ଜାକୁବନ୍ ଲାବନନ୍ ଆସିଂଲୋଙ୍ ତୁଙେନ୍
1 ତି ସିଲଡ୍ଲ୍ଲନ୍ ଜାକୁବନ୍ ଜିର୍ରେ ଡରୁଙ୍ୟୋଙ୍ଗଡ୍ ଆଡେସା ଆ ମନ୍ରାଜି ଆମଙ୍ବା ଜିରେନ୍ । 2 ସିଲତ୍ତେ ଆନିନ୍ ଆଙାଙେନ୍, ଗିୟ୍ବା, ବସେଙ୍ଲୋଙନ୍ ଅବୟ୍ କୁଆନ୍, ଆରି ତେତ୍ତେ ୟାଗି ଗୋସ୍ସାମେନନ୍ ଆଲୁଡ୍ଲୁଡ୍ଜି; ଇନିଆସନ୍ଗାମେଣ୍ଡେନ୍ ମନ୍ରାଞ୍ଜି ମଣ୍ତାମେଡନ୍ ତି ଆକୁଆଲୋଙ୍ ଆଡାଆ ଅବ୍ଗାଡାତଜି; ତି ଆକୁଆ ଅବୟ୍ ସୋଡ଼ା ଅରେଙନ୍ ଆତକିଡ୍ ଡକୋଲନ୍ । 3 ତି ଆକୁଆବା ଅଡ଼୍କୋନ୍ ଆମେଣ୍ତା ରୁକୁତଞ୍ଜି; ଆରି ଆରୁବ୍ରୁବନ୍ ଆରେଙ୍ ମନ୍ରାଞ୍ଜି ଡେଡ୍ଲେ ମେଣ୍ତାଞ୍ଜିଆଡଙ୍ ଅବ୍ଗାଡାତଜି ଆରି ତି ଆରେଙ୍ ଏତ୍ତେଲେମା କୁଆନ୍ ରୁବ୍ତଜି ।
4 ଜାକୁବନ୍ ଆନିଞ୍ଜିଆଡଙ୍ ବରେଞ୍ଜି, "ଏ ବୋଞାଙ୍ଜି, ଆମ୍ୱେଞ୍ଜି ଅଙ୍ଗାଲୋଙ୍ ଆ ମନ୍ରାଜି ?" ଆନିଞ୍ଜି ବର୍ରଞ୍ଜି, "ଇନ୍ଲେଞ୍ଜି ଆରୋଣନ୍ ଆଗଡ଼ା ଆ ମନ୍ରା ।" 5 ସିଲତ୍ତେ ଜାକୁବନ୍ ବରେନ୍, "ଆମ୍ୱେଞ୍ଜି ନାଓରନ୍ ଆଉଲେଙ୍ ଲାବନନ୍ଆଡଙ୍ ଏଅଃମଡ୍ତେ ପଙ୍ ? ଆନିଞ୍ଜି ବର୍ରଞ୍ଜି, ଇନ୍ଲେଞ୍ଜି ଆନିନ୍ଆଡଙ୍ ଏଅବ୍ମଡ୍ତାୟ୍ ।" 6 ଜାକୁବନ୍ ବରେଞ୍ଜି, "ଆନିନ୍ ଆସୁକ୍କାନ୍ ପଙ୍ ?" ଆନିଞ୍ଜି ବର୍ରଞ୍ଜି, "ଆସୁକ୍କାନ୍ ଡକୋ; କେନ୍ଆତେ ଗିଜା, ଆ ଡାଙ୍ଗଡ଼ିଅନନ୍ ରାଏଲନ୍ ଗୋସ୍ସାମେନନ୍ ଗଙ୍ଲେ ଜିର୍ତାୟ୍ ।" 7 ତିଆଡିଡ୍ ଜାକୁବନ୍ ବର୍ରନେ, "ଗିୟ୍ବା, ନମି ଓୟୋଙନ୍ ଡକୋଡମ୍; ନମିଞେନ୍ ଗୋସ୍ସାମେନନ୍ ଅଃନବ୍ରୁକ୍କୁବୋ, ଇନିବା ଗୋସ୍ସାମେନ୍ ଡାଆନ୍ ଅବ୍ଗାଡାଲେ ଏଃନିୟ୍ତୁରେ ?" 8 ବନ୍ଡ ଆନିଞ୍ଜି ବର୍ରଞ୍ଜି, "ତିଆତେ ଇନ୍ଲେନ୍ ଲୁମ୍ଲେ ଏଃରପ୍ତିଆୟ୍; ଅଡ଼୍କୋନ୍ ଆଗୋସ୍ସା ଆନବ୍ରୁକ୍କୁନ୍ ଆସନ୍ ଏଜଗ୍ଗେତାୟ୍; ଆରି କୁଆନ୍ ଆରନୁବନ୍ ଆରେଙ୍ ଡନେଡନ୍ ଡେତେ, ସିଲଡ୍ଲନ୍ ଇନ୍ଲେଞ୍ଜି ମେଣ୍ତାଞ୍ଜିଆଡଙ୍ ଏବ୍ଗାଡାତାୟ୍ ।" 9 ଜାକୁବନ୍ ଆନିଞ୍ଜି ସରିନ୍ ଏନ୍ନେଲେ ଆକ୍ରଡାଡ଼ିଲଞ୍ଜି ଆଡିଡ୍, ରାଏଲନ୍ ଆପ୍ପେୟନ୍ ଆ ଗୋସ୍ସାମେଡନ୍ ଗଙ୍ଲେ ତେତ୍ତେ ଅଡ଼ୋଏନ୍, ଇନିଆସନ୍ଗାମେଣ୍ଡେନ୍ ଆନିନ୍ ମେଣ୍ତାତୁର୍ବୟ୍ ଡକୋଏନ୍ । 10 ତିଆଡିଡ୍ ଜାକୁବନ୍ ଆମାମୁନ୍ ଲାବନନ୍ ଆଡାଙ୍ଗଡ଼ିଅନ୍ ରାଏଲନ୍ଆଡଙ୍ ଡ ଆମାମୁନ୍ ଆ ଗୋସ୍ସାମେନନ୍ ଗିୟ୍ଲେ ଆମଙ୍ବାନ୍ ଇୟ୍ଲେ କୁଆନ୍ ଆରନୁବନ୍ ଆରେଙ୍ ଡେଲ୍ଲେ ଆ ମାମୁନ୍ ଲାବନନ୍ ଆ ଗୋସ୍ସାମେନ୍ ଡାଆନ୍ ଅବ୍ଗାଡାଏନ୍ । 11 ତି ସିଲଡ୍ଲ୍ଲନ୍ ସର୍ଡାନ୍ ବାତ୍ତେ ଜାକୁବନ୍ ରାଏଲନ୍ଆଡଙ୍ ଜୋର୍ଜୋର୍ର୍ରେ ଅବ୍ସର୍ରଙ୍ଲନ୍ ୟେୟେଡାଲନେ । 12 ଆରି, ଆନିନ୍ଡମ୍ ଆପ୍ପେୟନ୍ ଆକୁଲମ୍ ଡ ରିବିକାନ୍ ଆଡାଙ୍ଗାଡ଼ାଅନ୍, ଞେନ୍ ଗାମ୍ଲେ ବର୍ରନେ; ସିଲତ୍ତେ ରାଏଲନ୍ ଉର୍ରେ ଆପ୍ପେୟନ୍ ଆଡଙ୍ ଇୟ୍ଲେବରେ । 13 ସିଲତ୍ତେ ଲାବନନ୍ ଆବଞ୍ଜାଅନନ୍ ଜାକୁବନ୍ ଆବର୍ନେ ଅମ୍ଡଙ୍ଲେ ଆନିନ୍ ସରିନ୍ ଆନଲ୍ରବାଙ୍ ଆସନ୍ ଲଜିରେନ୍, ଆରି, ଜକୁବନ୍ଆଡଙ୍ କୋଣ୍ତୋଏନ୍ ଡ ଜୋର୍ଜୋର୍ର୍ରେ ଆସିଙନ୍ ଓରୋଙେନ୍; ସିଲତ୍ତେ ଆନିନ୍ ଅଡ଼୍କୋନ୍ ଆବର୍ନେଜି ଲାବନନ୍ଆଡଙ୍ ଅବ୍ଜନାଏନ୍ । 14 ସିଲତ୍ତେ ଲାବନନ୍ ବର୍ରନେ, "ଆମନ୍ ଆଜାଡ଼ିନ୍ ମିଞାମ୍ଞେନ୍ ଡ ଜେଲୁଞେନ୍ ଅନ୍ତମ୍ ।" ତିଆସନ୍ ଜାକୁବନ୍ ଆସିଙନ୍ ବଆଙ୍ଗାୟ୍ ଡକୋଲନେ ।
ରାଏଲନ୍ ଡ ଲେୟାନ୍ ଜାକୁବନ୍ ବାତ୍ତେ ବିବାଲଞ୍ଜି
15 ତି ସିଲଡ୍ଲ୍ଲନ୍ ଲାବନନ୍ ଜାକୁବନ୍ଆଡଙ୍ ବରେନ୍, "ଆମନ୍ କୁତ୍ତମାଞେନ୍ ଗାମ୍ଲେ ପଙ୍ ବଡିନ୍ ଏର୍ପନାଙନ୍ କାବ୍ବାଡ଼ାଞେନ୍ କମ୍ୱାରିମର୍ଗୋ ଲୁମ୍ତେ ? ତିଆସନ୍ ଇନି ଆବଡି ପାଙ୍ତେ ? ତିଆତେ ବର୍ନା ।" 16 ତି ଆଲାବନ୍ ଆ ଡାଙ୍ଗଡ଼ିଅନ୍ ବାଗୁ ଡକୋଏନ୍; ଆସୋଡ଼ା ଡାଙ୍ଗଡ଼ିଅନନ୍ ଆଞୁମ୍ ଲେୟା, ଆସନ୍ନାଡାଙ୍ଗଡ଼ିଅନନ୍ ଆଞୁମ୍ ରାଏଲ୍ । 17 ଲେୟାନ୍, ଆକନି ବନ୍ଡ ରାଏଲନ୍ ମନଙ୍ଡମ୍ ଡକୋଏନ୍ । 18 ଆରି ଜାକୁବନ୍ ରାଏଲନ୍ଆଡଙ୍ ଡୁଙ୍ୟମେନ୍; ତିଆସନ୍ ଆନିନ୍ ଜାଲଙ୍ଲେ ବରେନ୍, "ଆସନ୍ନା ଡାଙ୍ଗଡ଼ିଅନ୍ନମ୍ ରାଏଲନ୍ ଆସନ୍ ଞେନ୍ ସାତ ବର୍ସେଙ୍ କମ୍ୱାରିନ୍ ଡକୋତନାୟ୍ ।" 19 ସିଲତ୍ତେ ଲାବନନ୍ ବରେନ୍, "ଆନ୍ନାମରନ୍ଆଡଙ୍ ଆତ୍ରିୟ୍ତାଞନ୍ ଆପାଲ୍ତେଙ୍ ଆମନ୍ଆଡଙ୍ ଆତନିୟ୍ ଗୋଗୋୟ୍ ମନଙ୍; ମଙ୍ବାଞେନ୍ ଡକୋନା ।" 20 କେନ୍ଅନ୍ତମ୍ ଜାକୁବନ୍ ରାଏଲନ୍ ଆସନ୍ ସାତ ବର୍ସେଙ୍ କମ୍ୱାରିନ୍ ଡକୋଲନେ; ଆରି ରାଏଲନ୍ ଆସନ୍ ଏନ୍ନେଲେ ଆ ଡନୁଙ୍ୟମନ୍ ଡକୋଏନ୍ ଡ ତି ଆ ସାତ ବର୍ସେଙ୍ ଆନିନ୍ ଆସନ୍ ଅସୋୟ୍ ଡିନା ଅନ୍ତମ୍ ଅବ୍ଡିସୟେନ୍ । 21 ତି ସିଲଡ୍ଲ୍ଲନ୍ ଜାକୁବନ୍ ଲାବନନ୍ଆଡଙ୍ ବରେନ୍, "କମ୍ୱାରି ଡିନାଞେନ୍ ତୁଙ୍ଲାୟ୍, ନମି ଡାଙ୍ଗଡ଼ିଅନ୍ନମ୍ ତିୟିଁୟ୍ ଞେନ୍ ଆନିନ୍ ସରିନ୍ ବିବାତନାୟ୍ କି ଆନିନ୍ ସରିନ୍ ଡକୋତନାୟ୍ ।" 22 ସିଲତ୍ତେ ଲାବନନ୍ ତି ଆଡ୍ରକୋନେ ଅଡ଼୍କୋ ମନ୍ରାନ୍ଆଡଙ୍ ରୁକୁଲେ ବୁଜିନ୍ ତୁବେନ୍ । 23 ଆସ୍ରାଲ୍ଲୁମେନ୍ ଆଡିଡ୍ ଆନିନ୍ ଆଡାଙ୍ଗଡ଼ିଅନନ୍ ଲେୟାନ୍ଆଡଙ୍ ଜାକୁବନ୍ ଆମଙ୍ବା ଓରୋଙ୍ଲାୟ୍; ଆରି ଆନିନ୍ ସରିନ୍ ଲୁଡେନ୍ । 24 ଆରି ଲାବନନ୍ ଆଡାଙ୍ଗାଡ଼ିଅନନ୍ ଲେୟାନ୍ ଆକମ୍ୱାରିବୟ୍ ଆଡନେ ଆସନ୍ ସିଲ୍ପାନ୍ ଆଞୁମ୍ବୟ୍ ଆ କମ୍ୱାରିବଜନ୍ ତିୟେନ୍ । 25 ବନ୍ଡ ଆସ୍ରାଆରେନ୍ ଆଡିଡ୍, ଗିଜା ଆନିନ୍ ତ ଲେୟାନ୍ ! ସିଲତ୍ତେ ଜାକୁବନ୍ ଲାବନନ୍ଆଡଙ୍ ବରେନ୍, "ଆମନ୍ ଞେନ୍ ସରିନ୍ ଇନିବା କେନ୍ ଏଃନେଲେ ଲୁମେନ୍ ? ଞେନ୍ ଇନି ରାଏଲନ୍ ଆସନ୍ କମ୍ୱାରିନ୍ ଅଃଡକୋଲନାୟ୍ ପଙ୍; ତିଡେନ୍ ଇନିବା ଞେନ୍ଆଡଙ୍ କଣ୍ଡାୟ୍ଲିଁୟ୍ ?" 26 ସିଲତ୍ତେ ଲାବନନ୍ ବର୍ରନେ, "ଆସୋଡ଼ାନ୍ ଡକୋନ୍ ଡକୋନ୍ ଆସନ୍ନାନ୍ ଆତେ ଆତନିୟ୍ ଆସନ୍ ଡେସାଲେନ୍ ଅନଗଡ୍ ଏନ୍ନେଲ୍ତଡ୍ । 27 କେନ୍ ଆପାଲ୍ଲି ବବ୍ରିଜା, ସିଲତ୍ତେ ଆମନ୍ ସାତ ବର୍ସେଙ୍ କମ୍ୱାରି କାବ୍ବାଡ଼ାଞେନ୍ ଲୁମ୍ନ୍ତେ, ତିଡେନ୍ କେନ୍ ଆଡାଙ୍ଗଡ଼ିଅନ୍ଆଡଙ୍ ଜାୟ୍ ଆମନ୍ଆଡଙ୍ ତିୟ୍ତମ୍ ।" 28 ସିଲତ୍ତେ ଜାକୁବନ୍ ତି ଆ ପାଲ୍ଲି ବବ୍ରିଜେନ୍; ସିଲତ୍ତେ ଲାବନନ୍ ଆନିନ୍ ସରିନ୍ ଆଡାଙ୍ଗଡ଼ିଅନନ୍ ରାଏଲନ୍ଆଡଙ୍ ଅବ୍ବିବାଏନ୍ । 29 ଆରି ରାଏଲନ୍ ଆକମ୍ବାରିବୟ୍ ଆଡନେ ଆସନ୍ ଆନିନ୍ ବିଲ୍ଆନ୍ ଆଞୁମ୍ ଆକମ୍ବାରିବୟ୍ ତିୟେନ୍ । 30 ସିଲତ୍ତେ ଆନିନ୍ ରାଏଲନ୍ ବାତ୍ତେ ଲୁଡେନ୍ ଆରି ଲେୟାନ୍ ସିଲଡ୍ ରାଏଲନ୍ଆଡଙ୍ ଗୋଗୋୟ୍ ଡୁଙ୍ୟମେନ୍; ଡ ଆରି ସାତ ବର୍ସେଙ୍ ଲାବନନ୍ ଆ କମ୍ୱାରି ଡକୋଲନେ ।
ଜାକୁବନ୍ ଆ ଅନ୍ଜି
31 ପ୍ରବୁନ୍ ଆଗ୍ରିଜେନ୍ ରାଏଲନ୍ ଲେୟାନ୍ଆଡଙ୍ ଏର୍ଡନୁଙ୍ୟମ୍ ସଙ୍ଗାତାଏନ୍, ତି ଆସନ୍ ଇସ୍ୱରନ୍ ଲେୟାନ୍ଆଡଙ୍ ଆସିର୍ବାଦଏନ୍ ଆରି ପସିଜନ୍ କୋଡେନ୍ ବନ୍ଡ ରାଏଲନ୍ ଆଞ୍ଜେଏନ୍ ପସିୟ୍ଜି ଅଃକୋଡ୍ଲୋ । 32 ତିଆସନ୍ ଲେୟାନ୍ ତିଲ୍କୋଡ୍ଡାଲେ ଓବ୍ବାସିୟ୍ କୋଡେନ୍, ଆଞୁମନ୍ ରୁବେନ୍ ଡାଙ୍ଗଡ଼ାଅନନ୍ଆଡଙ୍ ଗିୟ୍ବା ଅବ୍ଞୁମେନ୍; ଇନିଆସନ୍ଗାମେଣ୍ଡେନ୍ ଆନିନ୍ ବର୍ରନେ, "ପ୍ରବୁନ୍ ଡୁକଞେନ୍ ଗିୟ୍ଲିଁୟ୍; ନମି ଅୟ୍ତବ୍ଞେନ୍ ଞେନ୍ଆଡଙ୍ ଡୁଙ୍ୟମ୍ତିଁୟ୍ ।" 33 ଆରି ଆନିନ୍ ତିଲ୍କୋଡ୍ଡାଲେ ଓବ୍ବାସିଜନ୍ କୋଡ୍ଲେ ବର୍ରନେ, "ଞେନ୍ ଆଗନବ୍ରଡ୍ମଡ୍, କେନ୍ଆତେ ପ୍ରବୁ ଅମ୍ଡଙ୍ଲେ ଞେନ୍ଆଡଙ୍ କେନ୍ ଆଡାଙ୍ଗାଡ଼ାଅନ୍ ତିୟ୍ଲିଁୟ୍," ତିଆସନ୍ ଆନିନ୍ ଆଞୁମନ୍ ସିମିୟନ୍ ଆଗ୍ରାମ୍ଗାମ୍ ଅନମ୍ଡଙ୍ ଅବ୍ଞୁମେନ୍ । 34 ଆରି ଆନିନ୍ ତିଲ୍କୋଡ୍ଡାଲେ ଓବ୍ବାସିଜନ୍ କୋଡ୍ଲେ ବର୍ନେ, "କେନ୍ସିଲଡ୍ ଅୟ୍ତବ୍ଞେନ୍ ଡଅଙ୍ଞେନ୍ ଲଡୟ୍ତେ, ଇନିଆସନ୍ଗାମେଣ୍ଡେନ୍ ଞେନ୍ ଆନିନ୍ ଆସନ୍ ୟାଗି ଓବାଅନନ୍ କୋଡ୍ଲେ ତିୟ୍ଲାୟ୍," ତିଆସନ୍ ଆଞୁମନ୍ ଲେବି ଆଗ୍ରାମ୍ଗାମ୍ ମଗାଡ୍ ଅବ୍ଞୁମେନ୍ । 35 ତି ସିଲଡ୍ଲ୍ଲନ୍ ଆରି ତିଲ୍କୋଡେନ୍, ଆନିନ୍ ଓବ୍ବାସିଜନ୍ କୋଡ୍ଲେ ବର୍ରନେ, "ନମି ଞେନ୍ ପ୍ରବୁନ୍ଆଡଙ୍ ସେଙ୍କେନ୍ତାୟ୍," ତିଆସନ୍ ଆନିନ୍ ଆଞୁମନ୍ ଜିଉଦା ଆଗ୍ରାମ୍ଗାମ୍ ପ୍ରବୁନ୍ ଆସେଙ୍କେନ୍ ଅବ୍ଞୁମେନ୍ । ତି ସିଲଡ୍ଲ୍ଲନ୍ ଲେୟାନ୍ ଆରି ପସିଜନ୍ ଅଃକ୍କୋଲୋ ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)