1 Aŋ ääŋkalaŋ Yeecüwa yudit koon mooye yaana battä me ogo Janacareet*5.1 Janacareet a yäṇtäŋ yaŋkalaŋ yen koon mooye yen mä Jalïïl. ye ḍok, aŋ Ike ïrï me wic aŋ tïñtä yok tiŋit Jiik Jooŋ. 2 Aŋ Ike yuṭṭu kuudgu kä yewwe yudok witken agene ṭukin ti koon mooye pok, aŋ m’aka müügü yak ye, a kääjïnï woo lükï yokïn äŋkä yeeken. 3 Aŋ Ike taappä kuun yaŋkalaŋ jï i a yen Camaan, aŋ kiinne ogo wükco ti ko ḍeeraŋ piitti. Aŋ Ike wäättana cääjjin ïñï kuun jï nüütï me. 4 Aŋ wääna ḍaŋŋee kä jiik ye, Camaan kiinne ogo, "Wükce ṭeejjük, aŋ äŋkä yeekic yïïce."

5 Aŋ luugi Camaan ogo, "Men mooye, ikoon ñuugulonon kä yaac wïïrïn jïñe muure, aŋ ikoon batta agon mükïn ginkalaŋ. Aŋ kä jiik yüükü äŋkä yeeki bi yibjä." 6 Aŋ wääna naŋene daa aŋan ye, iken müügïn yak kä ḍiräk kä yaac ke ääŋ ṭäkï iirte. 7 Aŋ meken yaaka äätene kä kuun yaŋkalaŋ ti ye, bärki ogo ääto iken yüükkïï ti. Aŋ äätin aŋ kuudgu yaaka kä yewwe ye, küümgï kä yak ke ṭäkï müñene. 8 Aŋ wääna nääŋkä yaakka yoorene daa Camaan yaana battä me ogo Bütürüc ye, i ḍüŋjïn ïñï Yeecüwa ñome ti aŋ kiinne ogo, "Pïṭo, wükcü woo ika ti! Ika agä men yaajgonḍe." 9 Aŋ witken ḍiiktin ke meken yaaka ke ike ye, kä yak yaaka müügï kä ḍiräk yaakka, 10 cäänna ke Yaagüüp ke Yuhanna merkä Jabadï a Camaan meken. Aŋ Yeecüwa Camaan kiinne ogo, "Ŋana ïkï booju! Kä tiññaŋŋä ke ñomuk ïkï bi wäätci agä m’ana müügü me ye." 11 Aŋ wääna kuudgu ḍuukene daa woo koon mooye wic ye, waak muure dalibuwin aŋ iken bäätcin Yeecüwa ti.

12 Aŋ ääŋkalaŋ Yeecüwa cääy baan mooye yaŋkalaŋ ti, aŋ oon kalaŋ äätin yore a eeton woo näkä jaan. Aŋ wääna Yeecüwa yoorreeda kä ye, i ḍüŋjïn ïñï aŋ Yeecüwa ñujgene yok ogo, "Mügdo, naana Ïkï gïmmädä ye, i laatca yokïn woo!" 13 Aŋ Yeecüwa ïṇte lajjene aŋ tamme yok aŋ jaajjin ogo, "Ika gïmmädä. Latci woo!" Aŋ kä ḍeeraŋ aŋŋi jaan baakkin yore ti. 14 Aŋ kiini Yeecüwa ogo, "Mäŋkalaŋ ŋana nüütküdü, atä aŋ yorü nüütkü män daaŋ aŋ äccä errä wäämmä yok yaana iini Müüca ye, dalä wäätï a ŋäjjin iken ti ogo ïkï latteey woo." 15 Aŋ jiik yeeke üüttïn kä piirjin woo kä yaac, aŋ ṭoŋ äätïdï Ike ti tiŋit jiik yeeke aŋ iken ṭeeñtä kä rackïtenen. 16 Aŋ ääŋkalaŋ Ike kaaccïdï woo pare atcïdï mäṭï woo käpet.

17 Aŋ ääŋkalaŋ ti Yeecüwa nüütï me, aŋ Pïrrïcïïnnï yakkalaŋ bilti wïca ke nüütoni yek jiik ḍoocin, yaaka äätin ätä bänkä ṭulgen yek mä Jalïïl ke Yühüdïya ke yakkalaŋ cäänna ätä Oorcalïïm. Aŋ teynä Pïṭo üükïn woo Ike ti, aŋ rackä lïïlde kä ṭeeñdin.

18 Aŋ mäkkalaŋ äätin ḍürït m’ana yore a diton ye kä gaan nïïnkä, aŋ iken määjï waan yaana yoku kaaccï ko äräk aŋ ḍooccïda ko ïñï ñome ti ye. 19 Aŋ kä ḍiirin me iken wääna batta agene käñin kä waan yaana kaacene kä äräk ye, m’ana yore a diton ye, aajjene kä ñaalok än wic aŋ än lärki aŋ duudi ïñï kä gaan nïïnkä ṭeejjük Yeecüwa ñome ti, me ḍiirken yaakka gïtï.

20 Aŋ wääna Yeecüwa yuṭṭee kä luggin yeenen ye, i m’ana yore a diton yaanna, kiinne ogo, "Muukonḍi, nääŋkä yaackä yüükü a külkïnï."

21 Aŋ Pïrrïcïïnnï ke nüütoni jiik ḍoocin yek Jooŋ luugjin pääken ogo, "Men yaanna a ŋaani, ina kiirä yaanna? A Jooŋ pare ken lïïṭït külkïdï nääŋkä yaackä."

22 I daa paydinni yeeken ŋäjjänä Yeecüwa, aŋ taaññe ogo, "Ikee payde jiik yaakka juuggic ti ina? 23 A yaana wali ye ken poṭulaŋ jaajjä kä, ‘Nääŋkä yaackä yüükü a külkïnï,’ halla jiik, ‘Juwu ñaalok aŋ atä?’ 24 Aŋ Ika ṭäkä ikee ŋäjje ogo Minneni Mänbaan cääygïïda ko mügdïn ŋommañ wic yen kulkin nääŋkä yaackä." Aŋ m’ana yore a diton ye, kiinne ogo, "Ïkï kiineni, juwu ñaalok, aŋ gaan nïïnkä yüünü koowu aŋ atä paa!"

25 Aŋ men me oññe yokïn juwin ñaalok me ñomgen ti i daamgä me, aŋ gaan nïïnkä yeene koowne aŋ attä paa, i mäŋï Jooŋ. 26 Aŋ me muure witken ḍiiktin kä juwinene, aŋ me mäŋjin ñaalok Jooŋ ti. Aŋ iken näkki liin, aŋ jaajjin ogo, "Tiññaŋ ikoon yuṭṭon waak yäwkä!"

27 Aŋ wääna Yeecüwa kaaccee kä woo ye, Ike yuṭṭu mäŋkalaŋ battä me ogo Laawï aŋ ike a ḍüṭo yaajgonḍe, cääy nänṭä ba' ḍüllü tiil, aŋ kiini Yeecüwa ogo, "Bäätä Ika ti." 28 Aŋ juwin wakkä mañjene ïñï muure, aŋ bäätcin Ike ti. 29 Aŋ Laawï Yeecüwa bärkene paa baanne aŋ näŋgene ammani jon ñamme, aŋ ḍüṭoni yaacken ḍiirken äätin ämmene kä ke mäkkalaŋ. 30 Aŋ baaddoni yeeke kiintä Pïrrïcïïnnï ke nüütoni jiik ḍoocin yek Jooŋ, ogo, "Ikee äme i ikee mäte ke ḍüṭoni yaacken ke mä yaackä ina?" 31 Aŋ luuki Yeecüwa ogo, "M’aka yoken ŋeraŋ ye batta ṭäkï ṭiiño, a m’aka a rackä ye. 32 Ika batta äätänä bäärä mä wotku. A mä yaackä ken umgudu ogo ḍago."

33 Aŋ mäkkalaŋ Yeecüwa kiini ogo, "Baaddoni yek Yaaya büüṭï aŋ mäṭï kä yaac, aŋ cäänna baaddoni yek Pïrrïcïïnnï, aŋ baaddoni yüükü ämï aŋ mätï ina?"

34 Aŋ luugi Yeecüwa ogo, "Yoku wilgä yek or ñääṇṇä naŋä büüṭï i mor or ñääṇṇä cäyok ke iken aŋŋi? Ba’ay. 35 Nïïnnä bi ätä yaana or ñääṇṇä koowge daa me iken ti ye, aŋ wäättan iken bi büüṭï."

36 Aŋ kiinne kä gäärrä yaanni ogo, "Baati m’ana jicä woo burŋu kïcconḍe pïïle aŋ küüpe daane ti ye. Naana aŋan ye burŋu pïïle yaana a kïcconḍe ye, daane bi jeje gïtï aŋ batta päjjïdï burŋu daane ti. 37 Aŋ baati m’ana määk cotku pooke kücam määk daane jï ye. Aŋ naana puukke ye, määk cotku bi kücam pürgü gïtï, aŋ määk bi puku woo aŋ kücam määk bi yaac. 38 Määk cotku pookcutu me kücam määk kïcconḍe jï. 39 Aŋ baati m’ana mätï määk dänken aŋ ṭäkï määk cotku ye, ike bi jaajjï ogo, ‘Määk dänken ñabaŋ!’"