ଇସ୍ୱରନ୍ ଅବ୍ରାମନ୍ଆଡଙ୍ ଓଡ୍ଡେଏନ୍
1 ପ୍ରବୁନ୍ ଅବ୍ରାମନ୍ଆଡଙ୍ ବରେନ୍, "ଆମନ୍ ଡେସାନମ୍, ଅସିଂମର୍ନମ୍ଜି, ଡ ଆପ୍ପେୟ୍ନମ୍ ଆସିଂ ଅମ୍ରେଙା, ଆରି ଞେନ୍ ଅଙ୍ଗା ଡେସା ଅବ୍ତୁୟ୍ତମ୍ ତି ଆଡେସା ଜିରା । 2 ଞେନ୍ ଆମନ୍ଆଡଙ୍ ଗୋଗୋୟ୍ କେଜ୍ଜାମର୍ ଏମ୍ମେତମ୍, ଆରି ଞେନ୍ ଆମନ୍ଆଡଙ୍ ଆସିର୍ବାଦତମ୍ ଆରି ଅଞୁମ୍ନମ୍ ଅଡ଼୍କୋ ମନ୍ରାନ୍ ଜନାତଜି, ଆମନ୍ ମନ୍ରାଞ୍ଜିଆଡଙ୍ ଆସିର୍ବାଦନ୍ ତିୟ୍ତଜି ।
3 ଆନାଜି ଆମନ୍ଆଡଙ୍ ଆସିର୍ବାଦତମ୍ଜି ଞେନ୍ ଆନିଞ୍ଜିଆଡଙ୍ ଆସିର୍ବାଦତାୟ୍,
ବନ୍ଡ ଆନାଜି ଆମନ୍ଆଡଙ୍ ସୟ୍ପତମ୍ଜି ଞେନ୍ ଆନିଞ୍ଜିଆଡଙ୍ ସୟ୍ପତାଜି ।
ଆରି ଅମଙ୍ବାନମ୍ ସିଲଡ୍ ସମ୍ପରା ପୁର୍ତିନ୍ ଆକେଜ୍ଜାଜି ଆସିର୍ବାଦନ୍ ଞାଙ୍ତଜି ।"
4 ଅବ୍ରାମନ୍ ୟାକୁଡ଼ି ପନ୍ଦର ବର୍ସେଙ୍ ଆଡ୍ରେଏନ୍ ଆଡିଡ୍, ପ୍ରବୁନ୍ ଆବର୍ରେନ୍ ଅନ୍ତମ୍ ଅବ୍ରାମନ୍ ଆରୋଣ ଡେସାନ୍ ସିଲଡ୍ ଡୁଙ୍ଲନେ, ଲୋଟନ୍ ଆନିନ୍ ସରିନ୍ ଜିରେନ୍ । 5 ଅବ୍ରାମନ୍ ଆଡୁକ୍ରିନ୍ ସାରିନ୍ ଡ ଆପୁତ୍ରା ଅନନ୍ ଲୋଟନ୍ ସରିନ୍ ଆରୋଣ ଡେସାଲୋଙନ୍ ଡକୋଡାଲନ୍ ଆନର୍ଜେଞ୍ଜି ଡ ଆଞରାଙେଞ୍ଜି ଆ ଜନ୍ତୁଜି ପାଙ୍ଲେ କିଣାନ ଡେସାନ୍ ଆଜନିର୍ ଆସନ୍ ଡୁଙ୍ଜଙ୍ଲଞ୍ଜି । 6 ତି ଆ ଡେସାଗଡ୍ ଅବ୍ରାମନ୍ ଜିର୍ରେ ମଡ଼ିର୍ ସିକିମ୍ ଆତୁୟାୟ୍ ମୋରିର ଅଲୋଙ ଅରାନୁବନ୍ ଆଜାୟ୍ତା ଅଡ଼ୋଏଞ୍ଜି, ତି ଆବନେଡ଼ା ତେତ୍ତେ କିନାନିଅ ମରଞ୍ଜି ଡକୋଲଞ୍ଜି । 7 ଇସ୍ୱରନ୍ ଅବ୍ରାମନ୍ଆଡଙ୍ ଅବ୍ଗିୟ୍ତାଲନ୍ ବରେନ୍, "କେଜ୍ଜାମର୍ନମ୍ଜି କେନ୍ ଆଡେସା ଞେନ୍ ତିୟ୍ତାଜି ।" ଅବ୍ରାମନ୍ ଆ ଡରକୋନେଲୋଙନ୍ ଇସ୍ୱରନ୍ ଆଞୁମ୍ଲୋଙନ୍ ଅବୟ୍ ତନମ୍ପେଲନ୍ ତୁବେନ୍ । 8 ଆନିନ୍ କେନ୍ ଆଡ୍ରକୋନେଲୋଙ୍ ଅମ୍ରେଙ୍ଲେ ବେତେଲ୍ ଆ ଡରୁଙ୍ୟୋଙ୍ ଆବରୁବା ଜିର୍ରେ ତମ୍ବୁସିଙନ୍ ତୁବ୍ଲେ ଡକୋଲନ୍ ଆରି ଡରୁଙ୍ୟୋଙ୍ଗଡ୍ ଅୟ ଡେସାନ୍ ଡକୋଏନ୍ । ତେତ୍ତେ ପ୍ରବୁନ୍ ଆସନ୍ ଅବୟ୍ ତନମ୍ପେଲନ୍ ତୁବ୍ଲେ ପ୍ରବୁନ୍ ଆଞୁମ୍ଲୋଙ୍ ପାର୍ତନାଲନ୍ । 9 ଅବ୍ରାମନ୍ ବୁଲ୍ଲେବୁଲ୍ଲେଲେ ଅର୍ଜଡ଼ୋମ୍ସିଗଡ୍ ଜିରେନ୍ ।
ମିସରଡେସାଲୋଙନ୍ ଅବ୍ରାମନ୍
10 ତି ଆବନେଡ଼ା କିଣାନ୍ ଡେସାନ୍ ଆକ୍ରାନ୍ତାରାଏନ୍ ଆସନ୍ ଅବ୍ରାମନ୍ ମିସର୍ ଡେସାନ୍ ଡକୋନେନ୍ ଆସନ୍ ଜିରେନ୍ । 11 ମିସର୍ ଡେସାନ୍ ଅନ୍ରଙ୍ ଗନେଞ୍ଜି ଆମ୍ମୁଙ୍ ଅବ୍ରାମନ୍ ସାରିନ୍ଆଡଙ୍ ବରେନ୍, "ଞେନ୍ ଜନା ଗନିୟ୍ଗିୟ୍ଲୋଙନ୍ ଆମନ୍ ମାଡ୍ଡ ମନଙ୍ ରାଙ୍ଡାତମ୍ । 12 ତିଆସନ୍ ମିସର୍ ଡେସାନ୍ ଆ ମନ୍ରାଜି ଆମନ୍ ଗିୟ୍ଲେ, ଆଡୁକ୍ରିନ୍ ଗାମ୍ଲେ ଜନାଏଞ୍ଜିଡେନ୍, ଆନିଞ୍ଜି ଞେନ୍ଆଡଙ୍ ରବ୍ବୁତିୟ୍ଞ୍ଜି ଆରି ଆମନ୍ ଆମେଙ୍ ଡକ୍କୋତମ୍ଜି । 13 ତିଆସନ୍ ଞେନ୍ ଆ ତନାନନ୍ ଗାମ୍ଲେ ଆମନ୍ ଆନିଞ୍ଜିଆଡଙ୍ ବରାଜି; ଏତ୍ତେଲ୍ଡେନ୍ ଆମନ୍ ଆସନ୍ ଆନିଞ୍ଜି ଞେନ୍ଆଡଙ୍ ଅଃରବ୍ବୁଇଞ୍ଜି ଆରି ଞେନ୍ ଡନୋବନ୍ ଞାଙ୍ତାୟ୍ ।" 14 ଅବ୍ରାମନ୍ ମିସର୍ ଡେସାନ୍ ଇୟ୍ଲେ ଗନେନ୍, ମିସରନ୍ ଆ ମନ୍ରାଜି ସାରିନ୍ଆଡଙ୍ ଗିୟ୍ଲାଜି, ସାରିନ୍ ମନଙ୍ଡନ୍ ରାଙ୍ଡାଏନ୍ । 15 ଆରି, ପାରୋନ୍ ଆ ମନ୍ତ୍ରିଜି ଆନିନ୍ଆଡଙ୍ ଗିୟ୍ଲେ ପାରୋନ୍ ଆତେମଡ୍ ସେନେଞ୍ଜି, ତି ଆଇବୟ୍ ପାରୋନ୍ ଆସିଙ୍ ଓରୋଙେଞ୍ଜି । 16 ସାରାନ୍ ଆସନ୍ଗାମ୍ଲେ ପାରୋନ୍ ଅବ୍ରାମନ୍ଆଡଙ୍ ମନଙ୍ ଗିଜେନ୍ ଆରି ଆନିନ୍ଆଡଙ୍ ମେଣ୍ଡାନ୍, କିମେଡନ୍, ତାଙ୍ଲେୟନ୍, ଗୋଡୋଞନ୍, ଓଟନ୍, ଆରି କମ୍ବାରିବଜଞ୍ଜି ଡ କମ୍ବାରିମରଞ୍ଜି ତିୟେନ୍ ।
17 ବନ୍ଡ ରାଜାନ୍ ଅବ୍ରାମନ୍ ଆଡୁକ୍ରି ସାରିନ୍ ଆରୋରୋଙେନ୍ ଆସନ୍ ଆ ମନ୍ରାଞ୍ଜିଆଡଙ୍ ପ୍ରବୁନ୍ ବରନ୍ତଙନ୍ ଆରୋଗାଜି ଆପ୍ପାୟେନ୍ । 18 ତି ସିଲଡ୍ଲ୍ଲନ୍ ପାରୋନ୍ ଅବ୍ରାମନ୍ଆଡଙ୍ ଓଡ୍ଡେଲେ ବରେନ୍, "ଆମନ୍ ଞେନ୍ ସରିନ୍ ଇନି ଆସନ୍ କେନ୍ ଏନ୍ନେଲେ ଲୁମେନ୍ ? ଆନିନ୍ ଡୁକ୍ରିଞେନ୍ ଗାମ୍ଲେ ଇନିବା ଞେନ୍ଆଡଙ୍ ଅଃବର୍ରିଁୟ୍ ? 19 ଆନିନ୍ ତନାନ୍ଞେନ୍ ଗାମ୍ଲେ ଆମନ୍ ଇନିବା ବର୍ରନେ, ଆରି ଆନିନ୍ ଡୁକ୍ରିଞେନ୍ ଗାମ୍ଲେ ଅଃବର୍ରିଁୟ୍ ? କେରେ ଡୁକ୍ରିନମ୍; ଆନିନ୍ଆଡଙ୍ ଓରୋଙା ।" 20 ତି ସିଲଡ୍ଲ୍ଲନ୍ ପାରୋନ୍ ଆମନ୍ରାଞ୍ଜିଆଡଙ୍ ବରେଞ୍ଜି ମିସର୍ ଡେସାନ୍ ସିଲଡ୍ ଅବ୍ରାମନ୍ ଡ ଆଡୁକ୍ରିନ୍ ଆରି ଆନର୍ଜେଞ୍ଜି ଞମ୍ଲେ ଜିରେତୋ ।
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)