1 Ana yegl keme God taragl mudu ere yei kodugwa. Ye kamun mina ibo ya te, dumo makan ya te, taragl mudu kamun mina ibo paigwa ya maginagle meglkwa ya paigwa i, ere yei kodugwa. 2 Ana God kogonmo ere u, ege namba 6 mina ere kodidre, ege namba 7 i we, ye wakan moglkwa. 3 Wakan moglsre, ege namba 7 i pere ede, Ege kade ta yenabiwe dugwa. Ye ege namba 7 wakan moglkwa pre yegl dugwa.

4 Ana ka magigl paugwa i, Yawe God kamun mina ibo ya dumo makan ere yogwa igne, siragl taragl plau dugwa yegl pre paugwa.

Ana Yawe God kamun mina ibo ya dumo makan ere yogwa igne, 5 ede ya kugl kan wi si, parekrikwa. Yawe God kamun dedekruko, yoba ama taragl tau ere yarabuka ta moglkrukwa. Yegl pre ede ya kugl kan wi si parekrikwa. 6 Ana ege i, kamun sikrukwa ba nigl tau makan atne moglkwa ake tomunugo, makan pra pra kugl togwa. 7 Ana okuo Yawe God ere mogl, makan gaba idre, yoba yagl ta bekugwa. Bekidre, God dra mur pu dinan, yoba kor morabedi yogwa i, yagl i guma mina pu dugo, dra mur ede pi yagl bekugwa i, guma mina ede yugugl ogo, yagl i u yoba moglkwa.

8 Ana Yawe God ere mogl, dumo ta wakaile yenabedi ede ya ki ere yaglkwa. Dumo i, ade umara yogwa, kagie Iden we digwa. Ye ere yaglsre, yoba yagl ta bekugwa ikra i pi suna edugwa. 9 Ana dumo i we, Yawe God ede kane kane yaglkwa. Tau i we, yoba wakai kanaiglkwa pre yaglkwa. Te, tau i we, mogo keglbi, yoba uro nedre, wakai praiglkwa pre yaglkwa. Ana dumo suna i we, ede suo ama yaglkwa pabrika. Ta i we, yoba mogomo uro nebi, aimadi kamin kor moraiglkwa. Te, ta i we, yoba mogomo uro nebi, mabuno wakai ya mabuno kide pre pogl sinaiglkwa.

10 Ana dumo Iden suna i we, nigl ta ugwa. Nigl i ede ya kugl kan ki yegl Iden paigwa i nigl togwa. Tedre, ede pi Iden meda ogwa. Iden meda pidre, nigl i pasi ede, bage 4-pela ogwa. 11 Nigl ta i we, kagie Pison we digwa. Nigl Pison i we, ede kantri ta Apila we dimara pidre, geke bake ede ogwa. Ana kantri Apila we digwa i we, gol paugwa. 12 Gol Apila paugwa i wakai paugo, ana ede ta ama paugwa, nuglo demene wakai erukwa. Ede i paugo, kobuglo wakai ta ama paugwa, mige podo boglkwa. Kobuglo i kagie kanilian we digwa. 13 Ana nigl namba 2 i we, Gihon we digwa. Nigl Gihon ede pi kantri Kus we dimara pidre, geke bake ede ogwa. 14 Ana nigl namba 3 i we, kagie Taikris we digwa. Nigl Taikris ede pi kantri Asiria we digwa yomara bina ade umara koglo kana ogwa. Ana nigl namba 4 i we, kagie Yupretis we digwa.

15 Ana Yawe God ere mogl, yoba yagl ta bekugwa ikra i pi dumo Iden suna edugwa. Yagl kogon ersre, dumo sugl morabuka pre i pi suna edugwa. 16 Edidre, Yawe God ere mogl, yagl ka giglede yegl di togwa, Ene we, ede pra pra dumo wakaile paigwa mogo keglkwa i, uro nenatnga. 17 Uro nenatnga ba ede swara ta paugwa, yoba mogomo uro nebi, mabuno wakai ya mabuno kide pre pogl sinaiglkwa i, ede i keme mogomo uro nekro! Ene ta uro nen, ege i ene kaima goratniwe di, yegl dugwa.

18 Ana Yawe God ere mogl, yegl dugwa, Yagl yene swara moglkwa kuno erekrukwa pre na yoba kunamo ta ye ake ple dinabuka ama bekenagle dugwa. 19 Ana okna Yawe God makan gaba idre, agl bugla ya dua kabu kwi bekidre, kua bekidre, yegl erukwa. Ana ye taragl pra pra bekugwa meglkwa yu, yagl moglmara edugwa. Yagl taragl swara swarade siragl kagno yei tenabuka pragledi prisre, ye moglmara edugwa. Edugo, yagl taragl swara swarade kagno yei togwa, kagno i aimadi pai moglkwa. 20 Ye agl bugla ya, kua ya, dua kabu ki kagno swara swarade yei togwa, ba ye yoba kunamo ta ye ake ple dinabuka ta moglkrukwa.

21 Ana yagl ye yoba kunamo ta moglkruko, Yawe God ere mogl, yagl ugl du panabedi eruko, ye ugl du paugwa. Ugl du paugo, God dagigle yobuglo swara ta gudu idre, aglke kun yomara si kegl dugwa. 22 Si kegl didre, ye dagigle yobuglo ikra wagle abu ta bekidre, yu, yagl moglmara edugwa. 23 Edugo, yagl yegl dugwa, Erme we, yoba i na moglmere moglkwa. God na yobra ya mienana idre, ye yobuglo ya miemo bekugwa. Na yagl yobra ya mienana idre, ye bekugwa pre na abu* we dinagle di, yegl dugwa. 24 Ana mabuno yegl paugwa pre yagl nem mam kide kodidre, ye ebie bogl si dakagl morabrika. Miur, ogono nagino swara kaima mere yegl paugwa. 25 Ana yagl abu suo ikra kugugl gagl edekre, yokoko miurka. Yokoko miurka ba agai goglkribrika.