1 ଅବ୍ରାଆମନ୍‌ କଟୁରାନ୍‌ ଆଞୁମ୍‌ ଆଇବୟ୍‌ଆଡଙ୍‌ ଆରି ଅବୟ୍‌ ବିବାଲନେ । 2 ଆନିନ୍‌ ଅବ୍ରାଆମନ୍‌ ଆସନ୍‌ ସିମ୍ରଣ, ଜକ୍‌ସନ୍‌, ମଦାନ୍‌, ମିଦିୟନ୍‌, ଜିସ୍‌ବକ ଡ ସୁଅନ୍‌, କେନ୍‌ଆନିଞ୍ଜିଆଡଙ୍‌ କୋଡେନ୍‌ । 3 ତି ଆ ଜକିଅ ସିବାନ୍‌ ଡ ଦଦାନନ୍‌ଆଡଙ୍‌ କୋଡେନ୍‌ । ଦଦାନନ୍‌ ଆଅନଞ୍ଜି ଅସୁରନ୍‌ ଡ ଲଟୁସିଅନ୍‌ ଆରି ଲିଅମିଅନ୍‌ ଆ ମନ୍‌ରାଜି ଆ ପୁର୍ବାଜୁଜୁ । 4 ମିଦିଅନନ୍‌ ଆଅନ୍‌ ଅଇପାନ୍‌, ଏପରନ୍‌, ଅନୁକନ୍‌, ଅବିଦନ୍‌ ଡ ଇଲଦାୟାନ୍‌; କେନ୍‌ ଅଡ଼୍‌କୋନ୍‌ କଟୁରାନ୍‌ ଆଅନ୍‌ଞ୍ଜି ।

5 ତି ସିଲଡ୍‌ଲ୍ଲନ୍‌ ଅବ୍ରାଆମନ୍‌ ଇସାକନ୍‌ଆଡଙ୍‌ ଆନର୍ଜେନ୍‌ ଅଡ଼୍‌କୋନ୍‌ ତିୟେନ୍‌; 6 ବନ୍‌ଡ ଅବ୍ରାଆମନ୍‌ ଆତିକିବୟ୍‌ ଆଅନ୍‌ଞ୍ଜିଆଡଙ୍‌ ଅସୋୟ୍‌ ଅସୋୟ୍‌ ତିୟ୍‌ଲେ ଆମେଙ୍‌ମତାଇଙନ୍‌ ଇସାକନ୍‌ ଆମଙ୍‌ ସିଲଡ୍‌ ଆନିଞ୍ଜିଆଡଙ୍‌ ଡରୁଙ୍‌ୟୋଙ୍‌ଗଡ୍‌ ଆଡେସାବା ଡରକୋନେନ୍‌ ତିୟ୍‌ଲେ ଆପ୍ପାୟେନ୍‌ ।

7 ଅବ୍ରାଆମନ୍‌ ସତୁରି ମନ୍‌ଲୟ୍‌ ବର୍ସେଙ୍‌ ଅମେଙେନ୍‌ । 8 ତି ସିଲଡ୍‌ଲ୍ଲନ୍‌ ଅବ୍ରାଆମନ୍‌ ବୁଡାଡମେନ୍‌ କି ରବୁଏନ୍‌; ଆରି ଆମନ୍‌ରାଞ୍ଜି ଆମଙ୍‌ ଅନୋରୋଙନ୍‌ ଡେଏନ୍‌ । 9 ଆରି ଆ ଡାଙ୍ଗଡ଼ାଅନନ୍‌ ଇସାକନ୍‌ ଡ ଇସ୍ମାଏଲନ୍‌ ମମ୍ରିନ୍‌ ଆମୁକ୍କାବା ଇତିୟନ୍‌ ସୋଅରନ୍‌ ଆ ଡାଙ୍ଗାଡ଼ାଅନ୍‌ ଇପ୍ରୋଣନ୍‌ ଆବସେଙ୍‌ବା ମକ୍‌ପେଲାନ୍‌ ଆଞୁମ୍‌ ଆଲୋଙର୍‌ଲୋଙ୍‌ ଆନିନ୍‌ଆଡଙ୍‌ ତିଲେଞ୍ଜି । 10 ଇନିଆସନ୍‌ଗାମେଣ୍ଡେନ୍‌ ଅବ୍ରାଆମନ୍‌ ଇତିୟନ୍‌ ଆ ଅନଞ୍ଜିଆମଙ୍‌ ସିଲଡ୍‌ ତି ଆବସେଙ୍‌ ଞିଏନ୍‌ । ତି ଆଡ୍ରକୋନେଲୋଙ୍‌ ଅବ୍ରାଆମନ୍‌ ଡ ଆଡୁକ୍ରିନ୍‌ ସାରାନ୍‌ଆଡଙ୍‌ ତନିଲ୍‌ତିଲନ୍‌ ଡେଏଞ୍ଜି । 11 ଅବ୍ରାଆମନ୍‌ ଆର୍‌ନବୁ ସିଲଡ୍‌ ଇସ୍ୱରନ୍‌ ଆଡାଙ୍ଗାଡ଼ାଅନନ୍‌ ଇସାକନ୍‌ଆଡଙ୍‌ ଆସିର୍ବାଏନ୍‌; ଆରି ଇସାକନ୍‌ ବେର-ଲଅୟ-ରୋୟିନ୍‌ ଆଞୁମ୍‌ ଆଡ୍ରକୋନେଲୋଙ୍‌ ଡକୋଲନେ ।

12 ସାରାନ୍‌ ଆକମ୍ବାରି ମିସରବୟ୍‌ ଆଗାରନ୍‌ ଅବ୍ରାଆମନ୍‌ ଆସନ୍‌ ଆନାଆଡଙ୍‌ କୋଡେନ୍‌, ଅବ୍ରାଆମନ୍‌ ତି ଆଅନ୍‌ ଇସ୍ମାଏଲନ୍‌ ଆକେଜ୍ଜା, 13 ଅଞୁମନ୍‌ ଡ କେଜ୍ଜାନ୍‌ ଅନ୍ତମ୍‌ ଇସ୍ମାଏଲନ୍‌ ଆ ଅନଞ୍ଜି ଆଞୁମ୍‌ କେନ୍‌, ଇସ୍ମାଏଲନ୍‌ ଆ ସୋଡ଼ାଡାଙ୍ଗାଡ଼ାଅନ୍‌ ନବାୟତନ୍‌; ତି ସିଲଡ୍‌ଲ୍ଲନ୍‌ କେଦାରନ୍‌, ଅଦ୍‌ବେଲନ୍‌, ମିବ୍‌ସମନ୍‌, 14 ମିସ୍‌ମାନ୍‌, ଦୁମାନ୍‌, ମସାନ୍‌, 15 ଅଦଦନ୍‌, ତେମାନ୍‌, ଜିଟୁରନ୍‌, ନାପିସନ୍‌ ଆରି କେଦମାନ୍‌ । 16 କେନ୍‌ ଅଡ଼୍‌କୋଞ୍ଜି ଇସ୍ମାଏଲନ୍‌ ଆ ଡାଙ୍ଗାଡ଼ାଅନ୍‌, ଆରି ଆନିଞ୍ଜି ଆଞୁମଞ୍ଜି ଅନ୍ତମ୍‌ ଆ ସାଇଞ୍ଜି ଡ ଡରକୋନେନ୍‌ ଡକୋଏନ୍‌; ଆରି ଆନିଞ୍ଜି ରମ୍ମଙ୍‌ ରମ୍ମଙ୍‌ ଆକନୋଡ୍‌କୋଡ୍‌ ସିଲଡ୍‌ ବାର ଜଣ ସାସନମରନ୍‌ ଡକୋଏନ୍‌ । 17 ଇସ୍ମାଏଲନ୍‌ ବର୍ସେଙ୍‌ ଡକୋଲନ୍‌ ରବୁଏନ୍‌; ଆରି ଆନିନ୍‌ ଆମନ୍‌ରାଞ୍ଜି ଆମଙ୍‌ ଅନୋରୋଙନ୍‌ଡେଏନ୍‌ । 18 ତି ସିଲଡ୍‌ଲ୍ଲନ୍‌ ଆଅନଞ୍ଜି ଅବିଲାନ୍‌ ମିସର୍‌ ଡରୁଙ୍‌ୟୋଙ୍‌ଗଡ୍‌ ସୁର ସିଲଡ୍‌ ଅସୁରିୟାନ୍‌ ଜାୟ୍‌ ଡକୋଲଞ୍ଜି । କେନ୍‌ ଅନ୍ତମ୍‌ ଅଡ଼୍‌କୋନ୍‌ ଆ ବୋଞାଙଞ୍ଜି ଆମୁକ୍କାବା ଆନିନ୍‌ ଡରକୋନେନ୍‌ ଞାଙେନ୍‌ ।

19 ଅବ୍ରାଆମନ୍‌ ଆଡାଙ୍ଗାଡ଼ାଅନ୍‌ ଇସାକନ୍‌ ଆକେଜ୍ଜା । 20 ତି ଆ ଇସାକ ବାକୁଡ଼ି ବର୍ସେଙ୍‌ଲୋଙ୍‌ ପଦ୍ଦନ୍‌ ଅରାମିଅନ୍‌ ବତୁଏଲନ୍‌ ଆଡାଙ୍ଗଡ଼ିଅନ୍‌, ଆଗ୍ରାମ୍‌ଗାମ୍‌, ଅରାମିଅନ୍‌ ଲାବନନ୍‌ ଆତନାନ୍‌ ରିବିକାନ୍‌ଆଡଙ୍‌ ବିବାଲନେ । 21 ଇସାକନ୍‌ ଆଡୁକ୍ରି ଆଞ୍ଜେବୟ୍‌ଜନ୍‌ ଆସନ୍‌ ଆନିନ୍‌ ପ୍ରବୁ ଆମଙ୍‌ବା ଆନିନ୍‌ ଆସନ୍‌ ପ୍ରାର୍ତନାଲନେ; ସିଲତ୍ତେ ପ୍ରବୁ ଆ ପ୍ରାର୍ତନାନ୍‌ ଅରମ୍‌ଡଙେନ୍‌ ଆସନ୍‌, ଆଡୁକ୍ରିନ୍‌ ରିବିକାନ୍‌ ତିଲ୍‌କୋଡେନ୍‌ । 22 ତି ସିଲଡ୍‌ଲ୍ଲନ୍‌ ଆକମ୍ପୋଙ୍‌ଲୋଙ୍‌ ଆପସିୟ୍‌ଜି ଆଗ୍ରଲ୍‌ଲଞ୍ଜି ଆସନ୍‌, ଞେନ୍‌ଆଡଙ୍‌ ଇନିବା ଏଃନେଗୋ ଡେନ୍‌ ? କେନ୍‌ ଏନେଲେ ପଙ୍‌ ଡେତେ ? ଏନେଲେ ଇୟମ୍‌ଲେ ଆନିନ୍‌ ପ୍ରବୁନ୍‌ ଆମଙ୍‌ ଆବନର୍‌ ଆସନ୍‌ ଇୟେନ୍‌ । 23 ସିଲତ୍ତେ ପ୍ରବୁ ଆନିନ୍‌ଆଡଙ୍‌ ବରେନ୍‌, "କମ୍ପୋଙ୍‌ଲୋଙ୍‌ନମ୍‌ ବାଗୁ କେଜ୍ଜାନ୍‌ ଡକୋ, ଡ ବାଗୁ କେଜ୍ଜାନ୍‌ କମ୍ପୋଙ୍‌ଲୋଙ୍‌ନମ୍‌ ସିଲଡ୍‌ ଆଙ୍‌ସାତଞ୍ଜି; ବକେଜ୍ଜା ଆରି ବକେଜ୍ଜା ସିଲଡ୍‌ ବପ୍ପୁତେ, ଆରି, ଆସୋଡ଼ାବନୋଞାଙ୍‌ ଆଓବାନ୍‌ଆଡଙ୍‌ ସେବାତେ ।" 24 ତି ସିଲଡ୍‌ଲ୍ଲନ୍‌ ଆତ୍ରୁଙ୍‌ଗାଜେନ୍‌ ସିଲଡ୍‌, ଆକମ୍ପୋଲୋଙନ୍‌ ସିଲଡ୍‌ ରାବଡ଼ିଅନ୍‌ କୋଡେନ୍‌ । 25 ଆ ସୋଡ଼ା ଅନନ୍‌ ମିଞାମନ୍‌ ଅନ୍ତମ୍‌ ଲୁଲୁ ଡ ସମ୍ପରାନ୍‌ ଆକୋରୋଡୋଙ୍‌ ସିନ୍‌ରିନ୍‌ ଅନ୍ତମ୍‌ ଡକୋଏନ୍‌; ତି ଆସନ୍‌ ଆଞୁମନ୍‌ ଏସୋ* ଅବ୍‌ଞୁମେଞ୍ଜି । 26 ତି ସିଲଡ୍‌ଲ୍ଲନ୍‌ ଏସୋନ୍‌ ଆ ତାଲ୍‌ଜଙ୍‌ ଞମ୍‌ଲେ ଆବୋଞାଙନ୍‌ ଡୁଙ୍‌ଲନାୟ୍‌; ତି ଆସନ୍‌ ଆଞୁମନ୍‌ ଜାକୁବ* ଅବ୍‌ଞୁମେଞ୍ଜି । ଇସାକନ୍‌ ୟାକୁଡ଼ି ବର୍ସେଙ୍‌ ଆଡ୍ରେନ୍‌ ଆଡିଡ୍‌ କେନ୍‌ ରାବଡ଼ିସିଜନ୍‌ କୋଡେଞ୍ଜି ।

27 ପସିଜଞ୍ଜି ଆସ୍ରୋଡ଼ାଏଞ୍ଜି ସିଲଡ୍‌ ଏସୋନ୍‌ ବାନୁଆମର୍‌ ଆରି ଜାଡିଆନ୍‌ ଆ ଡକୋନେମର୍‌ ଡେଏନ୍‌; ଆରି, ଜାକୁବନ୍‌ ଲବଡିମର୍‌ ଡ ତମ୍ବୁସିଙନ୍‌ ଆଡକୋନେମର୍‌ ଡେଏନ୍‌ । 28 ଇସାକନ୍‌ ପର୍ଗଡ଼ବ୍‌ ଜେଲନ୍‌ ମନାଡମ୍‌ ଆରବ୍‌ଡିସୟେନ୍‌ ଆସନ୍‌ ଏସୋନ୍‌ଆଡଙ୍‌ ଲୋବଏନ୍‌ । ବନ୍‌ଡ ରିବିକାନ୍‌ ଜାକୁବନ୍‌ଆଡଙ୍‌ ଲୋବଏନ୍‌ ।

29 ବଡିନା ଜାକୁବନ୍‌ ତନଙ୍ଗାଲନ୍‌ ଡିଞେନ୍‌, ତି ଆଡିଡ୍‌ ଏସୋନ୍‌ ବାମଙ୍ଗା ବସେଙନ୍‌ ସିଲଡ୍‌ ଜିର୍ରାୟ୍‌ 30 ଆରି ଜାକୁବନ୍‌ଆଡଙ୍‌ ବରେନ୍‌, "ଞେନ୍‌ ମଙ୍ଗାଲିଁୟ୍‌, କାକୁର୍ତିତନାୟ୍‌, ତି ଆଡିଁୟ୍‌ଡିଁଞନନ୍‌ ଆତନଙ୍‌ଗାଲ୍‌ ରୁଲେ ରୋଜୋମିଁୟ୍‌," ତି ଆସନ୍‌ ଆନିନ୍‌ ଆଞୁମନ୍‌ ଇଦୋମ୍‌ ଗାମ୍‌ଲେ ଅବ୍‌ଞୁମେଞ୍ଜି ।

31 ତି ଆଡିଡ୍‌ ଜାକୁବନ୍‌ ବରେନ୍‌, "ଲଙେ ଆମନ୍‌ ଞେନ୍‌ଆଡଙ୍‌ ସୋଡ଼ାବୋଞାଙନ୍‌ ଆଡନେ ମଙ୍‌ଞେନ୍‌ ତ୍ତମା ଏତ୍ତେଲ୍‌ଡେନ୍‌ ଞେନ୍‌ ତିୟ୍‌ତମ୍‌ ।"

32 ଏସୋନ୍‌ ଜାଲଙ୍‌ଲେ ବରେନ୍‌, "ଗିଜା, ଞେନ୍‌ ଆରବୁଗୋ, ସୋଡ଼ାବୋଞାଙନ୍‌ ଆଡନେ ଞେନ୍‌ ଇନ୍ନିଙ୍‌ ଲାବତଡ୍‌ ?"

33 ଜାକୁବନ୍‌ ବର୍ରନେ, "ଆମନ୍‌ ଲଙେ ଅମଙ୍‌ଞେନ୍‌ ପର୍ମାଡ଼ାନା," ସିଲତ୍ତେ ଆନିନ୍‌ ଆମଙନ୍‌ ପର୍ମାଡ଼ାଲନ୍‌ । କେନ୍‌ ଅନ୍ତମ୍‌ ଆନିନ୍‌ ସୋଡ଼ାବୋଞାଙନ୍‌ ଆଡନେ ଜାକୁବନ୍‌ ଆମଙ୍ ତମେନ୍‌ । 34 ସିଲତ୍ତେ ଜାକୁବନ୍‌ ଏସୋନ୍‌ଆଡଙ୍‌ ରୁଟିନ୍‌ ଡ ଆଡନିଞନ୍‌ ଆତନଙ୍‌ଗାଲ୍‌ ଆତ୍ରିୟେନ୍‌ ସିଲଡ୍‌, ଆନିନ୍‌ ଜୋମ୍‌ଲେ ଗାଲେ ଜିରେନ୍‌ । କେନ୍‌ ଅନ୍ତମ୍‌ ଏସୋନ୍‌ ଆନିନ୍‌ଡମନ୍‌ ସୋଡ଼ାବନୋଞାଙ୍‌ ଆଡନେ ପୁଡ୍‌ୟେଙେନ୍‌ ।