1 Ana Yawe ere mogl, Abram yegl di togwa, Ene we, ene dumo kaminen ya yobanma ya ene nen nem agiglema kide kodidre, ede dumo kor ta na poglsi i nogugl ede ene tenaglmara i po. 2 Ene en, ene gawanma mere kide moglsre, yugobuno pere ta moraiglmedi ere edenaglka. Na yegl ersre, na ama ene ere wakai ere tedre, kagn podo tenaluwa. Kagn podo tebo, ene ere mogl, yoba pere ama ere wakai ere tenatniwa. 3 Te, yoba ene ere wakai ere tebi, na ye ere wakai ere tenaluwa. Ba yoba swara ta ene ere kide ere tenan, na ye ere kide ere tenaluwa. Te, yoba yugobuno pere pere moglsre, uglo koglo koglo meglkwa we, na ene mina mudu ere wakai ere tenaluwe di, yegl dugwa.

4 Abram yumomugl kide kodidre, ede dumo Kenan ogwaAna Abram bugla yugu 75 ne kodugwa igne ye ere mogl, dumo Haran kide kodidre, Yawe dumere ede ogwa. Abram yogo, Lot yogo, akie terke ede ebrika. 5 Ana Abram ebie Sarai auro idre, agigle wam Lot auro idre, ede ogwa. Te, ye dumo Haran meglkwa igne bonaganano ya aglno buglano ya nigl kogono yoba yuigwa i, pra idre ede dumo makan Kenan we dimara enamnedi eigwa. Pi mogl mogl, okuo pi Kenan plau digwa.

6 Dumo Kenan ikra plau didre, ye Kenan suna wan pi, dumo kebra ta More we dimara eigwa. Dumo More i, ede ta paugwa, kagie ok we digwa. Te, dumo More i we, taun ta Sekem we dimara magigl yogwa. Ana ye dumo kade Kenan suna wan doko meglkwa igne i Kenan yoba kamun kade kipai meglkwa.

7 Ana Yawe ere mogl, Abram moglmara plau didre, ka yegl di togwa, Dumo Kenan i we, na ene gawanma tenaluwe dugwa. Dugo, Abram Yawe na moglmara ume di prisre, kobuglo bogl ta kugl, Yawe tawa tenagledi ere yogwa. 8 Ere yedre, ye okuo dumo i kide kodidre, ede pi muglo meglbi ta yomara ogwa. Muglo meglbi i, dumo Betel we digwa, ade umara koglo ibo kra yogwa. Muglo meglbi yomara i pidre, ye sel yugu kipaugwa. Ye kipamara i, dumo Betel ade beimara yogo, dumo ta Ai we dimara ade umara yogwa. Pi kipadre, ye dumo i ama kobuglo bogl ta kugl, Yawe tawa tenagledi ere yogwa. Ere yedre, ye Yawe agle di prisre, kamage ere togwa. 9 Ana ye okuo dumo i kide kodidre, dumo makan ta Negev we dimara enagledi ede ogwa.

10 Ana igne i dumo Kenan suna i kidan podo yogwa. Kidan podo yogwa pre Abram ede kantri Isip we dimara ege sugunagle ta moragledi ogwa. 11 Ana ye yobama bogl akie pidre, dumo Isip magigl eigwa igne, Abram ere mogl, ye ebie Sarai yegl di togwa, Ene abu wakai kaima motnga kaniga. 12 Yegl pre, nono ede Isip omun, Isip yoba ene kandre, ene inamnedi eraiglkwa. Ene inamnedi eribi, ye yagl i ebie moglme didre, na na si goraiglkwa ba ene ta si goglkraiglkwa. 13 Yegl eraiglkwa pre nono ede Isip omun, ene na abauglo moliwe do. Yegl din, ye ene pre na si goglkre, ere wakai ere naraiglmiwe di, yegl dugwa.

14 Ana Abram ya ye yobama ede Isip eigo, Isip yoba kanigwa, Sarai abu wakai kaima moglkwa. 15 Kanigo, Isip king yobamo kade tau ama ye kanigwa. Kandre, ye pi king di teigwa, abu wakai kaima ta umiwe digwa. Didre, ye Sarai agre i ede pi king yugumo edigwa. 16 Edigo, king i ye Sarai inagledi Abram ere wakai ere togwa. Ye sipsip, kau, donki, ya kamel ya te nigl kogonmo yagl abu i pi Abram togwa.

17 Isip king yegl erukwa ba Sarai ye Abram ebie moglkwa pre Yawe kide podo tau Isip king ya ye yobama sinabedi dedugwa. Dedugo, kide sigo, 18 Isip king ere mogl, Abram wo! dugwa. Dugo, Abram ugo, king yegl dugwa, Siragl eruko, ene mabuno yegl ere natne? Siragl eruko, ene na ebina moglme dikre, 19 na abara moglme dine? Yegl dinga pre na ye ebina morabedi yuiga. Erme we, ene ebin te ikne ediga. Ene agre i ede po! dugwa. 20 Abram dumomugl kide kodo, konbauna wan ede omere kwia yogwaKing yegl didre, ye ama yobamo tau di te, Abram agre i ede pi Isip meda edio! dugwa. Dugo, ye Abram agre i ede pi Isip meda edigwa. Ye ebie bogl ya bonaganamo, ya aglmo buglamo ya yobama bogl i pi meda edigwa.