ଆବୋଞାଙଞ୍ଜିଆଡଙ୍ ଜୋସେପନ୍ ଆସନେକୁଲ୍
1 ତି ସିଲଡ୍ଲ୍ଲନ୍ ଜୋସେପନ୍ ଆମଙ୍ବା ଆତନଙ୍ ଆଡ୍ରକୋଏନ୍ ଆମନ୍ରାଞ୍ଜି ଆତେମଡ୍ଲୋଙ୍ ଆନିନ୍ଡମ୍ ଲଡ୍ଲଡ୍ଜିଲନ୍ ଅଃରପ୍ତିଲନ୍ ସୋଡ଼ା ସର୍ରଙନ୍ ବାତ୍ତେ ବର୍ନେ, "ମୁକାବାଞେନ୍ ସିଲଡ୍ ଅଡ଼୍କୋ ମନ୍ରାନ୍ଆଡଙ୍ ଅମ୍ଡୁଙ୍ବା ।" ସିଲତ୍ତେ ଆମଙ୍ବା ଆନ୍ନିଙ୍ ଅଃଡକୋଲଞ୍ଜି, ଜୋସେପନ୍ ଆବୋଞାଙଞ୍ଜି ଆତେମଡ୍ ଆନିନ୍ଡମ୍ ଆବର୍ନେ ବର୍ନେ । 2 ଆନିନ୍ ସୋଡ଼ା ସର୍ରଙନ୍ ବାତ୍ତେ ଏନେଲେ ୟେନ୍ ଡ, ମିସ୍ରିୟଞ୍ଜି ଡ ପାରୋନ୍ ଆସିଙ୍ ଆଡ୍ରକୋଏନ୍ ଆ ମନ୍ରାଜି ଜାୟ୍ ଅମ୍ଡଙେଞ୍ଜି । 3 ଜୋସେପନ୍ ଆ ବୋଞାଙଞ୍ଜିଆଡଙ୍ ବରେନ୍, "ଞେନ୍ ଜୋସେପନ୍; ଆପେୟ୍ଞେନ୍ ପଙ୍ ନମିଆନ୍ତାନ୍ ଆମେଙ୍ଡକୋ ?" ତି ସିଲଡ୍ଲ୍ଲନ୍ ଆବୋଞାଙଞ୍ଜି ଆନିନ୍ଆଡଙ୍ ଆତେମଡ୍ ବତଙ୍ଲେ ଇନ୍ନିଙ୍ ଜାଲଙ୍ଲେ ଅରପ୍ତିଲୋଜି । 4 ତି ସିଲଡ୍ଲ୍ଲନ୍ ଜୋସେପନ୍ ଆବୋଞାଙଞ୍ଜିଆଡଙ୍ ବରେନ୍, "କାକୁର୍ତିତନାୟ୍, ଅମଙ୍ଞେନ୍ ଜିରାୟ୍ବା," ସିଲତ୍ତେ ଆନିଞ୍ଜି ଆମଙ୍ବାନ୍ ଆଜିର୍ରେଞ୍ଜି, ଆନିନ୍ ବର୍ନେ, "ଞେନ୍ ବୋଞାଙ୍ବେନ୍ ଜୋସେପନ୍, ଆନାଆଡଙ୍ ଆମ୍ୱେଞ୍ଜି ମିସର୍ ଆରିୟେଞ୍ଜି ଆ ମନ୍ରାଜି ଆମଙ୍ ଏତମେନ୍ । 5 ବନ୍ଡ, ଆମ୍ୱେଞ୍ଜି ଞେନ୍ଆଡଙ୍ କେନ୍ତ୍ତେନେ ଆଜନିର୍ ଆସନ୍ ଏତମ୍ଲିଁୟ୍ ଗାମ୍ଲେ ନମି ଡୁକ୍କ ଡ ରମ୍ମଙ୍ ରମ୍ମଙ୍ ଏବରାବ୍ଡଙ୍ନେ; ଇନିଆସନ୍ଗାମେଣ୍ଡେନ୍ ଇସ୍ୱରନ୍ ପରାନ୍ନା ଆନମେଙ୍ ଆସନ୍ ଆମ୍ୱେଞ୍ଜି ଆମ୍ମୁଙ୍ ଞେନ୍ଆଡଙ୍ ଆପ୍ପାୟ୍ଲିଁୟ୍ । 6 ଗିୟ୍ବା, ବଗୁ ବର୍ସେଙ୍ ଡେଏନ୍ ଡେସାଲୋଙନ୍ କାନ୍ତାରାଏନ୍; ଆରି ମନ୍ଲୟ୍ ବର୍ସେଙ୍ ଡକୋ କାନ୍ତାରାତେ, ତେତ୍ତେ ଅର୍ରନ୍ ଅଡ଼େ ଜନ୍ରୋମନ୍ ଆ ଗଃଗନେନ୍ ଅଃଡ୍ଡେଏ । 7 ତିଆସନ୍ ଇସ୍ୱରନ୍ ପୁର୍ତିଲୋଙନ୍ କେଜ୍ଜାବେନ୍ ଆଡନୋବ୍ ଆସନ୍ ଆରି ବରନ୍ତଙନ୍ ଆକାନ୍ତାରା ସିଲଡ୍ ଆମ୍ବେଞ୍ଜିଆଡଙ୍ ଆନବ୍ମେଙ୍ ଆସନ୍ ଇସ୍ୱରନ୍ ଆମ୍ମୁଙ୍ମା ଞେନ୍ଆଡଙ୍ ତେନ୍ନେ ଆପ୍ପାୟ୍ଲିଁୟ୍ । 8 ତିଆସନ୍ ଆମ୍ୱେଞ୍ଜି ଞେନ୍ଆଡଙ୍ କେନ୍ ତେନ୍ନେ ଏଆପ୍ପାଲିଁୟ୍, ତି ତଡ୍, ଇସ୍ୱରନ୍ ଆପ୍ପାୟ୍ଲିଁୟ୍; ଆରି, ଆନିନ୍ ଞେନ୍ଆଡଙ୍ ପାରୋନ୍ ଆ ଆପେୟ୍ ଡ ଆସିଙନ୍ ଆ ପ୍ରବୁ ଡ ସମ୍ପରା ମିସର୍ ଡେସାନ୍ ଆସାଉକାର ଏମ୍ମେଲିଁୟ୍ । 9 ତିଆସନ୍ ଆମ୍ୱେଞ୍ଜି ଲଜିର୍ ଆପେୟ୍ଞେନ୍ ଆମଙ୍ ଇୟ୍ଲେ ଆନିନ୍ଆଡଙ୍ ଇୟ୍ବର୍ବା, ଇସ୍ୱରନ୍ ଞେନ୍ଆଡଙ୍ ସମ୍ପରା ମିସର୍ ଡେସାନ୍ ଆସୋଡ଼ାମର୍ ଏମ୍ମେଲିଁୟ୍; ଆମ୍ୱେନ୍ ଅମଙ୍ଞେନ୍ ଜିରାୟ୍ବା, ଏଅବ୍ଡିଙ୍ଡଙ୍ନେ । 10 ଆମନ୍ ଡାଙ୍ଗଡ଼ାଅନନ୍, ଉଲ୍ଲେଙନ୍ ଡ ଅସିଙନ୍ ଆବନନ୍ ଜନ୍ତୁଜି ଅଡ଼୍କୋନ୍ ସରିନ୍ ଗୋସେନ୍ ଡେସାଲୋଙନ୍ ଡକୋଲନ୍ ମଙ୍ବାଞେନ୍ ଏଅବ୍ଡମ୍ତନେ । 11 ତି ଆଡ୍ରକୋନେଲୋଙ୍, ଞେନ୍ ଆମ୍ୱେଞ୍ଜିଆଡଙ୍ ତୁର୍ଡାତବେନ୍; ଇନିଆସନ୍ଗାମେଣ୍ଡେନ୍ ଆରି ମନ୍ଲୟ୍ ବର୍ସେଙ୍ କାନ୍ତାରାନ୍ ଡକୋତନ୍; ଇଜ୍ଜାଡେନ୍ ଆମ୍ୱେନ୍ ଡ ଅସିଙ୍ମର୍ବେଞ୍ଜି ଅଡ଼୍କୋନ୍ ଡୋଲେୟ୍ମରନ୍ ଡେତବେନ୍ ।
12 ଗିୟ୍ବା, ମୁକାଞେନ୍ ଆମ୍ୱେଞ୍ଜିଆଡଙ୍ କେନ୍ ଆବର୍ନେ ବର୍ତବେନ୍, କେନ୍ଆତେ ଅମଡ୍ବେନ୍ ଡ ବୋଞାଙ୍ଡମ୍ଞେନ୍ ବିନ୍ୟାମିନନ୍ ଆମଡ୍ ଗିୟ୍ତେ । 13 ତିଆସନ୍ ଆମ୍ୱେଞ୍ଜି କେନ୍ ଆ ମିସର୍ ଡେସାଲୋଙ୍ ବୋର୍ସାଞେନ୍ ଆକାବାଡ଼ା ଇନିଜି ଏଗିୟ୍ତେ, ତି ଅଡ଼୍କୋନ୍ ଆପେୟ୍ଞେନ୍ଆଡଙ୍ ଅବ୍ଜନାଲେ ଆନିନ୍ଆଡଙ୍ ଲଜିର୍ କେନ୍ତେନ୍ନେ ଓରୋଙାୟ୍ବା ।" 14 ତି ସିଲଡ୍ଲ୍ଲନ୍ ଆନିନ୍ ଆବୋଞାଙ୍ଡମନ୍ ବିନ୍ୟାମିନନ୍ ଆସଙ୍କା ଞମ୍ଲେ ୟେଏନ୍ ବେଞ୍ଜାମିନନ୍ ଜାୟ୍ ଆନିନ୍ କୋଣ୍ତୋଡାଲେ ୟେୟେଡାଲନ୍ । 15 ଆରି, ଜୋସେପନ୍ ଆନ୍ନା ଆବୋଞାଙଞ୍ଜିଆଡଙ୍ ଜୋର୍ଜୋରେନ୍ ଡ ଆନିଞ୍ଜିଆଡଙ୍ ଞମ୍ଲେ ୟେଏନ୍ । ତି ସିଲଡ୍ଲ୍ଲନ୍ ଆବୋଞାଙଞ୍ଜି ଆନିନ୍ ସରିନ୍ ଅଲ୍ବରେଞ୍ଜି ।
16 ଆରି ଜୋସେପନ୍ ଆବୋଞାଙ୍ଜି ଜିର୍ରାଜି, କେନ୍ ଆବର୍ନେ ପାରୋନ୍ ଆସିଙ୍ ଜାୟ୍ ଅଡ଼ୋଏନ୍, ପରୋନ୍ ଡ ଆକମ୍ୱାରିଞ୍ଜି ଅଡ଼୍କୋନ୍ ସର୍ଡାଏଞ୍ଜି । 17 ଆରି, ପାରୋନ୍ ଜୋସେପନ୍ଆଡଙ୍ ବରେନ୍, "ଆମନ୍ ବୋଞାଙ୍ନମ୍ଞ୍ଜିଆଡଙ୍ ବରା, ଆମ୍ୱେଞ୍ଜି କେନ୍ ଆକାବ୍ବାଡ଼ା ଲୁମ୍ବା; ରମ୍ମଙ୍ ରମ୍ମଙ୍ ଆ ଜନ୍ତୁଜି ଜନ୍ରୋମନ୍ ଅଃବୋୟ୍ଲେ କିଣାନ୍ ଡେସାନ୍ ଜିର୍ବା, 18 ଆରି, ଆପେୟନ୍ଆଡଙ୍ ଡ ତର୍ଡମ୍ ତର୍ଡମ୍ ଅଡ଼୍କୋନ୍ ଆସିଂମର୍ଜିଆଡଙ୍ ଓରୋଙ୍ଲେ ଅମଙ୍ଞେନ୍ ଜିରାୟ୍ବା; ଞେନ୍ ଆମ୍ୱେଞ୍ଜିଆଡଙ୍ ମିସର୍ ଡେସାନ୍ ଆ ମନଙ୍ ଜନବ୍ ଏତିୟ୍ତବେନ୍, ଆରି, ଆମ୍ୱେଞ୍ଜି ଡେସାନ୍ ଅଡ଼୍କୋନ୍ ସିଲଡ୍ ମନଙନ୍ ଆଜନୋମ୍ ଏଜୋମ୍ତେ । 19 ନମି ବନାଁୟ୍ବର୍ଞେନ୍ ଅନ୍ତମ୍ କେନ୍ ଆକାବ୍ବାଡ଼ା ଲୁମ୍ବା, ଆମ୍ୱେଞ୍ଜି ତର୍ଡମ୍ ତର୍ଡମ୍ ଆପସିୟ୍ଜି ଡ ଡୁକ୍ରିବେଞ୍ଜି ଆସନ୍ ମିସର୍ ଡେସାନ୍ ସିଲଡ୍ ଗାଡ଼ିନ୍ ପାଙ୍ବା, ଆରି, ଆପ୍ପେୟ୍ବେନ୍ଆଡଙ୍ ଓରୋଙାୟ୍ବା । 20 ଆରି ଜନବ୍ବେଞ୍ଜି ଆବର୍ନେ ଏଇୟମ୍ଡଙେ; ସମ୍ପରା ମିସର୍ ଡେସାନ୍ ଆ ମନଙ୍ ଜନବ୍ ଆମ୍ୱେନ୍ଆତେ ଡେତେ ।" 21 ସିଲତ୍ତେ ଜାକୁବନ୍ ଆ ଡାଙ୍ଗାଡ଼ାଅଞ୍ଜି ତିଅନ୍ତମ୍ ଲୁମେଞ୍ଜି; ଆରି ଜୋସେପନ୍ ପାରୋନ୍ ଆ ବନାଁୟ୍ବର୍ ଅନ୍ତମ୍ ଆନିଞ୍ଜିଆଡଙ୍ ସଗଡ଼ାନ୍ ଡ ଜନୋମ୍ ଜନବନ୍ ତିୟେଞ୍ଜି । 22 ଆରି, ଡିଲେ ମନ୍ରାନ୍ଆଡଙ୍ ତଙ୍ବାଗୁ ସିନ୍ରିନ୍ ତିୟେନ୍, ବନ୍ଡ ବିନ୍ୟାମିନ୍ଆଡଙ୍ ୟାଗିସ ସେକଲ୍45:22 ୩.୫କେଜି ରୁପାଡାବନ୍ ଡ ଦସଟା ସିନ୍ରିନ୍ ତିୟେନ୍ । 23 ଆରି, ଆପେୟନ୍ ଆସନ୍ ମିସର୍ ଡେସାନ୍ ଆ ମନଙ୍ ମନଙ୍ ଜିନିସଞ୍ଜି ଆ ଆବ୍ବୋୟ୍ ଦସଟା ଗୋଡୋଁୟନ୍ ଡ ଆପ୍ପେୟନ୍ ଆଜନୋମ୍ ଆସନ୍ ଜନ୍ରୋମନ୍ ଡ ରୁଟିନ୍ ଏର୍ଜାଡ଼ିକାନ୍ ଜନୋମ୍ ଜିନିସଞ୍ଜି ଦସ୍ଟା ଗୋଡୋଁୟ୍ଲୋଙନ୍ ଅଃବୋୟ୍ଡାଲେ ଆପ୍ପାୟେନ୍ । 24 କେନ୍ ଅନ୍ତମ୍ ଜୋସେପନ୍ ଆବୋଞାଙଞ୍ଜିଆଡଙ୍ ଆରାପ୍ପାୟେଞ୍ଜି, ଆନିଞ୍ଜି ଜିରେଞ୍ଜି; ଆରି, ଆନିନ୍ ଆନିଞ୍ଜିଆଡଙ୍ ବରେନ୍, "ମନଙ୍ ଜିର୍ବା, ତଙରନ୍ ଏୟ୍ଗୋଡ଼େଡଙ୍ନେ ।"
25 ତି ସିଲଡ୍ଲ୍ଲନ୍ ଆନିଞ୍ଜି ମିସର୍ ଡେସାନ୍ ସିଲଡ୍ ଜିର୍ରେ କିଣାନ୍ ଡେସାନ୍ ଆପେୟନ୍ ଜାକୁବନ୍ ଆମଙ୍ବା ଅଡ଼ୋଏଞ୍ଜି । 26 ଆରି, ଆନିଞ୍ଜି ଆନିନ୍ଆଡଙ୍ ବରେଞ୍ଜି, "ଜୋସେପନ୍ ନମିଆନ୍ତାନ୍ ଆମେଙ୍ ଡକୋ, ଆରି ଆନିନ୍ ସମ୍ପରା ମିସର୍ ଡେସାନ୍ ଆ ସାଉକାରଡେନ୍ ।" ସିଲତ୍ତେ ଜାକୁବନ୍ ଆଉଗର୍ ରାଉଡେନ୍, ବନ୍ଡ ଆନିନ୍ ଆନିଞ୍ଜିଆଡଙ୍ ଅଃଡର୍ରନେ ।
27 ଆରି, ଜୋସେପନ୍ ଡିଅଙ୍ଗା ଆବର୍ନେ ଆନିଞ୍ଜିଆଡଙ୍ ବରେନ୍, ତି ଅଡ଼୍କୋନ୍ ଆବର୍ନେ ଆନିନ୍ଆଡଙ୍ ବରେଞ୍ଜି । ବନ୍ଡ ଆନିନ୍ ଆନିନ୍ଆଡଙ୍ ଆନୋରୋଙ୍ ଆସନ୍ ଜୋସେପନ୍ ଆନାପ୍ପାୟ୍ ଗାଡ଼ିନ୍ ଅଡ଼୍କୋନ୍ ଗିଜେନ୍, ତିଆଡିଡ୍ ଆପେୟଞ୍ଜି ଜାକୁବନ୍ ଆପୁରାଡ଼ା ୟର୍ମେଙେନ୍ । 28 ସିଲତ୍ତେ ଜାକୁବନ୍ ବର୍ନେ, "ସରି; ଞେନ୍ ଜିର୍ତେ, ଅନ୍ରଙ୍ ରବୁଇଞନ୍ ଆମ୍ମୁଙ୍ ଆନିନ୍ଆଡଙ୍ ଗିୟ୍ତାୟ୍ ।"
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)