1 କେନ୍‌ ଅଡ଼୍‌କୋନ୍‌ ଆଡ୍ରେନ୍‌ ସିଲଡ୍‌ ଇସ୍ୱରନ୍‌ ଅବ୍ରାଆମନ୍‌ ଆଡର୍ନେ ଆତନୋର୍‌ । ଆନିନ୍‌ ଆନିନ୍‌ଆଡଙ୍‌ ଓଡ୍ଡେଏନ୍‌, "ଅବ୍ରାଆମନ୍‌" ଆରି ଅବ୍ରାଆମନ୍‌ ଜାଲଙେନ୍‌, "ଞେନ୍‌ ତ୍ତେନେ ଡକୋ ।"

2 ତିଆଡିଡ୍‌ ଇସ୍ୱରନ୍‌ ଗାମେନ୍‌, "ଆମନ୍‌ ନମି ଆବୟନ୍‌ ଡାଙ୍ଗାଡ଼ାଅନ୍‌ନମ୍‌ଆଡଙ୍‌," "ଆନାଆଡଙ୍‌ ଆମନ୍‌ ଡୁଙ୍‌ୟମ୍‌ତେ, ତି ଆ ଇସାକ ବାତ୍ତେ ମୁରିଆ ଡେସାବାନ୍‌ ଜିର୍ବା ଆରି ତି ଆଡେସାଲୋଙ୍‌ ଅଙ୍ଗା ଆ ବରୁ ଗାମ୍‌ତବେନ୍‌ ତି ଆ ବରୁ ଆତୋଣ୍ଡୋ ଆନିନ୍‌ଆଡଙ୍‌ ତନୁମ୍ମୋଡ୍‌ ଅନମଙନ୍‌ ତିୟା ।"

3 ଅବ୍ରାଆମନ୍‌ ଅନ୍‌ରଙନ୍‌ ଡୋତାନ୍‌ ଡୋଲନ୍‌ ଗୋଡୋୟଁନ୍‌ ଆଡଅଙ୍‌ଲୋଙ୍‌ ଆଜ୍ଜାୟ୍‌ଲେ ଆ ଅନନ୍‌ ଇସାକନ୍‌ ଡ ବାଗୁ କମ୍ୱାରିମରନ୍‌ ସରିନ୍‌ ଓରୋଙେନ୍‌, ଆରି ସନୟନ୍‌ ଆସନ୍‌ ଅଙଲନ୍‌ ଡେୟ୍‌ଡେୟ୍‌ଲେ ଇସ୍ୱରନ୍‌ ଆବର୍ରନ୍‌ ଆବରୁବା ଜିରେଞ୍ଜି । 4 ଏର୍ତାଲୋଙ୍‌ ଅବ୍ରାଆମନ୍‌ ସଙାୟ୍‌ ସିଲଡ୍‌ ତି ଆଡ୍ରକୋନେ ଗିଜେନ୍‌ । 5 ତିଆଡିଡ୍‌ ଅବ୍ରାଆମନ୍‌ ଆକମ୍ୱାରିଞ୍ଜିଆଡଙ୍‌ ବରେଞ୍ଜି, "ଆମ୍ୱେନ୍‌ କେନ୍‌ ତେନ୍ନେ ଗୋଡୋୟଁନ୍‌ ସରିନ୍‌ ଡକୋନାବା, ଞେନ୍‌ ଡ ପସିଜନ୍‌ ବାଗୁନ୍‌ଲେନ୍‌ ତି ଆଡ୍ରକୋନେ ଇୟ୍‌ଲେ ସେଙ୍କେଡାଲେ ଅମଙ୍‌ବାବେନ୍‌ ଏୟର୍ତନାୟ୍‌ ।"

6 ସିଲତ୍ତେ ଅବ୍ରାଆମନ୍‌ ଅନମଙନ୍‌ ଆସନ୍‌ ଅଙଲନ୍‌ ପାଙ୍‌ଲେ ଆ ଡାଙ୍ଗଡ଼ାଅନନ୍‌ ଇସାକନ୍‌ ଆତାରଙ୍‌ଲୋଙ୍‌ ଅଃବୋୟ୍‌ଲେ ଆସିଲୋଙନ୍‌ ତଗୋନ୍‌ ଡ କୁଣ୍ତିନ୍‌ ଞମ୍‌ଲେ ଜିରେଞ୍ଜି । ଆରି ବାଗୁଞ୍ଜି ମାୟ୍‌ଲନ୍‌ ଜିରେଞ୍ଜି, 7 ଆରି ଇସାକନ୍‌ ଆପ୍ପେୟନ୍‌ ଅବ୍ରାଆମନ୍‌ଆଡଙ୍‌ ଓଡ୍ଡେଲେ ବରେନ୍‌, "ଏ ଆପ୍ପେୟ୍‌"

ଆନିନ୍‌ ଜାଲଙେନ୍‌, "ଅଅନ୍‌, ଇନି ଞେନ୍‌ ତେନ୍ନେ ଡକୋ ।"

ଇସାକନ୍‌ ବର୍ରନେ, "ଞେନ୍‌ ତେନ୍ନେ ତଗୋନ୍‌ ଡ ଅଙଲନ୍‌ ଗିୟ୍‌ତାୟ୍‌, ବନ୍‌ଡ ଅନମଙନ୍‌ ଆସନ୍‌ ମେଣ୍ଡାନ୍‌ ଆ ଅନ୍‌ ଅଙ୍ଗା ?"

8 ଅବ୍ରାଆମନ୍‌ ଗାମେନ୍‌, "ଅଅନନ୍‌, ଇସ୍ୱରନ୍‌ ଆନିନ୍‌ଡମ୍‌ ଅନମଙନ୍‌ ଆସନ୍‌ ଆଅନ୍‌ ମେନନ୍‌ ତିୟ୍‌ତିୟ୍‌ଲଙ୍‌ତନ୍‌ ।" ଆରି ବାଗୁଞ୍ଜି ମାୟ୍‌ଲନ୍‌ ଜିରେଞ୍ଜି ।

9 ଆରି ଇସ୍ୱରନ୍‌ ଆଗ୍ରବ୍‌ରିଏନ୍‌ ଆଡ୍ରକୋନେଲୋଙ୍‌ ଅଡ଼ୋଏଞ୍ଜି ଆରି ଅବ୍ରାଆମନ୍‌ ତେତ୍ତେ ଅବୟ୍‌ ତନମ୍ପିଲନ୍‌ ତୁବେନ୍‌ ଆରି ତେତ୍ତେ ଅଙଲନ୍‌ ତୁବେରେନ୍‌ । ଆନିନ୍‌ ଆ ଡାଙ୍ଗଡ଼ାଅନନ୍‌ ଇସାକନ୍‌ଆଡଙ୍‌ ଜିଲେ ତନମ୍ପିଲନ୍‌ ଆଙଲ୍‌ଲୋଙ୍‌ ଅବ୍‌ଲୁଲୁଡେନ୍‌ । 10 ଅବ୍ରାଆମନ୍‌ ଆ ଡାଙ୍ଗଡ଼ାଅନନ୍‌ଆଡଙ୍‌ ରନବ୍ବୁନ୍‌ ଆସନ୍‌ କୁଣ୍ତିନ୍‌ ଞମ୍‌ଲେ ଆଙ୍‌ତାରେନ୍‌ । 11 ତି ଆବନେଡ଼ା ରୁଆଙନ୍‌ ସିଲଡ୍‌ ପ୍ରବୁ ଆ ପାଙ୍‌ଲଙ୍‌ବର୍‌ମର୍‌ ଆନିନ୍‌ଆଡଙ୍‌ ଓଡ୍ଡେଲେ ବରେନ୍‌, "ଏ ଅବ୍ରାଆମ୍‌, ଏ ଅବ୍ରାଆମ୍‌!"

ଆନିନ୍‌ ଜାଲଙେନ୍‌, "ଗିଜା, ଞେନ୍‌ ତେନ୍ନେ ।"

12 ତି ସିଲଡ୍‌ଲ୍ଲନ୍‌ ଆନିନ୍‌ ବର୍ରନେ, "ଆମନ୍‌ ପସିଜନ୍‌ ଆରନବ୍ବୁ ଆସନ୍‌ ଅସିନମ୍‌ ଆଙ୍‌ତାର୍‌ଡଙ୍‌ ଆରି ଆନିନ୍‌ଆଡଙ୍‌ ଇନ୍ନିଙ୍‌ ଏଙ୍ଗାଡଙ୍‌," ଇନିଆସନ୍‌ଗାମେଣ୍ଡେନ୍‌ ଆମନ୍‌ ଇସ୍ୱରନ୍‌ଆଡଙ୍‌ ବତଙ୍‌ତମ୍‌, "ନମି ଞେନ୍‌ ଜନାଲିଁୟ୍‌; ଇନିଆସନ୍‌ଗାମେଣ୍ଡେନ୍‌ ଆମନ୍‌ ଞେନ୍‌ ଆତନିୟ୍‌* ଆସନ୍‌ ଆବୟନ୍‌ ଡାଙ୍ଗାଡ଼ାଅନ୍‌ନମ୍‌ ଅଃନସାଲମ୍‌ ।"

13 ଅବ୍ରାଆମନ୍‌ ଆୟର୍‌ଗୁଡ଼ିଃଲନ୍‌ ଆଗ୍ରିଜେନ୍‌ ଅବୟ୍‌ ଆଡେରିଙନ୍‌ ଡକୋନ୍‌ ଅବୟ୍‌ ମେଣ୍ତାନ୍‌ ବୁଡ୍ଡାଲୋଙନ୍‌ ଆଗଲ୍‌ନେ ଗିଜେନ୍‌ । ଅବ୍ରାଆମନ୍‌ ଇୟେନ୍‌ କି ଇୟ୍‌ଲେ ପାଙେ ଆରି ଆ ଡାଙ୍ଗଡ଼ାଅନନ୍‌ ଆପାଲ୍‌ତେଙ୍‌ ମେଣ୍ତାନ୍‌ ଅନମଙନ୍‌ ତିୟେନ୍‌ । 14 ଅବ୍ରାଆମନ୍‌ ତି ଆଡ୍ରକୋନେ ଆଞୁମ୍‌ "ଜିଓବା-ଜିରି*ଡକ୍କୋଏନ୍‌ ।" ତି ଆସନ୍‌ ନମିଆନ୍ତାନ୍‌ ମନ୍‌ରାଞ୍ଜି ବର୍ତଞ୍ଜି, "ପ୍ରବୁ ଆ ବରୁଲୋଙନ୍‌ ଆନିନ୍‌ ତିୟ୍‌ତିୟ୍‌ଲଙ୍‌ତନ୍‌ ।"

15 ଆରି ପ୍ରବୁ ଆ ପାଙ୍‌ଲଙ୍‌ବର୍‌ମର୍‌ ଆରି ବତର ରୁଆଙନ୍‌ ସିଲଡ୍‌ ଓଡ୍ଡେଲେ ଅବ୍ରାଆମନ୍‌ଆଡଙ୍‌ ବରେନ୍‌, 16 "ପ୍ରବୁନ୍‌ ବର୍ତନେ, ଡାଙ୍ଗାଡ଼ାଅନ୍‌ନମ୍‌ ଆବୟନ୍‌ ଆମନ୍‌ ଞେନ୍‌ଆଡଙ୍‌ ଡାଙ୍ଗାଡ଼ାଅନ୍‌ନମ୍‌, ଆତନିୟ୍‌* ଆସନ୍‌ ଅଃନସାଲମ୍‌, 17 କେନ୍‌ କାବ୍ବାଡ଼ାନମ୍‌ ଆସନ୍‌ ଞେନ୍‌ଡମ୍‌ ପର୍ମାଡ଼ାଲନ୍‌ ଏବର୍ତନାୟ୍‌ ଞେନ୍‌ ଆମନ୍‌ଆଡଙ୍‌ ଏଆସିର୍ବାଦତମ୍‌ ଆରି ରୁଆଙନ୍‌ ଆତୁତୁୟ୍‌ ଡ ସମେଁୟ୍‌ଣ୍ଡ୍ରାନ୍‌ ଆଲକିୟ୍‌ ଅନ୍ତମ୍‌ କେଜ୍ଜାନମ୍‌ ଅବ୍‌ଗୋଗୋୟ୍‌ତାୟ୍‌ । କେଜ୍ଜାନମ୍‌ ବନେରାମରଞ୍ଜି ଆଗଡ଼ା ଆ ସନଙନ୍‌ ଜାୟ୍‌ ଜିନୟ୍‌ତଜି । 18 ଆରି ପୁର୍ତିଲୋଙନ୍‌ ଅଡ଼୍‌କୋ ଜାତିନ୍‌ କେଜ୍ଜାନମ୍‌ ବାତ୍ତେ ଆସିର୍ବାଦନ୍ ଞାଙ୍‌ତଜି, ଇନିଆସନ୍‌ଗାମେଣ୍ଡେନ୍‌ ଆମନ୍‌ ବର୍ନେଲେନ୍‌ ଅଡ଼୍‌କୋନ୍‌ ମାନ୍ନେଏନ୍‌ ।" 19 ଅବ୍ରାଆମନ୍‌ ଆ କମ୍ୱାରିଞ୍ଜି ଆମଙ୍‌ ୟର୍ରନେ, ଆରି ଆନିଞ୍ଜି ମାୟ୍‌ଲନ୍‌ ବେର୍‌ସେବାନ୍‌ ଜିରେଞ୍ଜି ଆରି ଅବ୍ରାଆମନ୍‌ ବେର୍‌ସେବାଲୋଙନ୍‌ ଡକୋଲନେ ।

20 ତି ଆଗନଟେ ସିଲଡ୍‌ ଅବ୍ରାଆମନ୍‌ଆଡଙ୍‌ କେନ୍‌ ଆକବର ବରେଞ୍ଜି ଅମ୍‌ଡଙା ମିଲ୍‌କାନ୍‌ ନିୟ୍‌ ବୋଞାଙ୍‌ନମ୍‌ ନାଓରନ୍‌ ଆସନ୍‌ ପସିଜଞ୍ଜି କୋଡେନ୍‌ । 21 ଆ ସୋଡ଼ା ଅନନ୍‌ ଉସନ୍‌ ଡ ଆ ବୋଞାଙନ୍‌ ବୁସନ୍‌ ଡ ଅରାମନ୍‌ ଆପ୍ପେୟ୍‌ କମୁଏଲନ୍‌, 22 ଆରି କେସଦନ୍‌, ଅସୋନ୍‌, ପିଲଦସ୍‌, ଜିଦ୍‌ଲପ୍‌ ଡ ବତୁଏଲନ୍‌, 23 ତି ଆ ବତୁଏଲ୍‌ ଆଡାଙ୍ଗଡ଼ିଅନ୍‌ ରିବିକାନ୍‌ । ଅବ୍ରାଆମନ୍‌ ଆବୋଞାଙ୍‌ ନାଓରନ୍‌ ଆସନ୍‌ ମିଲ୍‌କାନ୍‌ କେନ୍‌ ଆଟ ଜଣ କୋଡେନ୍‌ । 24 ଆରି ନାଓରନ୍‌ ରୁମା ଆଞୁମନ୍‌ ଆତିକିବୟ୍‌ଲୋଙ୍‌ ସିଲଡ୍‌ ଟେବଅନ୍‌, ଗଅମନ୍‌, ତଅସନ୍‌ ଡ ମାକାନ୍‌, କେନ୍‌ ଆନିଞ୍ଜି କୋଡେଞ୍ଜି ।