1 Okna ibo yoba mudu ka pere pere dikre, ka swara keme digwa. 2 Ana ye akie mogl, ede dumo ade umara pi, dumo auduno ta yogwa kanigwa. Dumo i kagie Babilonia we digwa. Dumo i auduno yogwa kandre, ye dumo i kipai meglkwa. 3 Ye kipai moglsre, ere mogl yegl digwa, Nono we, nono makan koglwa pere yu, ake dage si, ere brik edinamniwe digwa. Edidre, brik i gigle dinabedi garamniwe digwa. Yegl ersre, ye yugu kobuglo wagle kekre, makan koglwa brik i wagle keigwa. Ye ama brik si dage panabedi ede nuglo yu, ake dage si padigl, keigwa. 4 Yoba brik garamniwe didre, ye ama ere mogl, yegl digwa, Nono taun podo ta kenamga. Kemun, taun kenamnara nono ama yugu swara ta kei ede mitna kaima, kamun mina ibo enamga. Yegl oromun, nono kagnono wanan, nono akie mogl, ede dumo bage bage uglo koglo koglo ta pikramniwe di, yegl digwa.

5 Ana Yawe ere mogl, yoba taun ya yugu podo keigwa i kanagledi ede atne ugwa. 6 Udre, ye yegl dugwa, Yoba i we, ye swara moglsre, ka swara keme digwa. Ye mabuno bogl kogon erikwa igne taragl podo yegl erikwa. Ana okuo we, ye siragl taragl eramnedi praiglkwa i, eraiglkwa kuno erabuka. 7 Ana nono we, nono ede yugu keimara atne pidre, ye kano ere pere pere ede tenamga. Ede tomun, yoba tau ka dibi, tau ye ta prikraiglmiwe dugwa. 8 Ana Yawe yegl didre, ye yegl mere ersre, yoba si pere pere edugwa. Si pere pere edugo, ye taun ere keigwa ikra kide kodo, akie moglkre, yoba ede dumo bage bage uglo koglo koglo pi kipai meglkwa. 9 Yawe yegl mere yoba kano ere pere pere ede tedre, yoba uglo koglo koglo bage bage moraiglmedi si pere pere edugwa pre dumo i Babel* we digwa.

10 Ana ka magigl paugwa i, Siem ya ye gawama kano paugwa. Siem bugla yugu 100 nedre, yagl gak ta kuglkwa, kagie Arpaksat we dugwa. Nigl kamun podo sugwa ikra dudugwa igne, ye bugla yugu suo nedre, gak i kuglkwa. 11 Ye Arpaksat kuglsre, okuo bugla yugu 500 ta ama mogl tebe edugwa. Bugla yugu 500 mogl tebe edumara suna i, ye yagl gak ya abai gak tau ama kuglkwa.

12 Ana Arpaksat bugla yugu 35 nedre, yagl gak ta kuglkwa, kagie Sela we dugwa. 13 Ye Sela kuglsre, bugla yugu 403 ta ama mogl tebe edugwa. Bugla yugu 403 mogl tebe edumara suna i, ye yagl gak ya abai gak tau ama kuglkwa.

14 Ana Sela bugla yugu 30 nedre, yagl gak ta kuglkwa, kagie Eber we dugwa. 15 Ye Eber kuglsre, bugla yugu 403 ta ama mogl tebe edugwa. Bugla yugu 403 mogl tebe edumara suna i, ye yagl gak ya abai gak tau ama kuglkwa.

16 Ana Eber bugla yugu 34 nedre, yagl gak ta kuglkwa, kagie Pelek we dugwa. 17 Ye Pelek kuglsre, bugla yugu 430 ta ama mogl tebe edugwa. Bugla yugu 430 mogl tebe edumara suna i, ye yagl gak ya abai gak tau ama kuglkwa.

18 Ana Pelek bugla yugu 30 nedre, yagl gak ta kuglkwa, kagie Reu we dugwa. 19 Ye Reu kuglsre, bugla yugu 209 ta ama mogl tebe edugwa. Bugla yugu 209 mogl tebe edumara suna i, ye yagl gak ya abai gak tau ama kuglkwa.

20 Ana Reu bugla yugu 32 nedre, yagl gak ta kuglkwa, kagie Seruk we dugwa. 21 Ye Seruk kuglsre, bugla yugu 207 ta ama mogl tebe edugwa. Bugla yugu 207 mogl tebe edumara suna i, ye yagl gak ya abai gak tau ama kuglkwa.

22 Ana Seruk bugla yugu 30 nedre, yagl gak ta kuglkwa, kagie Nahor we dugwa. 23 Ye Nahor kuglsre, bugla yugu 200 ta ama mogl tebe edugwa. Bugla yugu 200 mogl tebe edumara suna i, ye yagl gak ya abai gak tau ama kuglkwa.

24 Ana Nahor bugla yugu 29 nedre, yagl gak ta kuglkwa, kagie Tera we dugwa. 25 Ye Tera kuglsre, bugla yugu 119 ta ama mogl tebe edugwa. Bugla yugu 119 mogl tebe edumara suna i, ye yagl gak ya abai gak tau ama kuglkwa.

26 Ana Tera bugla yugu 70 nedre, okuo yagl gak suota kuglkwa. Ta kagie Abram we didre, ta kagie Nahor we didre, ta kagie Haran we dugwa.

27 Ana ka magigl paugwa i, Tera ya ye gawama kano paugwa. Tera ye yagl gak suota kuglkwa, kagno Abram ya Nahor ya Haran we dugwa. Te, Haran i we, ye yagl gak ta kuglkwa, kagie Lot we dugwa. 28 Haran ye agai dumo ta mam ye kuglmara moglsre, nem kor moglkwa igne Haran goglkwa. Dumo i Ur we digwa. Ur i, dumo podo kagie Kaldia we dimara suna yogwa. 29 Ana Abram ya Nahor i we, ye abu ibrika. Abram ebie kagie Sarai we digwa. Te, Nahor ebie kagie Milka we digwa. Nahor ebie Milka i, ye agigle Haran abuglo moglkwa. Te, Haran abuglo ta ama moglkwa, kagie Iska we digwa. 30 Ana Sarai we, ye temne paugwa pre gak ta kuglkrukwa.

31 Ana Tera ere mogl, wam Abram ya ebiamo Sarai idre, Haran wam Lot ikra ama idre, ye dumo Ur, dumo kade Kaldia suna yogwa ikra kide kodidre, ede dumo kade ta kantri mere yegl ta yogwa, Kenan we dimara enagledi ogwa. Ye akie dumo Kenan enamnedi eigwa ba ye konbo bage pi taun ta Haran we dimara pidre, kipai meglkwa. 32 Tera bugla yugu 205 nedre, dumo Haran i mogl, goglkwa.