Lucas 7

Ʉhʉɨɨli nʉamʉkʉlʉ nʉamʉmboi nʉa kʉ Loma

1 Yesʉ naɨwakondya kʉtambʉla inkani izi yɨhi kʉ antʉ naɨamʉtegeeye, akalongola mʉkɨsalɨ ka Kapelinaʉmu. 2 Kʉng’wanso aɨʉkolɨ mʉkʉlʉ wiumbɨ lamʉmboi nʉakʉ Loma. Mʉkʉlʉ wakwe aɨʉmʉloilwe ikilo, mʉntʉ ʉyʉ aimʉlwae do. 3 Mʉkʉlʉ ʉyʉ nʉa amboi naɨwakija inkani yang’wa Yesʉ, akaalagɨɨlya anyampala a Kiyahudi amʉlompe ʉ Yesʉ waze wamʉponye ʉmitʉmi wakwe. 4 Akamʉhanga ʉ Yesʉ akamʉpepeelya wamʉaɨɨlye Mʉkʉlʉ ʉyʉ nʉa amboi, akamʉɨla, "Itʉnʉ mʉntu ʉyʉ ʉtakɨwe kʉaɨɨligwa. 5 Kʉnsoko ɨɨza ʉaloilwe ɨantʉ itʉ hangɨ ʉkʉzengeeye nyʉmba akʉʉtankanɨla."

6 Yesʉ akityata nɨenso, naɨwamihumbeela ɨnyʉmba, mʉkʉlʉ ʉyʉ nʉa amboi akaalagɨɨlya ahʉmbaʉya amʉɨle ʉ Yesʉ, "Isekʉlʉ leka kiaja, ʉnene shanga ntakɨwe nʉkingɨlye mitolane. 7 Yiyo nsoko azamine shanga ntakɨwe kʉʉhumbeela. Ingɨ tambʉla lʉkani ʉdu ʉmitʉmi wane ʉkʉkomya. 8 Kʉnsoko ʉnene nkete akʉluane nɨantongee, nʉnene nkete amboi nɨnɨatongee. Anga nʉmʉɨle ʉng’wɨao, ‘Longola!’ nʉyo wilongola, hangɨ anga nʉmʉɨle ʉmʉya ‘Nzʉʉ!’ wɨpembyaa. Mʉtugwa wanega anga nʉmʉlagɨɨlye, ‘Itʉme kɨntʉ ɨkɨ’ nʉanso witʉma."

9 Yesʉ naɨwija inkani izi, akakʉɨlwa, akaapɨlʉkɨla ɨantʉ naɨityatile, akaatambʉɨla, "Nkɨlɨ kʉona nʉ mʉantʉ Aisilaeli ga mʉntʉ nʉkete ʉhʉɨɨlɨ nʉaitɨ."

10 Antʉ awa naɨatʉmilwe nʉ mʉkʉlʉ ʉyʉ nʉa amboi kʉng’wa Yesʉ, akatʉlya kito akahanga ʉmʉlwae wakomyaa.