1 Yesʉ wɨkalongeleka kʉmanyisa, "Mʉkendegeele nɨ mʉkitʉma intendo yanyʉ ninza, mʉleke kitʉma pa ntongeela yaantʉ mʉhʉme kʉgozwa nɨ antʉ ʉdu, kʉsoko anga mʉtende itɨ, shanga mʉkʉpegwa anga kɨpegwa nʉ Tata anyʉ nʉa kigʉlʉ.

2 Ingɨ, nɨmʉkʉaɨɨlya akʉmbɨli, leka kitanantya kʉ antʉ. Ʉleke kʉtenda anga atambʉla ʉteele nɨɨtambʉla mʉnkɨka nɨɨtankanɨlya Ayahudi nʉ mʉnzila, ahʉme kʉkʉligwa nɨantʉ. Tai nʉmʉtaambʉɨe nɨanso apantɨkile kɨpegwa kao. 3 Ingɨ ʉewe nʉkʉmʉaɨɨlya mʉkʉmbɨli, tenda itɨ ga nʉ mʉhʉmba mɨako nʉa pakupɨ waleke kʉlɨnga nʉkɨtendile. 4 Kʉitɨ ikani nɨlanso lɨkʉtula la ʉnkunku kʉng’wako, nʉ Tata wako nʉwɨona nʉkɨtendile kɨnkunku, ʉkʉʉpa kɨpegwa.

5 Kʉlʉlo gwa, "Nʉnyenye nɨmʉkʉmʉlompa, mʉleke kʉtenda anga atambʉla ʉteele nɨɨtenda. Kʉnsoko nɨanso ilowa kʉmʉlompa Itunda azeimɨkile kʉ ntongeela nyʉmba niya kʉtankanɨla Ayahudi nʉ mʉmpelo mpelo nɨya nzɨla ɨantʉ ahʉme kʉakʉlya. Itaɨ kʉmʉtambʉɨla, awaitɨ apantɨkile ɨkɨpegwa kao. 6 Ingɨ ʉewe nʉkʉmʉlompa Itunda, ingɨle kʉmbele, ʉsʉshe mʉlango, sʉnga wandye kʉmʉlompa ʉ Tata ako nɨshanga wɨgela kikelʉ. Nʉng’wenso nʉɨona nakɨnkʉnkʉ ʉkʉʉpa kɨpegwa kako.

7 ‘Ʉnyenye nɨmʉkʉlompa, mʉzeleka kʉtula ninkani yɨdʉ nɨmagila anga ndogoelyo, kʉnsoko nɨ antʉ nɨshanga amʉlɨngile Itunda ɨtenda ʉʉ, nɨanso ɨza alʉngile akʉtegeeligwa kʉnsoko a ʉdʉ wankani yao. 8 Mʉleke kʉlompa anga enso, kʉnsoko ʉ Tata wanyʉ ʉlɨngile nɨ mʉmaloilwe ize mʉkɨlɨ kʉmʉlompa. 9 Kʉitɨ, Yesʉ wɨkalongoleka kʉaɨla, nɨmʉkʉmʉlompa Itunda, mʉzelompa itɨ,

‘Tata wɨtʉ nʉkolɨ kigʉlʉ,

Lina lako lɨkʉligwe.

10 Ʉtemi nʉako ʉze.

Lɨhi nʉloilwe lɨtendeke mihɨɨ anga nɨlɨtendeka kigʉlʉ.

11 Ʉkʉpe lelo ndya yitʉ anga nʉwɨkʉpeza

12 Ʉkʉlekele imagazo itʉ,

anga ʉsese nɨkɨalekela nɨakʉgazɨɨye.

13 Ʉleke kʉʉtwala mʉʉgeng’wa.

Ingɨ ʉkʉgune mʉmagemo ang’wa shetani.’

14 "Kʉnsoko anga mʉalekele ɨantʉ magazo ao nɨamʉtendee, nʉ Tata wanyʉ ga nʉa kigʉlʉ ʉkʉmʉlekela magazo anyʉ. 15 Ingɨ anga mʉhite kʉalekela ɨantʉ magazo ao, nʉ Tata wanyʉ ga shanga ʉkʉmʉlekela ʉnyenye magazo anyʉ.

16 Yesʉ wɨkalongoleka kʉmanyisa, wɨkaaila, "Mʉleke kʉtʉla nʉʉkɨa itʉngo nɨmʉgwaɨye kʉlya anga atambʉla ʉteele. Nɨanso ɨhininala kʉ ʉsʉ aonwe nɨantʉ kɨna agwaiye kʉlya. Kʉmʉila taɨ nɨanso apantikile ɨkɨpegwa kao. 17 Ingɨ ʉewe nʉgwaiye kʉlya, kalala ʉ ʉso wako wikʉye kɨlaha mitwe, 18 ingɨ mʉntʉ wɨhi waleke kʉlɨnga kɨna ʉewe ʉgwaiye kʉlya, walɨnge ʉ Tata ako du nɨshanga wigela. Nʉ Tata ako nʉɨona aya nʉkitʉma kɨnkunku ʉkʉʉpa kɨpegwa kako.

19 Yesʉ wɨkalongoleka kʉaɨla, "Mʉleke kiɨkɨlya Kɨʉto kansao yanyʉ mʉnʉ mihɨɨ mʉ kutu nɨ maling’wana nɨ mabɨɨ ikanza nɨ ii ɨkumʉla nʉkɨa. 20 Iikilyi insao kigʉlʉ kʉtu nɨ maling’wana nɨ mabɨɨ shanga ɨkanza, nɨ ii shanga ingɨla kia. 21 Kʉnsoko pa kɨʉto ka nsao yako kɨkolɨ, papo nɨ nkolo ako ɨkikiɨ.

22 Yesʉ wɨkalongoleka kʉaɨla, "Liho lako ingɨ nzelya a mʉili. Anga ɨze liho lako ipanga, nʉ mʉili wako wɨhi ʉkʉtʉla ʉkolɨ mʉ nzelya. 23 Ingɨ anga ɨtʉle iliho lako labɨpile, nʉmʉili ʉkʉtula mʉkiti. Ʉʉgwa anga ɨtule nzelya mʉnkolo ako kiti, ɨkiti nɨkanso kɨkʉtula kiti kigɨngu.

24 Yesʉ wɨkaaɨla, "Kʉtilɨ mʉntʉ nʉhʉmile kʉitʉmɨla akʉlʉ abɨɨlɨ itʉngo lɨng’wɨ, kʉnsoko ʉkʉmʉbɨpɨlwa ʉyʉ nʉkigombya nʉyʉ nʉa kabɨɨlɨ; ang’wɨ akʉkamantana nʉng’wɨao nʉ kʉmʉkepya ʉmʉya. Shanga mʉhʉmile kʉmitʉmila Itunda ni nsao.

25 "Yɨyɨ nsoko kʉmʉila, mʉleke kʉsɨga mʉkʉlya ang’wɨ mʉkʉngwa ntʉni mʉhʉme kishiɨ, ang’wɨ matʉgalo nɨmʉloilwe kʉtʉgala. Ʉlɨkalo shanga lʉkʉlʉne kʉkɨla indya? Ang’wɨ mʉili shanga ʉkʉlɨne kʉkɨla ɨmatʉgalo, 26 Kolwi nyʉnyɨ, shanga yilɨma hangi shanga ipʉla, hangi ngilanga masalanka. Nɨitɨ ga, Tata wanyʉ nʉa kigʉlʉ wɨilɨsa. Itɨɨ, ʉnyenye shanga mʉsanigwe ne kʉkɨla inyʉnyi? 27 Itɨɨ, mʉntʉ wɨhi mʉng’wanyu ʉhumile kɨaja wɨongeelye lʉhikʉ lʉng’wɨ nʉla kishiɨ?

28 "Nɨkɨ mʉkʉsɨga matʉgalo? Kolwi impʉmbʉʉlʉ niya mʉwɨɨ niidemile. Shanga yitʉma anga mʉlimo ang’wɨ kʉtuma matugalo. 29 Ingɨ kʉmʉila, nʉ Solomoni ga palʉng’wɨ nʉ ʉgolɨ wakwe wɨhi shanga aɨ wɨtugalaa iza kʉkɨla mpʉmbʉʉlʉ niyanso. 30 Anga itʉle, Itunda wɨmatʉgalya iza itʉtʉ nɨla mʉng’wapo lelo nɨlɨkolɨ nʉ mʉdaʉ ɨnyalaa. Itɨɨ ʉnyenye, Itunda shanga ʉkʉmʉtʉgala iza kʉkɨla nanso? Ʉnyeye nimʉkepewe nʉ ʉhʉɨɨli!

31 Kʉlʉlo, mʉleke kʉtʉla nʉ woa, kɨna kʉʉlya ntʉni ang’wɨ kʉʉng’wa ntuni ang’wɨ kʉʉtʉgala ntʉni! 32 Kʉnsoko antʉ nɨshanga amʉlɨngile Itunda wawo iaja kʉnkani niyanso. Tata wanyʉ nʉa kigʉlʉ ʉlɨngile kɨna mʉtakile maintʉ nanso ɨhi. 33 Itɨ gwa, ʉdumi Ʉtemi wang’wi Itunda, nayo nɨmangɨɨza ɨhi mʉkʉkoteeligwa. 34 Itɨgwa leki kʉsɨgi mʉdaʉ ʉkela ʉlɨ, kʉnsoko namʉdaʉ ʉlɨngile Itunda. Ʉlwago nʉla lʉhikʉ lʉng’wɨ lʉkondile lʉlo.