1 Ana God ere mogl, Jekop yegl di togwa, Erme ene ede dumo Betel pi kipadre, kobuglo bogl ta kuglsre, tawa naragledi ere yeo! dugwa. Na God moglka. Ene agitn moglmara kide kodidre, teke enga igne ikra na ene motnara u plau diwe di, yegl dugwa. 2 God yegl dugwa pre Jekop ye nem agiglema ya yobama mudu akie meglkwa i di te, yegl dugwa, Nono pi, God tawa tenamga pre erme we, yoba yugobuno pere meglkwa god kibi bekigwa ene tau yeigwa i, kide kodidre, nigl padre, kugugl gagl deglbi yekrukwa edio! 3 Nono ede dumo Betel enamniwa. Omun, na kobuglo bogl ta kugl, God tawa tenagledi ere yenaglka. Na okna yubun podo iga igne, God na kamage ere teiga i prisre, na dumo aglo ta eiga i ye akie pidre, na ake ple di narumiwe di, yegl dugwa. 4 Jekop yegl dugwa pre ye ere mogl, yoba yugobuno pere god kibi bekigwa ye tau yeigwa i, Jekop tedre, kinano ring ama teigwa. Teigo, Jekop i pi ede ok we digwa ta dumo Sekem magigl paugwa i mabunomugl maugl si paduglkwa.

5 Jekop taragl i maugl si paduglko, ye yobama bogl mudu ede eigo, makan nem yoba taun tau magigl kipai meglkwa i, God ye kudugl podo goraiglmedi erukwa. Eruko, ye kudugl podo geglkwa pre Jekop kuda bogl tenamnedi sika sikrikwa. 6 Ana Jekop yobama bogl ede pi dumo Lus we dimara plau digwa. Dumo Lus i, dumo podo Kenan suna yogo, yoba dumo i ama Betel we digwa. 7 Ye pi plau digo, Jekop kobuglo bogl ta kuglsre, dumo Betel i kagie kor ta yei te, El Betel* we dugwa. Ye okna agigle moglmara kide kodidre, teke ede ogwa igne ikra, God ye dumo i Jekop moglmara plau dugwa pre Jekop kagie yegl yogwa. 8 Ana ye dumo i meglkwa igne, nigl kogon abu ta goglkwa. Abu i okna Jekop mam Rebeka kebra moglkwa igne ye sugl moglkwa, kagie Debora we digwa. Goglko, ye dumo Betel ede ok kuri ta yoglbo paugwa i mabunomugl maugl sigwa. Yegl pre ede i, yoba kagie yeigwa, Alon Bakut* we digwa.

9 Ana Jekop okna ibo dumo makan Mesopotemia kide kodidre, bage bage kipai ede u erme dumo Betel i aglke kor ugwa. Ugo, abu kidagl ikra goglko, maugl sigo, mokomugl i God aglke kor ye moglmara plau didre, ogo kade ake mitna ede, di wakai yei te, yegl dugwa, 10 Ene kagn Jekop we digwa ba yoba kagn i kide kodidre, kagn Israel we dinaiglmiwe dugwa. Yegl mere God ye kagie Israel yei togwa. 11 Ana God yegl didre, ye ama ere mogl, ka ta yegl dugwa, Na God Yobuglna Podo Paugwa moglka. Ene gak mere kide kuglo! Ene gawanma yugobuno pere ta moraiglkwa. Te, gawanma tau yugobuno pere pere meglbi, gawanma tau ama yoba kade king moraiglkwa. 12 Na makan gaba Abraham ya Aisak teiga i, na ene ya ene gawanma okuo moraiglkwa tenaluwe di, yegl dugwa. 13 God dumo igle Jekop ka di tedre, ede ogwa. 14 Ede ogo, Jekop kobuglo olto ta idre, God ye ka di tomara i yoba okuo kanaiglmedi bodugl paduglkwa. Padiglsre, ye wain nuglo God tena pre toide kobuglo bolamugl edugwa. Yegl ersre, ye kugo nuglo ama toide kobuglo bolamugl edugwa. 15 Edidre, God ye ka di tomara i kagie Betel we dugwa.

16 Ana okuo ye dumo Betel i kide kodidre, ede pi dumo ta Efrata we dimara enamnedi eigwa. Ye ede pi meglko, dumo Efrata i kuri ta eglke yei pai moglko, Resel ye gak kuragledi ersre, gagie giugl podo prukwa. 17 Ye gagie giugl podo pre pai moglko, abu ta ye ake ple di togwa ye di te, Ene kudugl goglkro! Yagl gak ta ama kuglniwe dugwa. 18 Yegl dugo, Resel goragledi ersre, yagl gak i kagie Benoni* we dugwa. Yegl dugwa ba ye wie ere mogl, yagl gak i kagie kor yei, Benjamin* we dugwa. 19 Ana Resel yagl gak i kagie Benoni yedre, goglkwa. Ye goglko, ye yobama ere mogl, konbauna ede dumo Efrata omara i, bina maugl sigwa. Dumo Efrata i, yoba erme Betlehem we digwa. 20 Maugl sigo, Jekop kobuglo olto ta yoba okuo kanaiglmedi ye maugl simara bodugl paduglkwa. Ye maugl simara kobuglo bodugl paduglkwa i, erme yei pai moglkwa. 21 Ana Jekop, kagie ta Israel we digwa i, ye kobuglo i bodugl padiglsre, dumo i kide kodidre, ede ogwa. Ye ede pi dumo Eder, yugu ta kei ede mitna kaima eimara plau didre, kuri ta yade ede ido pidre, sel yugu kipaugwa.

22 Ana Israel dumo i kipai moglkwa igne, ye wam Ruben ere mogl, nem nigl kogonmo abu ta yugwa ikra kagie Bilha we digwa i bogl, bogl swara pabrika. Bogl swara pabriko, yoba ye Israel di teigo, prukwa.

Ana Jekop ye wama 12-pela meglkwa. 23 Ye ebie ta Lea bogl yagl gak tau kiurka, Jekop wam komono kagie Ruben we digwa. Te, Lea yagl gak tau ama kuglkwa, kagno Simeon ya Livai ya Juda ya Isakar ya Sebulun we digwa. 24 Te, Resel yagl gak suo kuglkwa, kagno Josep ya Benjamin we digwa. 25 Te, Bilha, Resel nigl kogonmo abu i yagl gak suo kuglkwa, kagno Dan ya Naptali we digwa. 26 Te, Silpa, Lea nigl kogonmo abu i yagl gak suo kuglkwa, kagno Gat ya Aser we digwa. Jekop wama i, ye Mesopotemia moglkwa igne kuglkwa.

27 Ana okuo Jekop ere mogl, ye nem dumo Mamre, Kiriat Arba, kagie ta Hebron we dimara magigl kipai moglmara ikra ogwa. Dumo i, Jekop nem Aisak kipaugwa ya te, Abraham okna kor moglkwa igne ye ama dumo i kipaugwa.

28 Ana Jekop nem Aisak we, ye bugla yugu 180 nedre, 29 kidagl kaima yedre, goglkwa. Goglko, ye wam suo Iso ya Jekop ye maugl sibrika.