ISANZU Bible Version 8

Mʉnanso wang’wa Yeilo ʉkiʉkigwa, nʉ mʉsʉngʉ ʉkʉponyigwa

40 Yesʉ naɨʉkʉtulya kʉpuma kitʉmbɨ nɨla Agelasi, akasingɨiligwa kʉʉlowa ʉkʉlʉ, kʉnsoko aɨamʉlindɨɨe. 41 Papo wa akɨza mʉntʉ ʉng’wɨ witangwaa Yeilo mʉtongeeli nʉa nyʉmba akʉtankanɨla Ayahudi akatugama pamɨgʉlʉ ang’wa Yesʉ, akamʉlompa alongolanie kitolakwe, 42 kʉnsoko mʉnanso wakwe kinyene nʉamyaka ikʉmi na ibɨɨlɨ aɨmʉlwae kʉhiya kʉsha.

Yesʉ naɨʉlongoe kʉ mʉntʉ ʉyʉ iumbɨ la antʉ aɨakʉmʉnyoma mpande yɨhi. 43 Mʉmilʉndo nʉanso aɨʉkolɨ mʉsʉngʉ ʉng’wɨ aɨwɨnyong’waa kʉpuma nɨsakami itungo lamyaka ikʉmi naɨbɨɨlɨ, mʉsʉngʉ aɨwaʉɨwe insao kʉnsoko akʉʉtankɨɨla ʉlwae ʉwʉ mʉalagʉli ɨdʉ, kʉtilɨ ʉmʉlagʉli naɨwahumile kʉmʉkɨlɨka. 44 Mʉsʉngʉ ʉyʉitɨ akamʉtyatɨɨla ʉ Yesʉ kʉnyuma akantomya ɨnsonge ngʉo lang’wa Yesʉ, itungo lɨlo sakami ɨkapela kʉpuma, akakomya. 45 Yesʉ akaakolya, "Nyenyu nʉtomilye ngʉo lane?" Antʉ ɨhi akalʉnga kɨna kʉtilɨ anga mʉntʉ wɨhi nʉtomilye. Petelo akamʉtambʉɨla, "Isekʉlʉ, milundo wɨhi ʉwʉ nʉaantʉ niakʉpɨlɨmikɨɨye nʉkʉʉnyoma."

46 Yesʉ akalʉnga, "Ʉkolɨ mʉntʉ ʉntomilye kʉnsoko kʉona ngulu impumile." 47 Mʉsʉngʉ ʉyʉ akaona kɨna ʉkʉleng’wa kipiha, akikumʉʉla kʉnʉ wazekagata nawoa, akagwa ʉundaala pamɨgʉlʉ ang’wa Yesʉ. Papo akandya kʉganʉla nɨkɨ ʉtomilye ngʉo lang’wa Yesʉ nɨitɨ nʉkomilye ɨndwala akwe. 48 Yesʉ akamʉɨla mʉsʉngʉ ʉyʉ, "Mʉnanso, ʉhʉɨɨlɨ wako wakoponia, longola nʉʉlowa wang’wi Itunda."

49 Yesʉ naɨwakɨlɨ ʉlongolekile kʉtambʉla, mʉntʉ ʉng’wɨ akapembya kʉpuma mʉnyʉmba ang’wa Yailo akamʉletela mpola. "Ntʉnigwa nʉkʉkʉnyoma ʉ Mʉmanyisi kʉ mʉnanso wako wakʉza?"

50 Yesʉ naɨwija inkani izi akamʉtambʉɨla ʉ Yailo, "Leka kogopa, nihuiile ʉdu, mʉnanso wako ukukomya."

51 Sʉnga Yesʉ akalongola kʉng’wa Yailo, naɨapikɨɨla mʉnyʉmba shanga akaagombya mʉntʉ wɨhi kingɨlania, ingɨ Petelo nʉ Yohana nʉ Yakobo nialeli amʉnanso. 52 Anyasʉka akaze alongolekile kʉlɨla nʉkihongeelya kʉnsoko asʉka. Yesʉ akaaɨla, "Leki kʉlɨli kʉnsoko ʉng’wana ʉyʉ shanga ʉkʉle, ingɨ ʉlae!"

53 Anyasʉka akaheka nʉkʉmʉdalaha ʉ Yesʉ kʉnsoko nɨanso aɨaine kɨna ʉmʉnanso wakʉzaa kalɨ.

54 Ingɨ Yesʉ akaʉamba ʉmʉkono wamʉnanso nʉkitanga, "Ʉewe mʉnanso ʉka." 55 Itungo lɨlo mʉnanso akapangataala akaʉka. Yesʉ akaaɨla ɨaleli akwe amʉpe indya. 56 Ingɨ aleli amʉnanso ʉyʉ akakʉɨlwa, Yesʉ akaagilya aleke kʉganʉla kʉ mʉntʉ wɨhi aya natendekile.