1 Ana Laban nem agiglema bogl ede ikne yugunomugl eigo, Jekop yobama bogl ede dumo Kenan enamnedi eigwa. Eigo, God angeloma tau ye tegigl yeigwa. 2 Tegigl yeigo, Jekop ye kandre, yegl dugwa, Aya, dumo magigl i, God amimo u bage paimara yomiwe dugwa. Yegl didre, ye ere mogl, dumo i kagie Mahanaim* we dugwa.

3 Ana Jekop ere mogl, yoba tau ye kamo i pi dumo makan Seir pidre, ye agigle Iso di tenaiglkwa pre dedugwa. Dumo makan Seir i, kagie ta Idom we digwa. 4 Jekop yoba i ka yegl dinaiglmedi beke togwa, Iso yo, ene nigl kogonen yagl Jekop ye ene yegl di togwa, Na ege olto nono bawano Laban kipamara kipai moglka. Erme ye kipamara kide kodo, terke ede wiga. 5 Na erme kau ya donki, sipsip ya meme kuglko, niglna kogona yagl ya abu ama meglkwa. Na ene kipanara magigl udre, niglna kogona yoba ene di tenaiglmedi dediga i, ene gun yedre, mabuno wakai ere noratnga pre Jekop yegl dumiwe dio! dugwa.

6 Jekop yegl dugo, yoba tau dedugwa i kamo i pi agigle Iso di tedre, ede ikne wigwa. Ede ikne udre, ye Jekop yegl di teigwa, No ede Iso moglmara pidre, kanen di tomga. Di tomgo, ye yagl 400 yugo, bage u tegigl yenamnedi wimiwe digwa. 7 Ka yegl digo, Jekop kudugl podo goglsre, nomane podo si erukwa. Yegl ersre, ye yobama ya sipsip, meme, kau ya kamel ki buno di bage suo edugwa. 8 Ye prukwa, Iso u yoba bage swara meglkwa i ta kuda bogl tenan, yoba bage ta meglkwa i, teke ede enaiglmiwe di, yegl di prukwa.

9 Jekop yobama ya aglmo buglamo buno di bage suo edidre, ye Yawe kamage ere te yegl dugwa, Yawe yo, ene nina Aisak Godmo moglsre, yagl awana Abraham Godmo motnga. Enene na di nare, Ede ikne dumon kaminen, nen agiglnma meglmara po! dinga. Yegl didre, ene ama na di nare, Ene en, na ene ere wakai ere tenaluwe dinga. 10 Na we, na ene nigl kogonen yoba moglka ba na yagl wakai moglkrika. Na wakai moglkrika ba ene dinara adigl moglsre, na ake ple di natnga. Na okna nigl Jordan bai ede koglo eiga igne, na muglbo swara akidre ede eiga ba erme na yobanama ya taragl ere kuglka i, mere kide meglko, na buno di bage suo ediga. 11 Ana na kudugl goglka pre erme ene di prika, ene ake ple di notn, Iso u na ebina gagrama bogl no sikrabedi ene di prika. 12 Ene di natnga i, Ene ere wakai ere tedre, gawanma mere kide moraiglmedi ere edenagle dinga. Mere kide meglbi, yoba kerenaiglkwa kuno erekrabuka. Mudi nigl bina wesan mere kide yomere mere yegl moraiglmiwe dinga. Jekop yegl di, kamage erukwa.

13 Ana ye kamage yegl ere tedre, ye dumo i eduer ugl paugwa. Ye ugl pai, tagna kana aduglkwa igne ye taraglmo tau Iso tenagledi yubu si pere edugwa. 14,15 Ye meme abai 200 idre, meme kumugl 20-pela idre, sipsip abai 200 idre, sipsip kumugl 20-pela idre, kamel abai gagro am te meglkwa 30-pela gagro bogl idre, kau abai 40-pela idre, kau kumugl 10-pela idre, donki abai 20-pela idre, donki kumugl 10-pela idre, yubu si pere edugwa. 16 Yubu si pere edidre, ye nigl kogon yoba taragl i meglmere gi gide mage yenaiglmedi tedre, yegl dugwa, Ene aglna buglana i, mage i ede okna pio! Na okuo unaglka. Te, ene taragl kane kane, i magigl magigl mage i pikraiglkwa. Ene tau taragl kane ta meglkwa mage i ede okna ebi, ene tau kuri ta mogl, taragl kane ta meglkwa okuo mage i ede enaiglkwa. Te, tau okuo enaiglkwa ama yegl keme eraiglmiwe dugwa. 17 Yegl didre, ye ama yoba tau taragl kane swara ta meglkwa idre, ede okna kaima enaiglkwa i yegl di togwa, Ene ede ebi, na agra Iso bage unan, ene tegigl yenaiglkwa. Ene tegigl yebi, ye ere mogl, Ene ira niglmo kogonmo ere teme? didre, te, Ene agl bugla mage i wigwa i, ira aglmo buglamo meglme? didre, te, Ene i ede aglo eime? di, yegl ta dinan, 18 ene di ikne ede, yegl dinaiglkwa, Taragl i, ene nigl kogonen yagl Jekop taraglmo meglkwa. Ye yagl kademo Iso tenaiglmedi no dedugwa. Ye no mokonomugl u moglmiwe di, ene yegl dio! dugwa. 19 Yegl didre, ye yoba tau bage namba 2 ya 3 mage i ede enaiglkwa ya tau okuo enaiglkwa i ama di te, Ene Iso tegigl yebi, na ka dimere kuno yegl keme di tedre, 20 Ene nigl kogonen yoba Jekop mokonomugl u moglmiwe di, yegl dio! dugwa. Ye prukwa, Na taragl i tebo, ye dem kubrukwa i, pra dem muduo aragan erabuka. Aragan eran, no tegigl yobugl, ye na wakai kanabuka pai dume di, yegl di prukwa. 21 Ana Jekop ye nigl kogonmo yoba i dedugo, ye aglmo buglamo tau Iso tenaiglkwa ikra mage i ede eigo, Jekop yobama bogl eduer dumo i sel yuguno wagle aglke kor paigwa.

22 Ana eduer suna Jekop adiglsre, ye ebie suo ya nigl kogonmo abu suo i ya wama 11-pela bogl ede pi nigl Jabok we digwa yoba nigl bai ede koglo pi pi erimara pidre, nigl bai ede koglo eigwa. 23 Ye nigl bai ede koglo eigo, Jekop ye i pi koglo ibo edidre, aglke ede ikne koglo ya ugwa. Ye koglo ya udre, ye nigl kogonmo yoba taraglmo mudu i ede enaiglmedi dedugwa.

24 Jekop ye dedugo, taraglmo mudu i ede eigo, ye swara koglo ya moglkwa. Ye swara moglko, yagl ta u, ye si padragledi erukwa. Eruko, Jekop ama yagl i si padragledi erukwa. Ye ikne ikne si padrabugledi ere miurko, kamun tagugwa. 25 Kamun tagugo, yagl i yobuglo erekriedi prisre, ye Jekop ogane yobuglo si debruko, Jekop ogane debrukwa. 26 Jekop ogane debruko, yagl i ere mogl, yegl dugwa, Kamun tagumiwa, na edo! dugwa. Yegl dugwa ba Jekop di ikne ede, yegl dugwa, Ene na di wakai yei natn, ene edenaglka. Ba ta manan, ene edekraluwe dugwa. 27 Jekop yegl dugwa pre yagl i Jekop di te, Ene kagn daglo! dugwa. Dugo, Jekop ere mogl, Na kagna Jekop we dimiwe dugwa. 28 Yegl dugo, yagl i aglke kor di ikne ede, Ene kagn erme Jekop we dikre, kagn kor ta daraiglkwa. Israel* we dinaiglkwa. I siragl pre ene God bogl kuda boglsre, yoba bogl kuda boglsre, yobuglo etniwe dugwa. 29 Yegl dugo, Jekop ye ama kira pogl, Ene kagn dagl naratnedi prie dugwa. Yegl dugwa ba yagl i di ikne ede, Ene siragl pre na kagna dagl ene tenabedi pitne? dugwa. Yegl didre, ye di wakai yei tedre, ede ogwa.

30 Ana Jekop ere mogl, Na God guma dra kaniga ba ye na si goglkrume di prisre, dumo i kagie Peniel* we dugwa. 31 Ana ade koragle sugo, Jekop ye dumo Peniel i kide kodidre, ede ogwa. Ye boi boide ede ogwa. 32 God ye Jekop ogane yobuglo si debrukwa pre Israel yoba okuo aglno buglano si ke neigwa igne, ye gogono ogane yobuglo i mina paugwa i nekrikwa. Okna nekre, ede u erme ama meglkwa i, nekrikwa.