsa mʉmoto nɨshanga wɨlimaa."

18 Mʉnkani niyanso nɨmaʉya ɨdʉ Yohana aiʉkenda ahʉgʉla nʉkʉakania nʉkʉatanantɨlya Nkani Nziza niang’wi Itunda. 19 Ingɨ Yohana naɨwamʉkenela ʉmʉtemi Helode kigazo nilakʉmʉtina ʉ Helodia mʉsʉngʉ wang’wa heu wakwe, nʉʉbɨ wɨdʉ naɨ witʉmile, 20 mʉtemi Helode akongeelya kitʉma ʉbɨ, akamʉamba ʉ Yohana nʉkʉmʉtunga mʉkadulumu.

21 Antʉ ɨhi naɨakʉbadisigwa, Yesʉ nʉng’weso wɨkabadisigwa. Yesʉ naɨʉkʉlompa, igʉlʉ lɨkalʉgʉka. 22 Ng’wahʉ wang’wi Itunda wɨkasima migʉlya akwe kʉpembelya kigʉlʉ kʉmpyani ankʉnda, lʉli kʉpuma kigʉlʉ lɨkigigwa, "Ʉewe wing’waane ninʉkʉloilwe, ʉnene naloeeligwa nʉewe."

23 Yesʉ naɨʉkandya kitʉma ʉmʉlimo wakwe aiʉkete myaka makʉmi ataatʉ, antʉ aɨamʉlɨngɨle kɨna ng’wana wang’wa Yusupu, Yusupu aɨng’wana wang’wa Eli, 24 Eli aɨng’wana wang’wa Matati nʉ Matati aɨng’wana wang’wa Lawi nʉ Lawi ʉyʉ aɨng’wana wang’wa Meliki nʉ Meliki aɨng’wana wang’wa Yanai nʉ Yanai aɨng’wana wang’wa Yusupu. 25 Yusupu aɨng’wana wang’wa Matatia nʉ Matatia ʉyʉ aɨng’wana wang’wa Amosi nʉ Amosi ʉyʉ aɨng’wana wang’wa Nahumu nʉ Nahumu aɨng’wana wang’wa Esili nʉ Esili aɨng’wana wang’wa Nagai. 26 Nagai aɨng’wana wang’wa Maati nʉ Maati aɨng’wana wang’wa Matatia nʉ Matatia aɨng’wana wang’wa Semeini nʉ Semeini aɨng’wana wang’wa Yoseki nʉ Yoseki aɨng’wana wang’wa Yoda, 27 Yoda aɨng’wana wang’wa Yoanani nʉ Yoanani aɨng’wana wang’wa Lesa nʉ Lesa aɨng’wana wang’wa Zelubabeli nʉ Zelubabeli aɨng’wana wang’wa Shealitɨeli nʉ Shealitɨeli aɨng’wana wang’wa Neli, 28 Neli aɨng’wana wang’wa Meliki nʉ Meliki aɨng’wana wang’wa Adi nʉ Adi aɨng’wana wang’wa Kosamu nʉ Kosamu aɨng’wana wang’wa Elimadamu nʉ Elimadamu aɨng’wana wang’wa Eli, 29 Eli aɨng’wana wang’wa Yoshua nʉ Yoshua aɨng’wana wang’wa Eliezeli nʉ Eliezeli aɨng’wana wang’wa Yolimu nʉ Yolimu aɨng’wana wang’wa Matati nʉ Matati aɨng’wana wang’wa Lawi, 30 Lawi aɨng’wana wang’wa Simeoni nʉ Simeoni aɨng’wana wang’wa Yʉda nʉ Yʉda aɨng’wana wang’wa Yosepu nʉ Yosepu aɨng’wana wang’wa Yonamu nʉ Yonamu aɨng’wana wang’wa Eliyakimu nʉ Eliyakimu aɨng’wana wang’wa Melea, 31 Melea aɨng’wana wang’wa Mena nʉ Mena aɨng’wana wang’wa Matata nʉ Matata aɨng’wana wang’wa Natani nʉ Natani aɨng’wana wang’wa Daudi, 32 Daudi aɨng’wana wang’wa Yese nʉ Yese aɨng’wana wang’wa Obedi nʉ Obedi aɨng’wana wang’wa Boazi nʉ Boazi aɨng’wana wang’wa Salimoni nʉ Salimoni aɨng’wana wang’wa Nashoni, 33 Nashoni aɨng’wana wang’wa Aminadabu nʉ Aminadabu aɨng’wana wang’wa Alamu nʉ Alamu aɨng’wana wang’wa Hesiloni nʉ Hesiloni aɨng’wana wang’wa Pelesi nʉ Pelesi aɨng’wana wang’wa Yʉda, 34 Yʉda aɨng’wana wang’wa Yakobo nʉ Yakobo aɨng’wana wang’wa Isaki nʉ Isaki aɨng’wana wang’wa Abulahamu nʉ Abulahamu aɨng’wana wang’wa Tela nʉ Tela aɨng’wana wang’wa Naholi, 35 Naholi aɨng’wana wang’wa Selugi nʉ Selugi aɨng’wana wang’wa Leu nʉ Leu aɨng’wana wang’wa Pelegi nʉ Pelegi aɨng’wana wang’wa Ebeli nʉ Ebeli aɨng’wana wang’wa Shela, 36 Shela aɨng’wana wang’wa Kenani nʉ Kenani aɨng’wana wang’wa Alipakisadi nʉ Alipakisadi aɨng’wana wang’wa Shemu nʉ Shemu aɨng’wana wang’wa Nuhu nʉ Nuhu aɨng’wana wang’wa Lameki, 37 Lameki aɨng’wana wang’wa Metʉsela nʉ Metʉsela aɨng’wana wang’wa Enoki nʉ Enoki aɨng’wana wang’wa Yaledi nʉ Yaledi aɨng’wana wang’wa Mahalaleli nʉ Mahalaleli aɨng’wana wang’wa Kenani, 38 Kenani aɨng’wana wang’wa Enoshi nʉ Enoshi aɨng’wana wang’wa Seti nʉ Seti aɨng’wana wang’wa Adamu nʉ Adamu aɨng’wana wang’wi Itunda.