1 ତି ସିଲଡ୍‌ଲ୍ଲନ୍‌ ଇସାକନ୍‌ ଜାକୁବନ୍‌ଆଡଙ୍‌ ଓଡ୍ଡେଲେ ଆସିର୍ବାଦଏନ୍‌ ଆରି କେନ୍‌ ଆବନାଞ୍‌ ତିୟ୍‌ଲେ ଆନିନ୍‌ଆଡଙ୍‌ ବରେନ୍‌, "ଆମନ୍‌ କିଣାନ୍‌ ଆ ଡେସା ଅନ୍ନିଙ୍‌ ଆଡାଙ୍ଗଡ଼ିଆଡଙ୍‌ ଇୟ୍‌ଡଙ୍‌ ବିବାନେ । 2 ଡୋନା, ପଦ୍ଦନ୍‌ ଅରାମଲୋଙ୍‌ ଅୟୁଙ୍‌ନମ୍‌ ଆପେୟ୍‌ ବତୁଏଲନ୍‌ ଆସିଙ୍‌ ଜିର୍ରେ ମାମୁନମ୍‌ ଲାବନନ୍‌ ଅନ୍ନିଙ୍‌ ଆଡାଙ୍ଗଡ଼ିଆଡଙ୍‌ ଇୟ୍‌ବିବାନା । 3 ବୋର୍ସାଡମନ୍‌ ଆ ଇସ୍ୱରନ୍‌ ଆମନ୍‌ଆଡଙ୍‌ ଆସିର୍ବାଦଲେ ଆମନ୍‌ଆଡଙ୍‌ ଗୋଗୋୟ୍‌ ପସିଜନ୍‌ ତିୟମ୍‌ତୋ, ଅମଙ୍‌ନମ୍‌ ସିଲଡ୍‌ ଗୋଗୋୟ୍‌ ଜାତିନ୍‌ ଡୁଙ୍‌ନାୟ୍‌ତଜି । 4 ଆରି ଅବ୍ରାଆମନ୍‌ ଆତ୍ରିୟେନ୍‌ ଆସିର୍ବାଦ ଆମନ୍‌ଆଡଙ୍‌ ଡ କେଜ୍ଜାଲୋଙ୍‌ନମ୍‌ ଡେଏତୋ; ସିଲତ୍ତେ ଇସ୍ୱରନ୍‌ ଡରକୋନେନମ୍‌ କେନ୍‌ ଅଙ୍ଗା ଆଡେସା ଅବ୍ରାଆମନ୍‌ଆଡଙ୍‌ ତିୟେନ୍‌, ତି ଆଡେସାଲୋଙ୍‌ ଡର୍ନେମରନ୍‌ ଡେଏତୋ ।" 5 ତି ସିଲଡ୍‌ଲ୍ଲନ୍‌ ଇସାକନ୍‌ ଜାକୁବନ୍‌ଆଡଙ୍‌ ଆରାପ୍ପାୟେନ୍‌, ଆନିନ୍‌ ପଦ୍ଦନ୍‌ ଅରାମଲୋଙ୍‌ ଅରାମିୟ ବତୁଏଲନ୍‌ ଆଡାଙ୍ଗାଡ଼ାଅନ୍‌ ଲାବନନ୍‌, ଆଗ୍ରାମ୍‌ଗାମ୍‌, ଜାକୁବନ୍‌ ଡ ଏସୋନ୍‌ ଆୟୋଙନ୍‌ ରିବିକାନ୍‌ ଆବବ୍‌ରେ ଆମଙ୍‌ବା ଜିରେନ୍‌ ।

6 ତି ସିଲଡ୍‌ଲ୍ଲନ୍‌ ଇସାକନ୍‌ ଜାକୁବନ୍‌ଆଡଙ୍‌ ଆସିର୍ବାଦଲେ ଞାଙ୍‌ବୟ୍‌ନେନ୍‌ ଆସନ୍‌ ପଦ୍ଦନ୍‌ ଅରାମନ୍‌ ଆପ୍ପାୟେନ୍‌, ଆରି, ଜାକୁବନ୍‌ଆଡଙ୍‌ ଆରାର୍ସିବାଦଏନ୍‌ ଆଡିଡ୍‌ ଆନିନ୍‌ଆଡଙ୍‌ ବାଞଲେ ବରେନ୍‌, "ଆମନ୍‌ କିଣାନ୍‌ ଆଡେସା ଅନ୍ନିଙ୍‌ ଆଡାଙ୍ଗଡ଼ି ବିବାଡଙ୍‌ନେ ।" 7 ଆରି ଜାକୁବନ୍‌ ଆପେୟନ୍‌ ଆୟୋଙନ୍‌ ଆବନାଁୟ୍‌ବର୍‌ ମାନ୍ନେଲେ ପଦ୍ଦନ୍‌ ଅରାମନ୍‌ ଜିରେନ୍‌, 8 କେନ୍‌ ଗିୟ୍‌ଲେ ଏସୋନ୍‌ ଆପେୟନ୍‌ ଇସାକନ୍‌ କିଣାନ୍‌ ଆଡେସା ଆଡାଙ୍ଗଡ଼ିଜି ଅଡ୍‌ଲଡଜେ ଜନାଏନ୍‌ । 9 ତିଆସନ୍‌ ଆ ଡୁକ୍ରିଞ୍ଜି ଡକୋଏନ୍‌ ଜାକିଁୟ୍‌ଡେନ୍‌ ଇସ୍ମାଏଲନ୍‌ ଆମଙ୍‌ବା ଇୟ୍‌ଲେ ଅବ୍ରାଆମନ୍‌ ଆଉଲେଙ୍‌ ଇସ୍ମାଏଲନ୍‌ ଆଡାଙ୍ଗଡ଼ିଅନ୍‌ ନବାୟତନ୍‌ ଆତନାନ୍‌ ମଅଲତ୍‌ ଆଞୁମ୍‌ ଆଡାଙ୍ଗଡ଼ି ବିବାଲନେ ।

10 ତି ସିଲଡ୍‌ଲ୍ଲନ୍‌ ଜାକୁବନ୍‌ ବେର୍‌ସେବାନ୍‌ ସିଲଡ୍‌ ଡୁଙ୍‌ଲନ୍‌ ଆରୋଣଗଡ୍‌ ଜିରେନ୍‌ । 11 ଆରି, ଆବରୁବ୍‌ୟୋଙେନ୍‌ ଆସନ୍‌ ଆନିନ୍‌ ଅଙ୍ଗା ଅବୟ୍‌ ଡରକୋନେଲୋଙ୍‌ ତଗଲନ୍‌ ରଏଏନ୍‌; ଆରି, ଆନିନ୍‌ ତି ଆତୁୟାୟ୍‌ ସିଲଡ୍‌ ଅବୟ୍‌ ଅରେଙନ୍‌ ପାଙ୍‌ଲେ ଇବବ୍‌ଲନ୍‌ ଲୁଡେନ୍‌ । 12 ଆନିନ୍‌ ଗନୁମ୍‌ତେନ୍‌ ଗିଜେନ୍‌ ଡ ରୁଆଙନ୍‌ ସିଲଡ୍‌ ପୁର୍ତିନ୍‌ ଜାୟ୍‌ ଅବୟ୍‌ ଲିସୁନ୍ନିନ୍‌ ଡକୋ, ଇସ୍ୱରନ୍‌ ଆ ପାଙ୍‌ଲଙ୍‌ବର୍‌ମରଞ୍ଜି ତି ଆ ଲିସୁନ୍ନିଗଡ୍‌ ଡାୟ୍‌ତଜି ଆରି ପତ୍ତନାଜି । 13 ଆରି ଗିଜା, ପ୍ରବୁ ତି ଆତୋଣ୍ତୋ ତନଙ୍‌ଲେ ବର୍ରନେ, "ଞେନ୍‌ ପ୍ରବୁ ପୁର୍ବାଜୋଜୋନମ୍‌ ଅବ୍ରାଆମନ୍‌ ଆ ଇସ୍ୱର ଡ ଇସାକନ୍‌ ଆ ଇସ୍ୱର; ଆମନ୍‌ କେନ୍‌ ଅଙ୍ଗା ଆଡେସାଲୋଙ୍‌ ଲୁଡ୍‌ତେ, ତିଆତେ ଞେନ୍‌ ଆମନ୍‌ଆଡଙ୍‌ ଡ କେଜ୍ଜାନମ୍‌ ଏତିୟ୍‌ତାୟ୍‌ । 14 କେଜ୍ଜାନମ୍‌ ପୁର୍ତିନ୍‌ ଆରଡ଼ିଲନ୍‌ ଅନ୍ତମ୍‌ ମାଡ୍ଡ ଗୋଗୋୟ୍‌ ଡେତଜି, ଆରି, ଆମନ୍‌ ଡରୁଙ୍‌ୟୋଙ୍‌ ଡ ବରୁବ୍‌ୟୋଙ୍‌ ଡ ଅର୍କଡ଼ାବି ଡ ଅର୍ଜଡ଼ୋମ୍‌, ଉଞ୍ଜିମନେଙନ୍‌ ମରଙ୍‌ତବେନ୍‌; ଆରି, ଆମନ୍‌ ସିଲଡ୍‌ ଡ କେଜ୍ଜାନମ୍‌ ସିଲଡ୍‌ ପୁର୍ତିନ୍‌ ଅଡ଼୍‌କୋନ୍‌ ଆ କେଜ୍ଜା ଆସିର୍ବାଦନ୍‌ ଞାଙ୍‌ତଜି । 15 ଆରି ଗିଜା, ଞେନ୍‌ ଆମନ୍‌ ସରିନ୍‌ ଡକୋ, ଆରି ଆମନ୍‌ ଅଙ୍ଗା ଅଙ୍ଗା ଆଡ୍ରକୋନେବାନ୍‌ ଜିର୍ତେ, ତି ଆଡ୍ରକୋନେରେଙ୍‌ ଞେନ୍‌ ଆମନ୍‌ଆଡଙ୍‌ ଏଡୋବ୍‌ତମ୍‌ ଆରି ଆମନ୍‌ଆଡଙ୍‌ କେନ୍‌ ଆଡେସା ଏଆବ୍‌ୟର୍‌ତମ୍‌; ଇନିଆସନ୍‌ଗାମେଣ୍ଡେନ୍‌ ଞେନ୍‌ ଆମନ୍‌ଆଡଙ୍‌ ଇନିଜି ଏବର୍ରନ୍‌, ତିଆତେ ଅନ୍‌ରଙ୍‌ ଡେଏନ୍‌ ଜାୟ୍‌ ଞେନ୍‌ ଆମନ୍‌ଆଡଙ୍‌ ଏଃନୁମ୍‌ରେଙାୟ୍‌ ।" 16 ଜାକୁବନ୍‌ ଡୋଲନ୍‌ କି ବର୍ରନେ, "ପ୍ରବୁନ୍‌ ତେନ୍ନେ ଡକୋ, କେନ୍‌ଆତେ ଆଡ୍ରକୋନେନ୍‌, ଆରି ଞେନ୍‌ ଜନାଲେ ଅଃରପ୍ତିଲାୟ୍‌ ।" 17 ଆରି, ଆନିନ୍‌ ବତଙ୍‌ଡାଲେ ବର୍ରନେ, "କେନ୍‌ ଏଙ୍ଗାଗୋ ଆବ୍ରନ୍ତଙନ୍‌ ଆଡ୍ରକୋନେ ! କେନ୍‌ ତ ଇସ୍ୱରନ୍‌ ଆସିଙ୍‌, କେନ୍‌ ତ ରୁଆଙନ୍‌ ଆଡୁଆରା ।" 18 ତି ସିଲଡ୍‌ଲ୍ଲନ୍‌ ଜାକୁବନ୍‌ ଅନ୍‌ରଙନ୍‌ଡୋତାନ୍‌ ଡୋଲନ୍‌ ଅଙ୍ଗା ଆରେଙ୍‌ ଇବବ୍‌ଲନେ, ତିଆତେ ପାଙ୍‌ଲେ ସୋଣ୍ତାଙନ୍‌ ଅନ୍ତମ୍‌ ତବ୍‌ନଙ୍‌ଲେ ତି ଆତୋଣ୍ତୋ ମିଞଲନ୍‌ ରୁଏନ୍‌ । 19 ଆରି, ତି ଆଡ୍ରକୋନେ ଆଞୁମ୍‌ ବେତେଲ୍‌*28:19 ଆଗ୍ରାମ୍‌ଗାମ୍‌ ଇସ୍ୱରନ୍‌ ଆସିଙ୍‌ ଡକୋଏନ୍‌; ବନ୍‌ଡ ଆମ୍ମୁଙ୍‌ ତି ଆଗଡ଼ା ଆଞୁମ୍‌ ଲୁସ୍‌ ଡକୋଏନ୍‌ । 20 ଆରି ଜାକୁବନ୍‌ ପର୍ମାଡ଼ାଲନ୍‌ ବର୍ରନେ, "ପ୍ରବୁନ୍‌ ଞେନ୍‌ ସରିନ୍‌ ଡକୋଲନ୍‌ଡେନ୍‌ ଡ ଞେନ୍‌ ଆଜିର୍ତେନ୍‌ ଆଡିଡ୍‌ ଞେନ୍‌ଆଡଙ୍‌ ଡୋବ୍‌ଲିଁୟ୍‌ଡେନ୍‌, ଆରି, ଗାଗାନେନ୍‌ ଆସନ୍‌ ଜନୋମନ୍‌ ଡ ଜରିଜିନେନ୍‌ ଆସନ୍‌ ସିନ୍‌ରିନ୍‌ ତିୟ୍‌ଲିୟ୍‌ଡେନ୍‌, 21 ଆରି ଞେନ୍‌ଆଡଙ୍‌ ଆସୁକ୍କାନ୍‌ ଆପ୍ପେୟ୍‌ଲେନ୍‌ ଆସିଙ୍‌ ୟର୍ରନାୟ୍‌ ଡେନ୍‌, ପ୍ରବୁ ଇସ୍ୱରଞେନ୍‌ ଡେତେ, 22 ଆରି, ଞେନ୍‌ ଅଙ୍ଗା ଆରେଙ୍‌ ସୋଣ୍ତାଙନ୍‌ ଅନ୍ତମ୍‌ ସୁବ୍‌ଲାୟ୍‌, ତିଆତେ ଇସ୍ୱରନ୍‌ ଆସିଙ୍‌ ଡେତେ, ଆରି ଆମନ୍‌ ଞେନ୍‌ଆଡଙ୍‌ ଇନି ଅଡ଼୍‌କୋନ୍‌ ତିୟ୍‌ତାୟ୍‌, ତେତ୍ତେସିଲଡ୍‌ ଞେନ୍‌ ଦସମାଂସ ଆମନ୍‌ଆଡଙ୍‌ ତିୟ୍‌ତମ୍‌ ।"